Read Wancho Naga Laipao 30 Bible Online

Laipao 30 - Wancho Naga bible

Laipao 30

¹“Akasia pün makhange, so zok angkya hanpakma tö-tsap tuita zinglax.

²Ija a olwot hia ojang ma tomwüi, 45 sentimitar, pong chang angkya oli. Ija ochuak ma 90 sentimitar chang angkya oli. Ija tuitata makhange wüi ozongkhing ali atale onui tsuale zingle alai angkya oli changle.

³Okhochi obap ali pangwüi tamchu zongkhing ma ali onüi alaikya, ibu pangwüi to hun tsao-tsao füi akhopkhakle kom.

⁴Hun makhange ija nwon angkya oka anyi zinglax üntoxle ija azya angkya danglang zwot ang okaxkom fang ma pangnyi chima atale apütlax.

⁵Danglang ibu chu akasia pün makhange zinglax ilaxle hun füi chwoplax.

⁶Ija tö-tsap a Tsaotsüt suak tüikya tunthoma ashale tüikya atsyenkya nyi okhochi ma danlax. Kue nang apong angkya onui a ikha changle.

⁷Wüntikbu achwon ang nopfole Arun nguikya zuma, chixe ija khama ongan müikya sobu zok angkya changpu.

⁸Hansonge wüntikbu atsople changpongma chu chixe ile wüi moküi. Ija ongan müikya so zokle tö koxkya to chemchu chipoxle mokle hüi angkya oli.

⁹Ija tö-tsap dingma atsaokya jat so chizoküi, müi tö chikoxüi. Saxziak to chikoxüi ilaxle tö koxle ija dingma grepti-ju thokle chichangüi.

¹⁰Ochax hanpakma tö koxkya müi aji füi ozong ali onui alaile zingle thomkya to pale tö-tsap atsao angkya hanpakma zangpua to Arun-e tö koxle changüi.”

¹¹JOWANPAe Mosa ang thüi:

¹²“Chemtue nange Israel khünaknu akiakle changüihex, khünak pangwüie ku ang ma khüzün tha kox angkya changle, ile jangchangba chix hato khünak huak akiak pongma thama münhüiüi.

¹³Khünak huak akiakkya khama womkya pangnusae wüi othüt tüikya ma thütle lomkya ngun kox angkya wüi changpu. Pangnusae ija a ku ang tö tuita koxkya ningle koxüi.

¹⁴Khünak huak akiakkya ma womkya le thüikoxle, zangtsa makhange thakchichi pangnusae wüi ija omün kox angkya wüi changle.

¹⁵Ma khüzün hanpak ang ija omün koxkya ma tüinangkyabue onüi kox angkya le münchang tamchu chitüi-chinangkyabue sühixle kox angkya lechu münchang.

¹⁶Ija ngun a Israel khünaknu angkya sailax ilaxle ija ku womle tüikya Nyihom otya ma thom ang twonlax. Ija sui a hwom khüzün tsangthom ang changüi ilaxle hwom kho awale kop angkya kue texle ataküi.”

¹⁷JOWANPAe Mosa ang thüi:

¹⁸“Wi füi khuanu tuita zinglax ilaxle ija dan angkya nui angchu wi wüi zinglax. Ija a Nyihom hia tö-tsap nyi obama danlax ilaxle ija ma ti jelax.

¹⁹Süt tö kox ang Nyihom to nopüima tamchu tö-tsap hato hüiüima,

²⁰ija ti Arun hia chix sasün hwome cha hia chak so ang twon angkya changle. Ile jangchangba hwom münlang.

²¹Hwom chizi angkya kuxma hwome cha-chak tsuxle kop angkya wüi changpu. Ija a hwome tamchu hwom su-sabue othuithuima twonle ngo angkya wanlom tuita changpu.”

²²JOWANPAe Mosa ang thüi:

²³“Amüikya ongan müikya jing-soti pe 6, ongan müikya püntsya khwon tuak 3, ongan müikya balsam le nyakkya pe tuak 6,

²⁴ongan müikya püntsya-khwon tuak 6. (Ibu pangwüi onok ziathop ma thütkya changle). Ibu to olip münga pe tuitae bolaxle,

²⁵ibu awonle tsangtsa to pa angkya hanpakma ongan müikya münga ang zinglax.

²⁶Ibu a ku Ngwotnui Nyihom, Tsaotsüt Suak,

²⁷tsap tamchu ima laxli pangwüi, ongan müikya so zok angkya tö-tsap,

²⁸zokle ashunle tö kox angkya tö-tsap, ikhama laxli pangwüi füi, ilaxlechu cha-chak tsux angkya khuatsum hia ija dan angkya nui, ibu pangwüi atsaole dan ang twonlax.

²⁹Ibu jali ile atsaolax, ilaxle ibu pangwüi otsao ang achangüi. Owawae tamchu chemcheme ija to lyetle jangchangba ija ma tüikya otsao tsak-zong tokhange thomzün apong angkya tüiüi.

³⁰Ifüima ibu füi Arun hia chix sasün hwom to pakox, ilaxle ku thothale zomzing angkya hanpakma hwom nguapabu ang achangle kamle atsaokox.

³¹Israel khünaknu ang thüikox, ‘Atsao angkya hanpakma ija otsao münga a ku thothale changpongma othuithuima twonlax.

³²Ija münga a zangjang khünak to li angkya hanpakma münchang, ilaxle nange mama saxli-lingli zing ang iningkya olom chitwon angkya changle. Ija a otsao, ilaxle nange ija to otsao changpule achuak-achenle twonüi.

³³Owawae ijaningle zingle jangchang tamchu nguapa chichangkya khünak owawa hanpakma ile jangtwon thüiningle ija a ku khünak le chieüi.’”

³⁴JOWANPAe Mosa ang thüi: “Ongan-müikya-so mali-mali: pün angkya nüiti, onika, galbanum pün angkya nüiti ilaxle tsaothakya jingso, ibu a tomwüi-tomwüi laxlax.

³⁵Tsangtsa to pa ang ongan müikya münga lailaile ongan müikya so zing angkya hanpakma ibu awutlax. Ija otsao ang achangle thom angkya hanpakma ikhato hun awonkox.

³⁶Ikha angkya ahanle ojuak ang achangle akhixlax. Ija a ku ngwotnui Nyihom to paokox ilaxle Tsaotsüt tunthoma saklax. Ongan müikya so ibu a komkaile otsao changpule laxlax.

³⁷Nang hanpakma tütali ongan müikya so zing ang ija mwotlom taxtwon Ija a ku hanpakma atsaodaokya otsao mwot-katle laxlax.

³⁸Ongan müikya münga ang twon ang owawae ilailaile jangzing, chix a ku khünak changle le münlax.”