Read Wancho Naga Laipao 22 Bible Online

Laipao 22 - Wancho Naga bible

Laipao 22

¹“Khünak tuitae maihu chichangba chun ahux üntoxle langle sax chichangba hangle awütkya jangtüi; chixe maihu tom tuita hanpak ang maihu tom aga ilaxle chun tuita hanpak ang chun tom ali tsangthomle kox angkya wüi changle.

²Chixe ahux daokya tsang chixe thom angkya wüi changpu. Chix ma ija tsangthom ang chemchu chitüile jangchang, chixe ija tsangthom ang ma alüile hang angkya changpu. Ahuxkya müi: maihu, mantsak chichangba tütawüi changlax, chix chak ma ozün ma wüi bangle jangchang, chixe tom tuita mün to tom anyi koxle tsangthomüi. Ahuxmix tuitae hom daple dongkya loplaxle chix langle jangchang. Ija ahuxmix langkya khünak a mix mik amütkya thaipale münchangüi. Ikoxlechu ija a anyixningkya zangngai mik ma jangchang, chix a mix mik amütkya mütkopmix jaojao.

⁵“Khünak tuitae ma müi fumtsüt ang kotho to dan, ikoxle ibu nguilaxle mix haxtok angkya tsax sax ile jangchangba, ija mixsüne hopupa ang tsax lüix to ma haxtok angkya tsax koxle tsangthom angkya changle.

⁶“Owawae zim to wüntak; ija wün tsale tailaile paokyae mix haxtok angkya tsax, mazütkya hia zütdaokya tsaxthom komkaile zokle ashunle jangchang; ija wünlai ang tomkya khünake ibibi pangwüi tsangthom angkya changle.

⁷“Khünak tuitae mixkux thanu-juapa thashe ma thom ikoxle ibu tuina chix hom angkya ahuxle pao. Ahuxmix kople jangchang, chixe paokya to othom anyie nüile tsangthom ang tom angkya changle.

⁸Ikoxle ahuxmix chikoptsuakle jangchang, ija thanu-juapa thomkya khünak zangshwomnui to apüiüi ilaxle ija mixkux tuina chixe ahuxkya münchangle tsaotsüt ang tomüi.

⁹“Maihu bama wüi chang koxlax, chun, mantsak, nyi-za chichangba tütali bama wüi chang koxlechu, khünak anyi tuina tuita ma atinkya jangtüi, hokhi pangnyi wüi zangshwomnui to nguiüi. Zang-e opupu ang thaile le thüipuix, chixe othom anyie nüile hozuipa ang tsangthom angkya changpu.

¹⁰“Owawae mixkux mantsak, maihu, chun chichangba mama tsom-pom ahanle lax ang tsomse tsu; ikoxle ija müi zile pao chichangba thomzünle lax chichangba mixe tsuile pao, ilaxle ile thomjokya owaechu chingün,

¹¹ile jangchangba, ija müi tsomkya khünak zangshwomnui to nguilaxle chixe hozuipa müi münahuxle tsaosaxüi. Müi a ahuxle paokya chichang thüiningle, hopupae maxkya a tom shoma ang laxüi, ilaxle chix zuipae chix ang omün chithom ngoüi.

¹²Ikoxlechu ija müi ahuxle paokya jangchang, ija khünake hopupa ang otha thom angkya wüi changpu.

¹³Ija a faomüi zan to maxkya jangchang, ija mixsüne aho ang faomüi süt a müimang apüile aho angkya wüi changle; ile jangchangba faomüie langkya omün chixe chithomüi.

¹⁴“Khünak tuitae owawa angkya müi omua ma apüi ikoxle ija müi hopupa chitüitama zile pao chichangba thomzünle chang; ija mixsüne omün thom angkya wüi changpu.

¹⁵Ikoxlechu ija hopupa miksho ma jangchang, ija khünake tsangthom angkya müntüi. Ija omua ma apüikya müi jangchang, omua mün koxkyae wüi nguidaoa.

¹⁶“Lüka tuita mixe matik mashokya naocha tuita to chake twonle jangchangdaoba, chixe naochasa otha koxlaxle aju-asomle apüi angkya wüi changpu.

¹⁷Ikoxlechu naocha hopae chix ang chix sacha lax ang chitomba, ija mixsüne naocha hopa ang chix chaktwon mün tsang kox angkya wüi changle.

¹⁸“Chajik-muashem hing twonkya sheko jangtüi, ija mixcha a langdao.

¹⁹“Khünak owawae müi füi nganguile jangchang, ija khünak a langdao.

²⁰“JOWANPA ku boma owawa ang tö koxkya mix jangtüi, chix thajaole wünhai ang tomkox.

²¹“Mixnok wünpa to aza-anale hia dyen-nganle taxchang; texle ataklax, hünzom chuwüi Ijip nok to püntüi ang ngole toxdaokya changle.

²²Zomnu hia khaxsa hwom to omale taxhwon.

²³Hünzome ile janghwonba hwome chingchahüile akhongkya zuma kue hwom kax to lanüi.

²⁴Ku ang mongtsik dongüi ilaxle hünzom a zan to max ang tomüi. Hünzom kakonubu thanu ang achangüi ilaxle naosombu a khaxsa ang achangüi.

²⁵“Hünzome ku khünak owawa chitüi-chinang mix ang thashe ma ngun koxle jangchang, otuechu ngun-thalex mixbu ningle taxchang üntoxle hwom ma olüi taxlom.

²⁶Nange tomzi nyi-za kax atsya laxle janglax-jangtwon thüikoxle, nange ija zanghan madüt tanto wüi achatle kox angkya changle,

²⁷chemthüikoxle chix tsangtsa alomle thom angkya nyi-za hexle chix ang itata wüi changle; chichangthüiba chix a chem ma jipüi? Ku ma chingcha tüikoxle, chemtue chixe ku hato asunhüile akhongüihex, kue chix to lanüi.

²⁸“Zang thajaole zang taxwün ilaxle hünzom thakma apün-awangle ngokyabu to thuakzomle taxchang.

²⁹“Otu nguikya zuma hünzome ku ang, hünzom sax hia grepti-ju, hünzom olip münga, ibu tö koxhüi. Pongwang puxkya hünzome ku ang koxhüi.

³⁰“Hünzome maihu hia chun khama owangma puxkyabu ku ang koxhüi. Owang ma puxkya tüichongsa honu füi nyix anüt ngo ang tomkox, ilaxle nyix achyet lükya to ija ku ang tö koxhüi.

³¹“Hünzom a ku khünaknu, idaile faomüie langkya müimang chemchu hünzome chisaxüi; itülüi ija hibu ang laxkox.