Read Wancho Naga Laipao 34 Bible Online

Laipao 34 - Wancho Naga bible

Laipao 34

¹JOWANPAe Mosa ang thüi: “Owang pongkya lailaile longkhao anyi zinglax, ilaxle owangpongkya longkhao anyi, oja nange ashixle awütdaopuix, ibu ma tüikya kaxhuakbu kue ija nyi ma zafang.

²Ngainop swomsae wüi achwonlax, ilaxle ku füi apong ang Sinai haxnukho akixkya khato donghüi.

³Nang füi tomle owachu chihüiüi, haxhua ma owawa sünchu chingün angkya changle. Chun hia maihu chemchu haxnu chithong to fumtsütle chichang angkya oli.”

⁴Ikhoma Mosa ang longkhao anyi tamchatle zing angkya hato hüi. JOWANPAe kaxtom koxkya lailaile ofüinop swomsae ibu Sinai haxnukho to dünle apong.

⁵JOWANPA zangfwom ma ju ilaxle chix füi tomle ikhama ajong. JOWANPAe chix otsao mün lün.

⁶Ifüima JOWANPA a chix tuntho makhange le ilaxle akhongle thüi: “JOWANPA ku a chingchajajae awangle tüikya Zang changle. Ku ang mong chwonle chitsiküi ikoxle chongkya mongkün hia ojao chialekya mongong-chalom tüipu.

⁷Kue ku kaxtsao tsünthom-tsünthom to kople thomle ilaxle chichang-chizangkya hia ochax mwotbu thailakkya tüile; ikoxlechu hopu-hopa hwom ochax khoma kue hwom sutai-sulai tsün kople sikngün chifa homtoxle müntox.”

⁸Mommomkhai le Mosa hax to akhux ilaxle chix shwom.

⁹Chixe thüi: “Nang otsingtomtata ma ku füi mongzom müikya jangchang, kue nang kwom füi tomle azuihüi le tsaiju-kaxjupu. Ibu khünakbu a kax ma chilaxkyabu changle, ikoxlechu kwome mokdaokya bao mwot hia ochax thailakkya tüifa. Kwom a nang khünaknu lüwüi pongle laxhüi.”

¹⁰JOWANPAe Mosa ang thüi: “Athax kue Israel khünaknu füi Tsaotsüt laxpu. Chaxwan tokma owa chaxwan tochu ile otuechu machangkya ohünotün mwot kue hwom miksho ma mokle ahoüi. JOWANPA kue mok ang thokya chem tukux khomtsikya mwot hex, ija khünaknu pangnusae ngün ang kopüi; chemthüikoxle hünzom hanpakma kue ohünotün mwotbu mok angkya changle.

¹¹Anyix kue hünzom ang koxkya wanlombu tolax. Amon nok, Kanan nok, Hit nok, Periz nok, Hip nok hia Jebu nok, inu a hünzom hüile ngopongma kue jwonle apao angkya changle.

¹²Hünzom paole ngokya nok tokya khünakbu füi tingmüi-nokzing angkya zangwün taxtüi; chemthüikoxle ija a oshan-odan chimüikya kam tuita ang achangle bangüi.

¹³Itülüi, hwom tö-tsapbu pünle awütkox. Hwom saxkox thongbu amale awütkox ilaxle hwom baozang Asherah mua texle akhixkox.

¹⁴“Mama baozang tütatochu taxshwom, chemthüikoxle ku a ma zanpa chishan tsuakkya JOWANPA changle.

¹⁵Ija chaxwan tokya khünak owa füichu tingmüi-nokzingle taxchang. Chemtue hwome hwom baozangbu to shwomle ibu ang tö koxle changüihex, hwome hünzom ahyenüi, ilaxle hwom baozangbu ang tö koxle changdaokya süt asüt-sele hünzom to thwontsingüi.

¹⁶Hünzom su-sabu ibu mixnok shekobu füi atu-amaile taxchang. Hünzom a hwome mongong ma ale zak to adütle changüi tamchu hwom baozangbu to shwom ang koxle changüi.

