Read Wancho Naga Laipao 29 Bible Online

Laipao 29 - Wancho Naga bible

Laipao 29

¹“Athaxpi, ija a, hwome nguapabu ningle ku thotha angkya hanpakma hwom süile atsaole chang angkya nange mok angkya mwot changle: Ofwot chitüikya maihu hupongsa tuita tamchu chun ola anyi le laxlax.

²Twonkhax chiawonkya an hia ankhao müngae palaxle koplax.

³Ibu a tsong ma sholax ilaxle nange ibu maihu hia chunbu ku ang tö koxpongma koxlax.

⁴“Zangshwom ang asoxkya Nyihom thoto Arun hia chix sasün hwom apüilax, ilaxle hwom ang zomti ajole laxkox.

⁵Ifüima Arun ang nguapa zapua, nyipong, Suakwex-nyi, ija tok ma laxkya suaklwop nyi hia thünkhux ma chwopkya nyi üntoxle züpak, ibibi koxle aza-apuale laxkox.

⁶Chix khang ma khang-ngüi-nyi nguile laxkox, ilaxle ‘JOWANPA hanpak ang atsaopu’ le zale tüikya otsao khohom chix akhang ma asünle laxkox.

⁷Ifüima otsao ang achang ang chix khang to müngae li.

⁸“Sasün hwom chuwüi ngui ang tomkox, ilaxle hwom mangchu nyipong apongle laxkox.

⁹Hwom khyadax ma züpakbu apakle laxkox ilaxle hwom khang ma khüsünbu asünle laxkox. Ijaningle nange Arun hia chix sasün hwom atsaole süi angkya changpu. Hwome tamchu hwom sixlibue nguapabu ningle ku thotha angkya changle.

¹⁰“Maihupong tuita ku Ngwotnui Nyihom to apüilax ilaxle Arun hia chix sasün hwom ang ija maihu khang ma hwom khang dan ang tomkox.

¹¹Ku Ngwotnui Otsao Nyihom fülom ma ija müi lang kox.

¹²Ija maihupong aji hidaole koplax ilaxle nang chakkhi makhange ija tö-tsap müizong kho ma lyetlax. Ifüima ota tüikya aji tötsap chitong ma thokkox.

¹³Owok khama oche-okhax to chwople tüikya ozao, ilaxle okhax angkya zukhax, ilaxlechu ima tüikya ozao füi mongsatom pangnyi wüi; ibu pangnu tö koxnui ma wünkhut ang achanglax.

¹⁴Ikoxle maihupong omüi hia okhax tamchu odix, ibu a nange homtho to wünkha to zokle ashunüi; ija a ochax tö koxkya changpu.

¹⁵“Ifüima nange chun ola tuita laxüi, ilaxle Arun hia chix sasün hwome ija okhang ma hwom chak danüi,

¹⁶ilaxle nange ija chun ola langüi, ilaxle ija aji lax üntoxle tö-tsap akhople saküi.

¹⁷Ifüima nange ija chun ola ochung-osuak malomlom to tsople alaiüi, ilaxle oche-okhax hia ochabu soüi, ilaxle ibu a müithom hia okhang khato danüi.

¹⁸Ija chun ola komkaile tö-tsap ma wünkhut ang achangüi; ija a JOWANPA ang zokle ashunle koxkya tö changpu. Ija a ongan müikya füi wün makhange JOWANPA to tö koxkya changpu.

¹⁹“Nange chatle chu mama chun ola tülaxüi, ilaxle Arun hia chix sasün hwome ija chun ola khangkho ma hwom chak danüi.

²⁰Ifüima ija chun a langüi, ilaxle tö-tsap angkya aji hidaole laxlaxle nange ija chun langle changüi. Ija aji hidaole lax üntoxle nange Arun hia chix sasün hwom pangwüi to tsaxchi namya ma lyetle laxkox; ilaxle hwom tsaxchi chakhi-khinu hia tsaxchi chikhi khinu ma chuwüi lyetle laxkox. Ota tüikya ajibu a tö-tsap akhople sakkox.

²¹Ifüima nange tö-tsap ma tüikya aji hidaole tamchu li angkya münga hidaole laxlax. Ibu füi Arun hia chix nyiwun to tamchu sasün hwom hia hwom nyiwunbu to sakkox; ifüima chix tamchu chix nyiwun otsao ang achangüi, ifüi tomle sasün hwom hia hwom nyiwunbu chuwüi otsao ang achangüi.

²²“Nange chun ola ozaochu, omüikua zao, oche-okhax to chwopkya ozao, okhax angkya zukhax, mongsatom anyi ozaobu füi tomle ilaxle tsaxchi chung (chemthüikoxle ija a owüiole koxkya müi changle),

²³an füi zingkya ankhao tuita, an hia münga füi zingkya ankhao tuita, chazangkya ankhao tuita le laxlax; ibu pangwüi a JOWANPA pomtho ma tüikya twonkhax chiawonkya an shokya tsong-kha angkya laxlax.

