Read Wancho Naga Laipao 32 Bible Online

Laipao 32 - Wancho Naga bible

Laipao 32

¹Haxnukho tokya Mosa lwomle chichatle okuilole ngokya zuma khünaknue Arun hama asox ilaxle chix ang thüi: “Ijip nok tokya kwom zunle alaikya mixsün Mosa to chempang wüi changle ngoüntüi kwome müntsingtsuak; idaile kwom lomzun angkya baozang tüzinghüi.”

²Arun-e hwom ang thüi: “Hünzome ma kakonu hia su-sa hwom na ma atule tüikya hun nasaxbu sukkox, ilaxle ibu ku hato apüihüi.”

³Ikhoma khünak pangnusae wüi ma nasaxbu suklaxle Arun hato apüi.

⁴Chixe ibu nasax lax, ibu achuk üntoxle ija makhange maihupong tuita zingle alai. Khünaknue thüi: “Israel nok, Ijip nok tokya kem zunle alaikya baozang a ijatix changle!”

⁵Ifüima Arun-e ija maihupong tunthoma tö kox angkya tö-tsap zing ilaxle tsingang tom: “Ngainyix a JOWANPA achuakle pangpuakya tüiüi.”

⁶Ngainop ningle swomsae hwome zokle ashunle tö kox angkya müi züita anaolechu notom tusüi tö kox angkya hanpakma müi züita apüi. Khünaknu fongsax ang thung, ikoxle ija fongsüt a jutok le tamchu kokokale chinunchakkaile ashuk.

⁷JOWANPAe Mosa ang thüi: “Momle julax, chemthüikoxle nang khünaknu, opang nange Ijip nok tokya alaile apüikya hex, hwome ochax lyenle changdaoa ilaxle ku chilaxle awütdaoa.

⁸Kue hwom ang tolax-ole koxkya lomtang hwome komkaile dantoxdaoa. Hwome hun achuklaxle maihupong mua zinglaxle ija to shwomlaxle ija ang tö koxle changdaoa. Hwome ija a, hwom Ijip nok tokya zunle alaikya hwom baozang changpule thüile.

⁹Khünak ibu mong chemtukuxle mongkhüi mongdüihex kue awanle ngopu.

¹⁰Athaxpi nange ku to abax ang taxazong. Hwom füi ku ang mong zongbak tsiküna. Hwom tha kue ama angkya jao changpu. Ifüima kue nang üntoxle nang sixli tuita chongkya jat-li ang achangüi.”

¹¹Ikoxlechu Mosa-e JOWANPA chix Zang ma chingcha jule akax: “JOWANPA, nang khünaknu füi nang mong itukuxle chemthüikoxle ma angkya? Ibu a nangtsak nang zong chongkya füi nang Ijip nok tokya alaile apüikya münchangdai hia?

¹²Nange, nang khünaknu haxnukho to lang ang ilaxle hwom oli thule amüt ang Ijip nok tokya alaile paopu, le Ijip noke akax angkya olom büthüikoxle daple koxüi? Mongtsik danghüi ilaxle nang mong alüix üntoxle nang khünaknu hato ija thama hüi ang taxtom.

¹³Nang dapa Abraham, Isak hia Jakop hwom texle ataklax. Zangkho tokya lyettsibu ningle hwom sixlibu lai ang tomüi ilaxle nange hwom ang koxüihex-ole tsaokya haxtok jento hwom sixlibu kux ang achangüi lükya nang kaxtsao texle ataklax.”

¹⁴Ikhoma JOWANPAe chix mong alüix ilaxle chixe hwom ang koxüihex-ole azakya thama hwom hato hüi ang chitom.

¹⁵Mosa haxnukho tokya ju. Pangnyi chima Zang kaxtombu zalaxle tüikya longkhao anyi koplaxle chix ju.

¹⁶Longkhao ibu a Zang chix tomtatae zing ilaxle chix kaxtombu zalaxle kox.

¹⁷Jihusua-e khünaknu akhongkya ozing atatlaxle Mosa ang thüi: “Kue kem thongnui to chaxkhong-zankha zing ningle atatle.”

