Read Wancho Naga Laipao 28 Bible Online

Laipao 28 - Wancho Naga bible

Laipao 28

¹“Hüntüi Arun hia chix sasün Nadap, Abihu, Eliazar, tamchu Ithamar hwom selax üntoxle zom-mwot mok angkya hanpakma Israel khünaknu kha angkya süile hwom nguapabu ang kamlax.

²Hüntüi Arun hanpak ang Nguakho nyiwun tüzinglaxkox, ijae chix ang achuak-achenkya tamchu osün amüikya ang naxchang kox.

³Opangsa ang kue zingsa-jaosa man angkya hingho koxle thompuix, ibu pangwüi se-kox ilaxle hwom ang Arun nyiwun zingle alai angkya akaxkox. Ile chix ku thotha angkya nguapa tuita ang atsaole lax angkya changpu.

⁴Hüntüi Arun hia chix sasün hwom hanpak ang hwome nguapabu nyiwun zing angkya olom a ibibile changüi: Suakwex-nyi tuita, nguapa nyiwun tuita, nyilo tuita, otok ma laxkya nyipong tuita, khang-ngüi-nyi tuita, khyadax ma ngüi angkya nyi tuita ibibi. Ile hwome nguapa mwot mokle ku thotha angkya hanpakma Arun hia chix sasün hwom ang otsao nyiwun zingle fa angkya wüi changle.

⁵Ibu zingpabue, hingkya, natle khikya, hia khikya muzi, hun zi hia jaknyi twon angkya changle.

⁶“Ibu Suakwex-nyi a hingkya, natle khikya, khikya muzi, hun zi hia müikya jaknyi taklaxle, zifüi single aza-apuale zing angkya changpu.

⁷Otua ma suakbüi anyi, otua ahinle lax ang müile tüi angkya oli.

⁸Ija Suakwex-nyi füi tuita ang achangle single, ija nyi füifüi wüi züpak tuita apüt angkya changpu.

⁹Onik longtom anyi laxlax ilaxle ija ma Jakop sasün hwom 12 mün zalax.

¹⁰Hwom mün a tüichong naoli achwotle zalax. Longtom tuipong to mün azok pong zalax.

¹¹Longtom anyi ma Jakop hwom mün za ang longza mankya khünak tuita laxlax. Ija long a chifün ang hun zinglaxle küikox.

¹²Ibu a Suakwex-nyi suakbüi nyi ma apütkox. Ijae Israel nok homjen 12 münwan ahoüi. Ile Arun-e hwom mün chix suakto ma nwonle ahamüi tamchu JOWANPA, kue ku khünaknu jento texle ataküi.

¹³Hun füi chifün ang jankhao anyi zinglax.

¹⁴Anaole chu hun tsao-tsao alople janbüi anyi zinglax üntoxle ija a ocha füi asople laxkox.

¹⁵“Nguakho hanpakma Suakwex-nyi tuita, JOWANPA mongtex ma kaxfün fa angkya mwot ma lax ang zingle laxkox. Ija a nguapa nyilo takle changkya zi füi wüi zing angkya oli.

¹⁶Ija a olwot hia okhao ma sok 44 pong, anyi ma adople chang angkya oli.

¹⁷Ija ma nange thalix long tsyen ali athün angkya changle. Pongwang ang tsyen ma rubi, topaz, hia khikya-longfixfax tuipong-tuipong athünüi.

¹⁸Anyi-lükya tsyen ma emarel, safir hia thalix longlong tuipong-tuipong athünüi.

¹⁹Azom-lükya tsyen ma tarquis, agate hia amethis long tuipong-tuipong athünüi.

²⁰Ali-lükya tsyen ma baril, karnelian, hia jaspar long tuipong-tuipong athünüi. Ibu pangwüi hun ocha ang hun zingkya ding ma athünüi.

²¹Ibu longtom 12 tyale, Israel homjen aho ang, Jakop sasün hwom 12 mün zale thomüi.