²⁴Ilaxle nange ibu pangwüi Arun chakwok ma tamchu sasün hwom chakwok ma le dankox. Ibu hwome ku ang koxkya ataxkya hingho ningle atsao angkya akaxkox.

²⁵Ifüima nange ibu hwom chak angkya laxüi, ilaxle JOWANPA tunthoma ongan müikya zokle ashunkya tö ang achangle tö-tsap dingma wünkhut ang achang kox. Ija wünkhut a JOWANPA ang tö koxkya ang changüi.

²⁶“Nange Arun atsaole tö koxpongma langkya chun ola tsom lax üntoxle JOWANPA tunthoma ataxkya tö hingho ang atsaokox; ilaxle ija a nang süntom ang changüi.

²⁷“Ataxkya tö ang koxkya chunla tsom nange atsaoüi; ilaxle JOWANPA tunthoma ataxkya tö ang koxkya ochung Arun hia chix sasün hwom süntom chuwüi nange atsaoüi.

²⁸Israel homkha ma Arun hia chix sasün hwom hanpakma ibu a othuithuima ngo angkya otsao wanlom ang ngoüi; ilaxle ija a Israel khünaknue hwom khüzün müile thomkya hanpakma JOWANPA ang tö koxkya kha angkya tö ang changüi.

²⁹“Arun kux otsao nyilo a chix tokfüi ma sasün hwom ang achwotle koxle le angkya changpu; ipongma hwom kamle kopüi tamchu atsaole changüi.

³⁰Otsao Nyihom ma zangshwomnui to zomzing ang nguipongma sasün owae chix man ma nguapa ang lüile moküihex ibu nyilo nyix anüt awunüi.

³¹“Nange atsaole kamle kopkya zomzing ma laxkya chunla müi koplax; otsao nui ma ija müi lumlax.

³²Nyihom fülom ma tüikya tsong-kha angkya an hia ija chunla müi Arun hia chix sasün hwome sax angkya changle.

³³Hwom atsaole tamchu süile chang angkya hanpakma hwom khülüix tsangthom ang koxkya süt hwome saxüi, ikoxlechu mama mix owaechu ikha angkya chisaxüi. Ibu a otsao mwot-kat changle.

³⁴Süile kam angkya zom ma laxkya kha angkya müi hia an ngainopkya zangngai kople jangbang thüikoxle, ota tüikyakya nange bakle wün to zokle ashun angkya changpu. Ija a chisaxüi chemthüikoxle ija a otsao changle.

³⁵“Ile nang füi kue akax daokya ningle nange Arun hia chix sasün hwom to mokle koxüi. Nyix anüt mong ma nange hwom kamle atsaolax.

³⁶Anaole chu khülüix tsangthom hanpak ang nange nyixfole maihupong tuipong tö kox angkya changle. Ikoxle tix nang ochax thailak tüiüi. Ijae tö-tsap otsao ang achangüi. Ifüima ija to otsao ang naxchang ang olip münga füi pakox.

³⁷Ija a nyixfole nyix anüt zinglax. Ifüima tö-tsap a komkaile otsao ang changüi, ilaxle owawae chichangba tütalie ija to lyetle jangchangba ija otsao tsak-zong makhange thamale changüi.

³⁸“Athax mahüikya zia ma nyixfokya to tö-tsap ma zanglao nguidaokya chun hosabu langle tö laxkox.

³⁹Swome tuita hansonge tuita le tö laxkox.

⁴⁰Pongwang angkya chun hosa füi tuak tuita an müikya olip münga pe tuita füi awon laxkox. Grep ti pe tuita tö koxle thokle awütkox.

⁴¹Mama chun hosa tuita a zangnak ma tö laxkox. Ija füi chuwüi an tuak tuita, olip münga peta ilaxlechu grepti-ju peta le tö ang laxkox. Ija a JOWANPA, ku ang süt tö koxkya changpu. Ibu ongan-ozang thoto ku ang mongmüile.

⁴²Füichima ojento ija zokle ashunkya tö ku Ngwotnui Nyihom zünkai ma ku ang kox angkya changle.

⁴³Ikhama ku Israel khünaknu füi apongüi, ilaxle ku womle tüikya zangngai zung to ijakha otsao ang achangüi.

⁴⁴Ku Nyihom hia tö-tsap otsao ang achangüi. Kue Arun hia chix sasün hwom zompu-zangpa mwot mokle nguapabu ang achang ang kue süile kopüi.

⁴⁵Ku Israel khünaknu füi tomle ngoüi, ilaxle ku hwom Zang ang ngoüi.

⁴⁶Ku hwom khato ngo angkya hanpakma Ijip nok tokya hwom khosünle apüikya JOWANPA, hwom Zang a ku tix changpule hwome awan ang kopüi. Ku a JOWANPA hwom Zang changpu.