Read Wancho Naga Laipao 24 Bible Online

Laipao 24 - Wancho Naga bible

Laipao 24

¹Ifüima JOWANPAe Mosa ang thüi: “Nang boma, Arun, Nadap, Abihu üntoxle Israel nok lompabu 70 ku hato nguihüi; ilaxle hünzome tsailo tokhange ku shwomlax.

²JOWANPA, ku hato a Mosa nang tata nguiüi ikoxle hwom a müimamale soxle chihüiüi, chichangba nang füi tomle khünaknu chidongüi.”

³Mosa nguilaxle khünaknu hama JOWANPA kaxtombu hia chixe akaxkyabu pangwüi wün; ilaxle khünaknu noke motomle thüi: “JOWANPAe akaxkya kax pangwüi ma kwome laxüi.”

⁴Ifüima Mosa-e JOWANPA kax pangwüi lai ma za üntoxle ngainop ningle kaiwüi zolaxle chixe haxnucha ma tö-tsap tuita zing ilaxle chixe longtom bün-anyi, Israel homjen bün-anyi mün ma athünle dan.

⁵Ifüima chixe naosünbu züizüi tsanle apao, ilaxle hwome JOWANPA ang koxle tö zokle ashun ilaxle müi tuita-anyi tumüi tö ang kox.

⁶Mosa-e müi aji süifi lax ilaxle khuanu ding ma dan; üntoxle mama süifi a chixe tö-tsap ding to li.

⁷Ifüima chixe Tsaotsüt laipex lax; ija ma JOWANPA kaxtombu zale tüikya. Ija chixe khünaknu noke atatle ele kox. Hwome lan: “Kwome JOWANPA kax ma laxüi ilaxle chix kaxtombu pangwüi moküi.”

⁸Ifüima Mosa-e khuanu angkya aji koplaxle khünaknu to sakle kox. Chixe thüi: “Ija a Tsaotsüt, oja JOWANPAe chix kaxtombu koxpongma, chix üntoxle kem bama zingkyahex ija changpu.”

⁹Mosa, Arun, Nadap, Abihu üntoxle Israel nok lompa hwom 70 haxnukho to dong,

¹⁰ilaxle hwome Israel nok Zang ngün ang kop. Chix chitong ma safir makhange zingkya, lomtang lailaile ngün; ija a zangdingkho ningle hingbütle tüikya.

¹¹Ibu Israel nok lompabu to JOWANPAe oma chemchu chithüi; hwome Zang ngün ilaxle hwome tomwüi süt sax ti lingle chang.

¹²JOWANPAe Mosa ang thüi: “Ku hato haxnukho to oman; nang ikhato tüipongma kue longkhua anyi koxüi. Ijama khünaknu hanpak ang kue adangle fakya wanlombu pangnu zale tüile.”

¹³Mosa hia chix juafong mix Jihusua nyi achwon, ilaxle otsao haxnukho to dong ang Mosa achex.

¹⁴Mosa-e lompabu ang thüi: “Kwom machat-machatle ija pom ma kwom tanle nuibang. Arun hia Hor nyi a hünzom füi ngonuiüi. Owawa atsi-alakya jangtüi thüiningle kaxfün lax ang hokhi hato nguilax.”

¹⁵Mosa Sinai haxnukho to dong, ilaxle chix to zangfwome joxle kop.

¹⁶Zangtsak-zangdung jikjeple JOWANPA haxnukho to ngui. Israel khünaknue ija wünnyan haxnukho to wünchua ningle ngün. Haxnukho to zangfwom füi nyix azok chwople thom. Nyix anüt lükya to zangfwom makhange JOWANPAe Mosa nyak.

¹⁸Haxnukho to Mosa zangfwom ha alople jao dong. Ikhato chix nyi-punyi wün-punyi nui.