²²Thünkhux chwop ang hun tsaotsao füi alople janbüi zingüi.

²³Hun oka zinglaxle ibu a thünkhux chwop nyi thakchikao ma akale zingkox.

²⁴Hun janbüi anyi a ija oka anyi ma akakox.

²⁵Tüchikao janbüi tuita a ocha anyi tüikya ma akakox. Iningle ibu a Suakwex-nyi suakbüi nyi füi apongle zingkox.

²⁶Ifüima hun füi oka anyi zinglax ilaxle Suakwex-nyi thünkhux chwop nyi otua anyi ma akakox.

²⁷Anaole chu nange hun oka wüi anyi zinglax ilaxle Suakwex-nyi ma tüikya suaklwop nyi füi single tüikya thakma thünthochi otua ma akakox.

²⁸Thünkhux chwop nyi a züpak thakma mongle myen-ngo angkya hanpakma, suaklwop nyi oka hia Suakwex-nyi angkya oka nyi mama zihing füi swotkya nyi füi aka laxkox.

²⁹“JOWANPA, kue ku khünaknu texle atak angkya hanpakma, Otsao Nui to nguikya zuma ija Israel homjen mün zale tüikya suaklwop nyi Arun-e awun angkya changle.

³⁰Otsao ku Ngwotnui to nguikya zuma Arun-e laxlaxle ngui angkya hanpakma, suaklwop nyi ma urim hia thummim apütlax. Israel khünaknu hanpakma ku mongtex awanle lax angkya hanpakma iningkya pongma chixe ija awunle kop angkya changpu.

³¹“Suakwex-nyi pangwüi nyi nakle-nakle hingkya füi zing angkya changle.

³²Ija ma khang sho angkya okha tüi angkya oli. Ija to kyetle chipao angkya hanpakma okax komle singüi.

³³Chachi kao ma nange nakle-nakle hingkya, lumle khikya tamchu nyanle khikya zifüi pomegrenet maipua zingüi. Obaba to okhui apongle hun lingchipbu chithongchi ma apütüi.

³⁵Zomzingle changpongma Arun-e ija nyilo awunüi; JOWANPA Ngwotnui Otsao Nui to chix nguipongma tamchu ikhatokya chix laipongma ibu ozing atatle changüi ikoxle chix zi ang chitomüi.

³⁶“Hun tsaotsao makhange likwünbu zinglax ilaxle JOWANPA hanpak ang atsaole ija ma apütlax.

³⁷Nange ija zinaknaksa füi khang-ngüi-nyi ma ija amyen lax. Ija a thünthochi ma chang angkya oli.

³⁸Ija a Arun khangpong ma laxüi, ile chang koxle, ija tö koxpongma khünaknu thaile changdao koxlechu, JOWANPA, kue ibu tö pangwüi pongle kopüi.

³⁹“Arun nyipong a müikya jaknyi füi taklax üntoxle jaknyi füi wüi khang-ngüi-nyi tuita taklax ilaxle zifüi single aza-apuale züpak tuita zinglax.

⁴⁰“Wünlixle tamchu osün müile lax angkya hanpakma Arun sasün hwom ang nyipong, züpak hia khohom, ibu zingle laxkox.

⁴¹Ibu nyi-za a hüntüi Arun hia chix sasün hwom ang awunle laxkox. Ile hwome nguapabu ningle ku thotha angkya hanpakma olip münga füi pale hwom kam üntoxle atsaole laxkox.

⁴²Hwome ma tsangtsa to khung angkya hanpakma, nange hwom ang jaknyi füi ketho nyi khyadax makhange chikux alople single laxkox.

⁴³Arun hia chix sasün hwome ibu nyihom ma zangshwom ang asox pongma chichangba Otsao Nui to tö kox ang nguipongma awunlaxle ngui angkya changle; ile chichang thüiningle hwome hwom thaikya hünlix alüile ma hato apüiüi ilaxle zile paoüi. Ija a chix tamchu chix sixli hwom hanpak ang jento ngo angkya wanlom ang achangüi.