Read Wancho Naga Laipao 33 Bible Online

Laipao 33 - Wancho Naga bible

Laipao 33

¹JOWANPAe Mosa ang thüi: “Nang ilaxlechu Ijip nok tokya nange alaile apüikya khünaknu pangwüi ikha dantoxlaxle achexün. Kue Abraham, Isak hia Jakop hwom ang koxüihex-ole tsaokya chaxwan to paolax.

²Nang lom azüi ang kue kaxtaimix tuita ahüiüi, ilaxle kue Kanan nok, Amor nok, Hit nok, Peri nok, Hip nok ilaxlechu Jebu nok jwonle apaoüi.

³Hünzom a hak-aluale tamchu haxzaoe awangle tüikya chaxwan to nguile ngoüi. Ikoxlechu ku tomtata a hünzom füi münpao, chemthüikoxle hünzom a kax ma chilaxle tüikya khünakbu changle. Ku azuile jangchang thüikoxle kue hünzom a lomba to wüi bakle amütle chu nakchang.”

⁴Chemtue khünaknue ija kax atatpuix hwom sop ilaxle likwünbu putle chemchu chilaxle mongma.

⁵JOWANPAe Mosa ang khünaknu füi akax angkya kaxtom ile kox: “Hünzom a kax ma chilaxle tüikya khünakbu changle. Ku hünzom füi onox ma thüingaxchu azuile jangchang, kue hünzom komkaile amütle changüi. Athaxpi hünzome ma likwünbu koplaxle achexlax. Hünzom to chemle hwonüihex ija kue wüntsuaklax angpuix.”

⁶Ikhoma Sinai haxnukho angkya hwom achexkya makhange athaxpi Israel khünaknue likwün chemchu chilax.

⁷Chemtue Israel khünakbue thongnui zingüihex, Mosa-e otsao Nyihom paolaxle hwom thongnui füi siatsaile ija Nyihom ajongüi. Ija ang JOWANPA womle tüikya Nyihom le nyak ilaxle owawae JOWANPA ma tütali tik-tose tsukya jangtüi, ikhato paoüi.

⁸Chemtue Mosa ikhato paoüihex, khünaknu a ma homthotho ma lailaxle ikhato chix manop-manople hule ngo.

⁹Chemtue Mosa hommong to noppuix, thong lailaikya zangfwom julaxle ija Nyihom fülom ma ajongle ngo, ilaxle JOWANPAe Ija zangfwom makhange Mosa füi zangwün.

¹⁰Chemtue khünaknue Nyihom fülom ma thong lailaikya zangfwom ajongle ngokya ngünpuix, hwom pangnusa akhuxle shwom.

¹¹JOWANPAe Mosa füi thün-khang asaole akax.

¹²Mosa-e JOWANPA ang thüi: “Ija chaxwan to kue ibu khünaknu azüi angkya bama nange ku füi akaxkya changle, ikoxlechu nange ku füi tomle owa akat angkya hex ija a chiakax. Nange ku müile awanle ilaxle ku füi nang mongto müikya tüipule nange akaxdaoa.

¹³Nange ile jangtex thüiningle, ku hama nang mongtex apuale fahüi, chemthüikoxle kue nang thothale ang mong amüile ngo angkya hanpakma. Tamchu texle atak hüi, ija khünaknu a nange ma khünaknu ang lax ang zünle kopdaokya changle.”

¹⁴JOWANPAe thüi: “Ku nang füi paoüi, ilaxle kue nang ang wüi lüt ang tomüi.”

¹⁵Mosa-e lan: “Nang kwom füi tomle münhüipu jangthüi: kwom ang ijakha dantox angkya taxakax.

¹⁶Nang kwom füi tomle chihüi jangthüi: khünaknu füi tamchu ku füi nang mongzom müile le owawae chemle awanle laxüi? Nang kwom füi tomle womle tüikoxtix, kwom a chaxwannu angkya khünakbu füi chixlili changle le awan ang tsuaküi.”

¹⁷JOWANPA Mosa ang thüi: “Nange chemle akaxpuix iningle kue moküi, chemthüikoxle kue nang komkai tsinglax ngopu tamchu nang füi ku mongzom müihupu.”

¹⁸Ifüima Mosa-e thüi: “Chingchalaxle kue nang womle tüikya zangchangjep ngün ang tomhüi.”

¹⁹JOWANPAe lan: “Ku müikya kue komle nang tunthoma le ang tomüi tamchu nang womle tüipongma kue ku otsao mün lünüi. Ku a JOWANPA changle, ilaxle kue zünle kopkyabu hato mongkün hia chingchajaja ahopu.

²⁰Kue nang ang ku thünza ngün ang müntom, chemthüikoxle ku ngün füima owachu ozün ma ngo ang müntho.

²¹Ikoxlechu nang tuita longnu khoma ajong ang tho angkya ku zui ma onui tuita tüile.

²²Chemtue ku womle tüikya zangchangjep leüihex, kue nang a long okha ma shoüi ilaxle ija akaile ku lekya matsuak-matsuakle kue ku chak füi nang to khungle thomüi.

²³Ifüima kue ku chak paoüi, ijama nange ku tokfüi chichi ngünüi ikoxlechu thünthochi münchang.”