¹⁸Mosa-e thüi: “Ija a zan to lütlaxle sungdünkya ozingchu münchang chichangba zan tokfüi ma sopkya ozing-ozuachu münchang; ija a tsai ngaokya ozing wüi changle.”

¹⁹Chemtue Mosa hwom thongnui hato soxle nguipuix, maihupong mua hia khünaknu azüizüithale shwonkya ngünlelax, ipongma chix ang huanuma mongtsik ilaxle chix chak ma koplaxle tüikya longkhao tswonle awütle ashix.

²⁰Chixe Israel khünaknue baozangle shwomle ngokya maihupong mua tswonle lax, ija achuk, okhix ang achangle thu ilaxle ija ti füi awon chixe ija Israel khünaknu ang aling.

²¹Chixe Arun ang thüi: “Nange hwom ang itukuxle achax ang tom angkya hwome nang to chemthüi?”

²²Arun-e lan: “Ku füi mong taxma; ibu khünakbue ochax lyensale chemtukux mongtsukya tüipuix ija nangechu awan ngopu.

²³‘Ija mixsün Mosa, Ijip nok tokya kwom alailanle tox üntoxle chix to chempang wüi changüntüi, kwome müntsingtsuak; idaile kwom lom azüi ang kwom ang baozang tuita tüzing angkya wüi’ le hwome ku atsangpu.

²⁴Hun likwünbu ku hato apüi angkya kue hwom füi akaxpu, ilaxle owama chem tüile asulaxpuix, chixe ija ku hato apüile koxpu. Ibu tuina kue wünkha to achukpu ilaxle ija makhange kue ija maihupong zingle alaipu!”

²⁵Arun-e khünaknu to akox-akomkya jao chitüile, zanbu tuntho to hwom alüile ongat ang achangkya Mosa-e ngün ang kop.

²⁶Ilaxle chix thongnui zünkai ma ajong laxle akhong: “Owapang JOWANPA füi tüilaxpuix ikhato nguihüi!” Ikoxle Liwi hwom pangwüi chix zui akhople asox.

²⁷Chixe hwom ang thüi: “Hünzom pangwüi ang, ma changlolo koplaxle, ija zünkai makhange kaochi zünkai kople, matüi-manaobu, ma zuikhuibu tamchu ma tomzibu langle pao angkya, JOWANPA Israel nok Zang-e hünzom ang kaxtom koxle.”

²⁸Liwibue ija kax ma lax ilaxle ija nyix khünak hajat azok tukux lang.

²⁹Mosa-e Liwi hwom ang thüi: “Anyix hünzome ma su-sabu tamchu tüi-hi-naobu langlaxle hünzome ma alüile JOWANPA mwottho ma nguapabu ang achangle atsaodaoa ikhoma hünzom ang JOWANPAe chix mohiman koxdaoa.”

³⁰Ofüinyix Mosa-e khünaknu füi akax: “Hünzome wün ang chimüikya ochax lyendaoa. Ikoxlechu athax ku haxnukho to JOWANPA hato dongüi; jangtsuak thüiningle hünzom ochabu thailak tüitsuak ang-ole azongüi.”

³¹Ifüima Mosa JOWANPA hato chat ilaxle thüi: “Ibu khünaknue wünkox chimüikya ochax lyendaoa. Hun makhange baozang zinglaxle hwome ija to shwomle changdaoa.

³²Chingchalaxle hwom thaikya alak-hüile jupu; ikoxlechu nang ija thailak müntüipu jangthüiningle, chingchalaxle nange nang khünaknu mün zale tüikya laipex ma zale tüikya ku mün shong-apaofa.”

³³JOWANPAe lanle thüi: “Ku laipex angkya mün apao angkya a, opange ochax lyenle changdaopuix ibu mün apaoüi.

³⁴Athax nang chatlax, kue nang hama apua daokya chaxwan to hwom lomzunle paokox. Mong ma koplax, ku kaxtaimixe nang to nyele thomüi, ikoxle hwom ochax khoma kue hwom ang sikngün apong ang tom angkya hanpak nguile hüingole.”

³⁵Hwome Arun ang hun makhange maihupong zing ang atsangle changdaokya khoma JOWANPAe khünaknu hato okak-olakbu hüi ang tom.