Read Wancho Naga Laipao 27 Bible Online

Laipao 27 - Wancho Naga bible

Laipao 27

¹“Nange tö-tsap akasia pün füi zinglax. Olwot ma sok aga, okhao ma sok aga; tö-tsap a olwot-okhao ma tomwüi ilaxle ochuak ma sokta boma okao zinglax.

²Nange tö-tsap ozong ali afikle müizong ali zinglax; ilaxle ibu müizong a tsap zingkya pünkhao alyenkya chang angkya oli. Ibu to nange wi-jan füi chwoplax.

³Nange ikha angkya wündix hun angkya pakhe, haxhun kho, khuatsum, jankuix, wünhan hoklak, ibu zinglax. Ibu oling-olak pangwüi wi füi zinglax.

⁴Wi khuakhao tuita, ozong atale azya angkya oka füi zinglax.

⁵Ija khuakhao tö-tsap fang ma danlax; ija khuakhao a tsap tantiwa alople tsuale zinglax.

⁶Pai angkya dang a akasia pün füi zinglax. Ibu to wi füi khwoplax.

⁷Tötsap paile aham angkya laipongma ibu a tsap ma tüikya okabu ma awünle koplax.

⁸Nange pünkhao makhange ija tsap atsumtsumle zinglax. Ibu a nang hama haxnukho to ahodaokya ningle zinglax.

⁹“Nange Nyihom ma lopsha zinglax. Ija lopsha shuathong chikao ma fak 22 lokya jaknyi tinle ashaüi.

¹⁰Ija lopsha fakngom 20 tamchu ibu chifün ang jankhao 20 a wi füi zing angkya changle, ikoxle ibu fakngom angkya jankuix hia jantombu a khop füi zing angkya changle.

¹¹Ija lailaile nange lopsha zongma shuakux chikao hanpakma chuwüi zing angkya changpu.

¹²Hannop chikao ma sok 44 lokya tuknyi atsyenle ashaüi, ija ma fakngom 10 tamchu chifün 10 tüi angkya oli changpu.

¹³Handün chikao angkya homdün fülom tüikya khama homtho shat sok 50 tüi angkya oli changpu.

¹⁴Kaochi ojong ma sok 15 tuknyi tinle asha angkya changle; ija ma fakngom azom chifün azom füi tüiangkya oli.

¹⁶Chemthüikoxle ija fülom ma jao sok 18 ojang tuknyi tüi angkya changpu; ija tuknyi a hingkya, natle khikya hia khikya muzi füi takkya jaknyi müikya chang angkya oli. Ija to aza-apuale zing angkya changpu. Ija jankhao chifün ali füikya fakngom ali ma asha angkya changle.

¹⁷Lopsha akhople tüikya fakngom pangwüi to khop füi khak angkya changle. Ibu fakngom okabu a pangwüi khop changüi ilaxle ibu chifün a wi jankhao chang angkya oli.

¹⁸Lopsha a sok 80 olwot, sok 44 okhao hia ochuak le tüi angkya changpu. Tuknyibu a jaknyi füi zingüi ilaxle chifünbu a wi jankhao füi zingüi.

¹⁹Nyihom zingkya ma laxkya oling-olak pangwüi tamchu zu-fün lak pangwüi wi-jan füi zing angkya oli.

²⁰“Jan chiaba le atsople thomkya wünchua ang lax ang olip ziak fyetkya münga tsaothakya nang hato apüi angkya Israel khünaknu ang kax laxkox.

²¹Zangshwom ang asoxkya Nyihom ma Tsaotsüt Suak tunthoma tüikya tuknyi zongma homtho ma, hansong makhange anopning kople JOWANPA pomtho ma Arun hia chix sasün hwome wün atsople shwom angkya changpu. Ija kaxtom a Israel nok füichi-naoli pangnue jento thom angkya changpu.