Read Wancho Naga Laipao 26 Bible Online

Laipao 26 - Wancho Naga bible

Laipao 26

¹“Nyihom hom mongkha, ojongkha ku ngwotnuihex, ikha a hingkya, natle khikya hia zikhik füi takkya jaknyi müikya füi zinglax. Ibu nyi ma ozang füikya zünmokbu zinglax.

²Nyikhao pangnyi ojang ma sok 6, okhao ma sok 4 pongle laxlax.

³Khao aga a tuita ma akungle singlax, ilailaile mama aga chuwüi ta ma akungle singlax.

⁴Pongwang angkya nyikung otok angkya nyi ma otua akhople nyihing füi komlax, ilailaile anyi lükya nyikung to chuwüi komlax.

⁵Pongwang angkya nyikung kotok angkya nyikhao ma nyi daxzat punyi bün title singlax, ilaxle anyi lükya nyikung kotok angkya to chuwüi daxzat nyi punyi bün title singlax.

⁶Ija nyikung anyi tuita ang achangle zingle aka ang hun makhange jankuix punyi bün zinglax.

⁷“Zwonmun makhange zingkya nyi khaobün-ata füi Nyihom to chwoplax.

⁸Ibu pangwüi ojang ma sok 26, okhao ma sok 4 pong tomwüi-tomwüi zinglax.

⁹Aga a tuita ma akungle singlax, ilaxle mama azok a tuita ma akungle singlax. Azok akungle singkya anyi ang achangle adaplaxle Nyihom thünthochi ma danlax.

¹⁰Nyikung tuita akiakya nyitua ma punyi-bün nyi-daxzat title singkya danlax. Punyi-bün nyi-daxzat title singkya a ata nyikung otua ma danlax.

¹¹Ija punyi-bün pong nyi-daxzat title singkya anyi tuita ang achangle aka ang khop makhange jankuix punyi-bün zinglax.

¹²Onui süifi tüikya a Nyihom nuakfüichi ma ashalax.

¹³Ojang a sok 4 onui a Nyihom to chwop ang pangnyichi osyen ma ashalax.

¹⁴Tamchatle chu tokchwop nyi anyi zinglax, tuita a chun khwon akhikle azanlaxle üntoxle mama a müikya müikhwon zan füi zinglax, ija nyi füi kotok ma chwoplax.

¹⁵Nyihom ajong angkya fakngom a akasia pün füi zinglax.

¹⁶Fakngom pangwüi ojong ma sok 8 ilaxle okhao ma sok 5 pong laxlax.

¹⁷Fakngom pangwüi tuita ang achangle apong ang thongbu atale fakwa anyinyi füi zinglax. Nyihom angkya thong pangwüi ilailaile zinglax.

¹⁸Shuathongchi homsam ma fakngom a tsa zinglax.

¹⁹Ibu fakngom ocha athong ang khop makhange jankhao punyi zinglax, Anyi a ofak anyi füikya pongwang lükya fakngom tsyen ang, anyi a ofak anyi füikya anyi lükya fakngom tsyen ang.

²⁰Shuathong chikao Nyihom homtsa hanpak ang fakngom 20 zinglax.

²¹Ibu ocha athong ang khop füi jankhao punyi; fakngom tuipong fang ma jankhao anyipong laxlax,

²²Nyihom nuakfüi hannopchi hanpakma fakngom azok zinglax.

²³Homzong ma fakngom anyinyi pong laxlax.

²⁴Homzong angkya fakngom anyi ochitong asopüi ilaxle okho kople atsamle zingüi. Homzong pangnyi angkya fakngom ile lüwüi zingüi.

²⁵Idaile homzong-zong ma fakngom achyet ilaxle ibu dan ang khop jankhao 16 laxlax. Fakngom tuipong jankhao anyinyi ma athongle changlax.

²⁶“Nange akasia pün makhange panglang 15 zinglax. 5 a Nyihom kaochi fakngombu hanpakma,

²⁷5 a kaochi fakngombu hanpak ang, ilaxle 5 a hannopchi nuakfüi angkya fakngombu hanpakma.

²⁸Ozinghua homjangjang abakle fakngom to süifie nüile nwonle lax angkya changle.

²⁹Fakngom to nange hun füi chwoplax, üntoxle panglangbu kop angkya hanpakma ibu ma hun füi okabu zinglax. Panglang ibu to nange hun füi chwoplax.

³⁰Ifüima nang hama haxnukho to ile zinglax-ole ahodaokya ningle nange Nyihom zing angkya changle.

³¹“Nakle hingkya zi, zikhik hia muzi akhikya füi taklaxle jaknyi füi atsyenle tukkya nyi tuita zinglax. Ija to ozang füikya zünmokbu omuabu zingle singkox.

³²Hun füi chwoplaxle oka füi zingkya khopkhao ali ma athongle tüikya akasia thong ali ma ija ashale tinlax.

³³Nyihom khama dingkho ma fakngom okabu fang ma tinle thomkox, ilaxle ija atsyenkya nyi hommongchi ma wanlom longkhao anyi füi tüikya Tsaotsüt suak dankox. Ija atsyenkya nyie Otsao Nui hia Ataxkya Otsao Nui nyi atsyenle thom angkya changle.

³⁴Ataxkya Otsao Nui ma nange Tsaotsüt suak tokma chingcha ngwotnui dankox.

³⁵Atsyenkya nyi thünthochi ma shuakux ma tsap tuita danlax ilaxle ija tsap füi asaole Nyihom shuathong chikao ma wüntik lotsap dankox.

³⁶“Nange Nyihom fülom ma tuknyi tuita zingkox. Ija tuknyi a, nakle hingkya, khikya hia nakle khikya zifüi takkya jaknyi chang angkya oli. Ija tuknyi ma ozang füikya zünmokbu omua zingle singkox.

³⁷Ija tuknyi hanpakma nange akasia pün makhange fakngom aga zinglax ilaxle ibu to hun füi chwoplax. Ibu fakngom okabu chuwüi hun füi zing angkya changpu ilaxle ibu fakngombu a wi jankhao aga ma athongle ajongüi.