Read Wancho Naga Laipao 23 Bible Online

Laipao 23 - Wancho Naga bible

Laipao 23

¹“Nange kaxthai zangwünbu taxapuk, tamchu mikngün kaxkhi othai koxlaxle chisukya mix to fongle taxchang.

²Hwome thaikya mokpongma tamchu sukya kaxfün tupangpün ang thaikya zangwün apüile changpongma, nang a ibu füito azuile taxchang.

³Kaxfün fapongma omüt-oshun khünak tuita zongto masüi-mixlüikya taxtüi.

⁴“Nange owawa maihu chichangba mantsak ozu dalaxle paoüi jangngünba ija hopupa hato apüile laxkox.

⁵Hüne lixlaxle chix mantsak nguakle ngokya jangngünba, hulanle chitoxle chix to ija mantsak ajong ang asunle laxkox.

⁶“Khwalo to mixshix-zasa nguipongma sukya kaxfün chifale taxtüi.

⁷Chichang khato hux taxfe ilaxle chem mün chitsingkya khünak tuita mik max ang taxtom, chemthüikoxle iningkya ochax mwot mokkya khünak kue ahaiüi.

⁸Zuizun taxlax, chemthüikoxle zuizun-e sukya ngün ang chitomle khünaknu mik apwom ang tomlaxle chemngax chitsingkya khünakbue sikngün apong ang tomle.

⁹“Mixnok wünpa zongto chichangle taxtüi; mixwün ang ngolaxle chemle ajangtüipuix, ija hünzome awan ngopu, chemthüikoxle hünzom chuwüi Ijip nok to mixnok ang ngole toxdao koxle.

¹⁰“Zanglao azok nange manzailax ilaxle ikha angkya puamün athünlax.

¹¹Ikoxle zanglao anüt lükya to ija nazak ang laxkox, ilaxle ija ma nyemkya chemchu taxlax. Zasabue ikha angkya laxtsuaküi ilaxle hwome atale toxkya faomüie saxüi. Grep haxtok hia olip küisa tong tochu ile wüi changlax.

¹²“Hatdang ma nyix azok mwot mokkox ilaxle nyix anüt lükya to mwot chemchu taxmok; ile hünzom dabu üntoxle mixnokbu opange hünzom hanpakma mwot mokle koxpuix hwomchu nazak ang kopüi.

¹³“JOWANPA kue akaxkax to hünzome nathale apalax. Mama baozangbu to taxjop; ibu mün ngaxchu taxlün.

¹⁴“Ku achuakle zanglao to pangpwon azom pong ma saxlax.

¹⁵Hünzome Ijip haxtok danle toxkya Abib lyetnu ma kue adangle koxdaokya ningle twonkhax chiawonkya anthut pangpwon ngolax. Pangpwon lua nyix anüt mong ma twonkhax awonle zingkya an taxsax. Tö kox angkya chilax homtoxle ku shwomnui to taxngui.

¹⁶Hünzom puamünle tsaxtu ang sütkya zuma saxcha-wünle nuilax. Zangtso hia zangwa nyi bama pomsa pangpwon saxle changlax. Ija a hünzome grep ziak hia mama pünziakbu afox-atomle tsuakkya füima changüi.

¹⁷Zangfo to ibibi pangpwon azom ma hünzom lüka sühuak pangnusae JOWANPA, ku to shwom angkya changpu.

¹⁸Hünzome müi langle ku ang tö koxpongma twonkhax awonkya an chikoxüi. Pangpwon pongma ku ang tö koxkya müi angkya ozao ngainop ningkya thoma chibang angkya changle.

¹⁹“Zangfole hünzome pongwang ma zütkya tsaxziak, JOWANPA, hünzom Zang, ku hom to apüiüi. Hünzome chun hia zwon hosabu müi honu tsomti khato taxsong.

²⁰“Kue achwonle thomdaokya onui to hünzom zunle apüi angkya hanpakma, hünzom ahamle changpongma, hünzom kho-awa ang hünzom thoto achale wüi kue ku kaxtaimix apaoüi.

²¹Chix chito na thalax ilaxle chix kax ma laxlax. Chix füi alün-aloxle taxchang, chemthüikoxle chix a kue tsanle ahüikya changle üntoxle iningkya olün-olox to chixe thailakkya müntüiüi.

²²Ikoxlechu hünzome chix kax ma laxle jangchangba ilaxle ku kaxtom komle mokle jangchangba, hünzom zongto zanpabu füi komle ku azanüi.

²³Ku kaxtaimix hünzom thoma leüi ilaxle chixe hünzom Amor nok, Hit nok, Hip nok üntoxle Jebu nok ngokya chaxwan to apüiüi, üntoxle kue hwom max ang tomüi.

²⁴Hwom baozangbu tong to taxakhux tamchu ibu to taxshwom. Ibu nok mwottho laxle taxkop. Hwom baozangbu amadao ilaxle hwom otsao long thuple akhixdao.

²⁵Hünzome JOWANPA hünzom Zang, ku to shwomle jangchang, kue süt hia ti füi hünzom to mohimanüi ilaxle hünzom kaklak komkaile paoüi.

²⁶Hünzom chaxwan to shekobu hünzom owa angchu oti-okuak ma paokya müntüiüi; owachu su-sa chilax homtoxle münngoüi. Kue hünzom tsünlo khothole ngo ang tomüi.

²⁷“Hünzom zongto apüile tüikya khünakbu ku-thua za ang tomüi. Opang füi hünzom achax-azanle changüihex, kue hwom hato khosam angkya apüile koxüi ilaxle hünzom zongto zanbu pangwüi tok ahole pao ang tomüi.

²⁸Kue hünzom zanpabu chabüt-lasün ang tomüi; hünzome hwom ha alople changkya zuma kue Hip nok, Kanan nok üntoxle Hit nok pangwüi jwonle apaoüi.

²⁹Kue hwom zanglao tuita mong ma jwonle münapao; kue ile jangmok thüikoxle chaxwan a khünak chingokya shonak-lingnu ang achangle paoüi, ikhoma hünzom tuto faomüi a huanu ang changüi.

³⁰Itülüi kue hwom a hidaopong hidaopongle jwonle apaoüi; ile hünzom ang chaxwan komle ma haxtok ang achangle lax ang tomüi.

³¹Kue hünzom longzi a Agaba angkya Tütsak-tinu tokhange Eufrat shuanu kople ilaxle Mediterenian tokhange sak-hax alople achenüi. Ija chaxwan ma ngokya nokpu pangnu thakma kue hünzom ang apün ang tomüi, ilaxle süsox-süsoxle soxle hüikya zuma hünzome hwom jwonle apaoüi.

³²Ibu khünakbu hia hwom baozangbu füi tüta tsaifün-kaxwünkya motom taxtüi.

³³Ibu khünakbu hünzom chaxwan ma ngo ang taxtom; hünzome hwom ngo ang jangtsan, hwome hünzom ang ku zongto ochax lyenle chang ang tomüi. Hünzome hwom baozangbu to shwomle jangchang, ija a hünzom hanpakma opao chimüikya longfyen ang changle bangüi.”