Read Wancho Naga Laipao 35 Bible Online

Laipao 35 - Wancho Naga bible

Laipao 35

¹Mosa-e Israel khünaknu othom pangwüi sele asox ilaxle hwom ang thüi: “Ija a JOWANPAe hünzom ang moklax-ole koxkya kaxtombu changle:

²Hünzom ang ma mwot mok angkya hanpakma hanpak nyix azok tüile, ikoxle nyix anüt lükya a otsao nyix, JOWANPA ku hanpak ang süile kopkya nyix changle. Ija nyix owawae tütali mwot mokle jangchang, ija khünak a mik max ang tomüi.

³Sabath nyix hünzome ma homkha ma wün ngaxchu taxtak.”

⁴Mosa-e Israel nok pangnusa ang thüi: “Ija a JOWANPAe koxkya kaxtom changle:

⁵JOWANPA hanpakma tö laxkox. Ile mokse tsukya pangnusae ibibi mwotkat apüile tö kox angkya changle: hun, khop, wi,

⁶jaknyi; nakle hingkya hia khikya, tamchu muzi khikhikya; zwonmun füi zingkya nyi;

⁷chunla khwon khile azandaokya; müikya müikhwon; akasia pün;

⁸wüntik ma lax angkya wünti; ongan müikya so mali-mali, lile atsaokya mwot mokpongma münga füi awonle lax angkya hanpakma ongan amüi ang;

⁹Nguakho Suakwex-nyi ma apüt angkya hanpakma karnelian hia mama likwünbu, ibibi.

¹⁰“Hünzom khama mwotmix pangwüi nguilaxle JOWANPAe fakya kaxtom ningle pangwüi mok angkya changle:

¹¹Nyihom, ija to chwopkya tamchu ija otok to chwopkya, ija ma tüikya jan okabu tamchu homtsabu, tajen hia panglangbu, fakngombu tamchu ibu küi angkya chifünbu;

¹²Tsaotsüt Suak, ija pai angkya dangbu, ijama tüikya chingcha ngwotnui, ija to tuk angkya tuknyibu;

¹³tsap, ija azya angkya dangbu, ilaxle ikhama lax angkya oli mwotkat pangwüi; Zang ang koxkya an;

¹⁴wüntik dan angkya hanpakma lotsap ilaxle ikhama laxli mwotkat pangwüi; münga füikya wüntikbu;

¹⁵so zok angkya tö-tsap hia ija pai angkya dangbu; lile atsao ang twonkya münga; ongan müikya so; Nyihom fülom ma lax angkya atsyenkya tuknyi;

¹⁶zokle tö kox angkya tö-tsap, ija ma asople tüikya wi achukle jaokya, ija azya angkya dangbu, ilaxle ikhama tüikya mwotkat pangwüi; cha chak so ang twonkya khuanu ija chifün füi;

¹⁷nui ma tuk angkya tuknyibu, ija angkya thong hia chifünbu; nui to nop angkya fülom ma lax angkya tuknyi;

¹⁸Nyihom angkya lak hia zu tamchu nui ibu;

¹⁹ilaxlechu Otsao Nui ma hwome Zang thotha pongma lax angkya tüle müikya nguapabu nyi-za: ija a nguapa Arun hia chix sasün hwom nyi-za.”

²⁰Israel khünak pangnusa wüi pao,

²¹ilaxle ilailaile mokse tsukya pangnusae wüi, Zang Ngwotnui Nyihom zing ma kox angkya tö apüi. Zangshwom pongma laxli tamchu nguapabu nyi-za zing ma lax angkya oli pangwüi hwome apüi.

²²Mong atsutsue, sheko lüka pangnusae wüi, aza-apuakya jansa, nasax, khopsan, likwün, tamchu hun, ibu füi zingkya tuiza-nakom pangwüi apüihüi ilaxle ibu JOWANPA ang atsaole kox.

²³Jaknyi müikya opangma tüilaxpuix; nakle hingkya, khikya chichangba khikya muzi; zwonmun füi zingkya nyi; chunla khwon khile azandaokya chichangba müikhwon müikya, ibu atüitüi apüi.

²⁴Tsuakpupue tö koxle JOWANPA hato khop chichangba wi apüi, ilaxle akasia pün tüikyabue, tütali mwot to laxkoxchu lax ang, ibu apüi.

²⁵Chakzing mankya shekobue hwome zingkya jak-zi hia zinak tamchu zikhik hia muzi khikya, ibu apüi.

²⁶Hwome zwonmun makhange chuwüi zi zing.

²⁷Lompabue karnelianbu apüi ilaxle mamabue likwünbu apüi; ibu a Suakwex-nyi otsao hia thünkhux chwop nyi ma apüt ang lax.

²⁸Ongan müikya otex-tsyapi hia münga a wüntikbu hia lile atsao angkya münga hanpak ang ilaxlechu ongan müikya ang lax angkya hanpakmale apüi.

²⁹JOWANPAe Mosa ang koxle thomkya kaxtom mwot ma lax ang, koxse atsutsu hingho Israel khünaknu noke JOWANPA hato tö apüi.

³⁰Mosa-e Israel khünaknu füi akax: “Judah homjen angkya Hur zongto hosu, Uri sasün Bezalel Zang-e zünle kopdaoa.

³¹Zang-e chix, chixtsak-chixzong füi awangdaoa ilaxle chix ang chak-mwot oli pangwüi mokle tsuak angkya olom awankya, janzüi hia tsing-wankya pangwüi fadaoa.

³²Ibu a chixe hun, khop hia wi füi aza-apuale zingle alai ang,

³³apütkyali likwün zing ang; pünfit ang; ilaxle zingpa mwot pangwüi hanpak ang changpu.

³⁴JOWANPAe Dan homjen angkya Ahisamak sasün Oholiab ang mamabu hama zingzing mwot anole kox angkya tsuak angkya janzüi kox.

³⁵Zingpa-jaopabu, aza-apua angkyabu mok ang mwot mankya tamchu jaknyi, nyinak-naksa, zikhik hia muzi akhikya; ibomachu malimali nyi takle alai ang mankya kox. Okhie mwot pangnu oli wüi mok ang man ilaxle hokhi a manle aza-apua angkyabu changkya.