¹⁷“Tütali long-jan hia pün ibu makhange baozangbu zinglaxle ibu to shwomle taxchang.

¹⁸“Twonkhax chiawonkya Anthut Pangpwon thomlax. Kue hünzom ang kaxtom koxdaokya ningle, abih lyet ma twonkhax chiawonkya an nyix anüt saxlax, chemthüikoxle hünzome Ijip nok dantoxkya a ija lyetkua ma changle.

¹⁹“Owang ma puxkya sasün tamchu pongwang ma puxkya tsom-pom olala, ibu pangwüi ku kux changpu.

²⁰Ikoxlechu mantsak hosa olüix ang chun hosa koxlaxle hünzome pangwüi shakle chatüi. Hünzome chatle shakle chichat thüiningle ongom azople langdao. Owangma puxkya sasün hwom a hünzome pangwüi shakle chatlax. “Tö chikop homtoxle ku hato owachu chinguiüi.

²¹“Hünzom ang ma mwot mok angkya hanpak nyix azok tüipu, ikoxle haxkhutle tsax thwom tu chichangba tsax züt tu chang koxlechu nyix anüt lükya to mwot taxmok.

²²“Hünzome tsaxtu ang osütwangle tüipongma Saxcha nyakle saxcha-wünkya tüilax. Tsax züt komle changkya füima pomsa pangpwon puakya tüilax.

²³“Nang khünak pangwüi zanglao to azomzom ma, JOWANPA, ku Israel nok Zang shwom ang ngui angkya changle.

²⁴Kue hünzom tuntho angkya jat-libu jwonle apao tamchu hünzom haxsüt longzi akhaole chang füima, ija pangpwon azom saxle pua ngopongma owaechu hünzom haxtok tingtakle münchangüi.

²⁵“Hünzome ku ang müi tö koxpongma twonkhax awonle zingkya an taxkox. Kaitox Pangpwon ma langkya müi chemchu ofüinop kople taxtox.

²⁶“Zangpua foto nang manzai kha angkya puamün JOWANPA homkha to wünkya tüikox. “Otsom sip madankya chun hosa hia zwonsa taxhuak.”

²⁷JOWANPAe Mosa ang thüi: “Kaxhuak ibu zale koplax, chemthüikoxle nang füi tamchu Israel khünaknu füi longzale kue ibu kaxfün laxkya a ibu kaxhuak chifün ang lax üntoxle fünpu.”

²⁸JOWANPA füi tomle Mosa ikhato nyix punyi wünpunyi le ngo. Ikhato ngopongma chixe chemchu chisax-chiling. Chixe kaxtom libün, tsaotsüt kaxhuakbu longkhao ma zale kop.

²⁹Kaxtom libün zakya longkhao koplaxle chemtue Mosa Sinai haxnukho tokya ju; JOWANPA füi zangwünle ngokya chang koxle chix thün tüle nyan; ikoxle chixe ija chiawan.

³⁰Arun tamchu khünaknu pangnue Mosa to hukoxle thün tüle nyankya ngün, ilaxle hwom chix hato hüi ang chaza.

³¹Ikoxlechu Mosa-e hwom se, ilaxle Arun hia khünaknu azüi ang ngokya lompabu pangwüi chix hato hüi. Ijama Mosa-e hwom füi zangwün.

³²Ifüima Israel khünaknu pangwüi chix hama asox. Ijama Sinai haxnukho to JOWANPAe chix chak ma atwonle koxkya kaxtom libün hwom ang kox.

³³Khünaknu füi akaxle ngokya chix zangwün ashukkya füi tomle Mosa-e chix thün to nyi füi khung

³⁴Chemtue Mosa, JOWANPA womle tüikya Nyihom to JOWANPA füi zangwün ang paopuix, chixe chix thün angkya thün-khung nyi awüt. Chemtue chix homtho to laipuix, chix ang akax ang koxkya kaxtombu pangwüi chixe Israel khünaknu hama wün.

³⁵Ipongma chuwüi hwome chix thün tüle nyanle ngün. Ikhoma JOWANPA hato zangwün ang tamchatle mapaokya kople chixe nyi füi ma thün to khungle thom.