Read Wancho Naga Laipao 21 Bible Online

Laipao 21 - Wancho Naga bible

Laipao 21

¹“Israel khünakbu ang wanlom ibu laxkox:

²Hünzome Ibri khünak da shakle jangchang, chixe zanglao azok nang thothale changüi; zanglao anüt lükya to omün thom angkya chemchu chitüile danle apaoüi.

³Chix nang da ang achangle ngopongma kako matankya mix jangchang, chix pao pongma, chix füi tomle kakonu laxlaxle pao angkya münchang. Ikoxlechu nang da ang nguipongma chix kako matanle nguikya jangchang, chix ma kakonu koplaxle pao ang tsuaküi.

⁴Chix hopupae chix ang sheko koxle jangchang, ija sheko hia naosom hwom a hopupa kux ang changüi; ija mixsün a chix tata paoüi.

⁵Ikoxlechu dae, chixe ma kakonu hia naosom hwom to tamchu hopupa to mongkünkya ngaile jangchang ilaxlechu da ang ngokya chix zakse chitsu jangthüiba,

⁶hopupae chix zangshwomnui to paoüi. Ikhato hopupae chix a kapox chichangba kahak hato apüiüi ilaxle na hukle faüi. Ifüima chix a tsünjang masule da ang achangle ngoüi.

⁷“Khünak tuita ma sacha da ang hangle jangchang, she a lüka dapa ningle tamchatle danle apao angkya münchang.

⁸Owawae ija mixcha ma kako ang laxse lükya mix ang hangle jangchang, ikoxlechu ofüima chixe ija mixcha to chiluale changkya zuma, chixe ija mixcha a hopa ang hangle achatüi. She hopupae she a mixnok ang hangle chichangüi, chemthüikoxle chixe she to chisumüile hwondao koxle.

⁹Khünak tuitae ma sasün hama apüi ang dacha tuita shakle jangchang, chixe she to masa ningle hu angkya changle.

¹⁰Ija mixsüne kakonu mama tam-apüile jangchang thüikoxchu, chixe pongwang angkya ma kakonu to tomwüile humele tux-tsom thomüi.

¹¹Chixe ile chimok jangthüiba, chixe she a omün chilax homtoxle danle apao angkya oli.

¹²“Owawae khünak tuita to fitle janglang, chix a mik max ang tomüi.

¹³Ikoxlechu ija a chakchax-jansax jangchang, kue hünzom hanpak ang zünle thomkya pünpao tingnu to chix paole azang ang tsuak.

¹⁴Ikoxle khünak tuitae mongtsik laxle mix langle jangchang, chix a mik max ang tom angkya wüi changpu; ku shwomnui to nguile chang koxlechu ija mixsün a lang angkya wüi changle.

¹⁵“Owawae manu hia mapa to chakmok-janlangle jangchang, chix a mik max ang tom angkya wüi changpu.

¹⁶“Hang angwüi changlax chichangba da ang lax angwüi changlax, owawae khünak ahuxle jangchang, chix a mik max ang tom angkya wüi changpu.

¹⁷“Owawae manu hia mapa to thuakzomle jangchang, chix a mik max ang tom angkya wüi changpu.

¹⁸“Ahe laxle khünak tuitae hozuipa to longfüi chichangba chaktom füi chietle jangchang, ikoxlechu mik tomtata a chiamütle jangchang, chix ang sikangünüi. Chak koplaxle jiplya ma ngokya mix kiathox füi homtho to lai ang tsuakle jangchang, chix to chakmokle changkya mixe chix hingchak mün thomüi tamchu mamüi-mamüile humele changüi.

²⁰“Khünak tuitae sansüi füi chix da to fit; da a sheko wüi changlax lüka wüi changlax, fitkya khama thüile zile jangchang, ija khünak ang sikangün angkya changle.

²¹Ikoxle ija da a nyixta hia nyix anyi bama chizile jangchang, ija hopupa ang sikngün chifaüi; chix ang chix tuina max-samkya ma wüi anguidaoa.

²²“Züizüi khünak ahe-atsile changkyae naowok füikya mixcha to honghe ilaxle she angkya nao pao ang tom, ikoxlechu she to mama khama honghe changkya a chitüi, ile jangchang, ija mixcha kakopae thathople koxkya to kaxfün mixbue asuüile zangwün tsuakkya füima, chakmokpa a itukux ma tsangüi.

²³Ikoxlechu ija mixcha jaojao mik maxle jangchang, sikngün a khüzün lüixto khüzün,

²⁴mik lüix ma mik, wa lüix ma wa, chak lüix ma chak, cha lüix ma cha,

²⁵wünhuak lüix to wünhuak, mak lüix ma mak, sansüi lüix ma sansüi, le changüi.

²⁶“Khünak tuita chix dapa chichangba danu tuita to mik ma fitle mik amale jangchang, ija chix dapa mik omün thomkya hanpak ang chix danle apao angkya changle.

²⁷Chixe wa hongle adütkya jangchang thüikoxchu, ija wa lüix to thathom tuita ningle chix danle apao angkya changpu.

²⁸“Owawa to maihu tuitae thule langkya jangtüi, ija maihu to longfüi thuple lang angkya changpu, ilaxle ija omüi chisaxüi, ikoxlechu hopupa to chemchu chithüiüi.

²⁹Ikoxle ija maihu a azole khünak füito zikle ngokya jangchang tamchu ija bama hopupa ang kaxkoxle thomdaokya jangchang, ikoxlechu chixe ija kople chithomkya tokhange owawa to thule langkya jangchang; ija müi hia hopupa nyi tomle longfüi thuple mik amüt angkya changle.

³⁰Ikoxle chutix hopupa ang, omün koxle tsang wüi thom hüi jangthüiba, chem jupuix ija komle chixe kox angkya oli.

³¹Maihu tuitae naosa tuita, shekosa wüi changlax lükasa wüi changle, langle jangchangba, ija wanlom tuitata wüi twonle zangwün tsuaküi.

³²Maihu tuita danu chichangba dapa tuita langle jangchang, ija maihu hopupae da hopupa ang khop ngunkhix huak tsübün koxle tsangthomüi ilaxle ija maihu a longfüi thuple langüi.

³³“Khünak tuitae tüküi zimle thomkya ozim apao chichangba tüküi tuita tholaxle ija chizim homle dantox; ija ma maihu chichangba mantsak tuita düt,

³⁴chixe ija müi mün thom angkya wüi changpu. Chixe hopupa ang thathom laxle ija müi tüiüi.

³⁵Owawa maihue mix maihu tuita langle jangchang, ija ozün ma tüikya maihu hang üntoxle omün a hopupa nyie tomwüi ahanle laxüi; langdaokya omüi chuwüi hokhie tomwüi afile laxüi.

³⁶Ikoxlechu ija maihu a hozuibu to thule ahamkya maihu tuita ikoxlechu hopupae kople chithomkya jangchang thüiningle, ija amütkya tsangthomle hopupa ang olüix mama maihu ozün ma tuita fa angkya wüi changpu ilaxle omang müi a chixe tüiüi.