Read Wancho Naga Laipao 36 Bible Online

Laipao 36 - Wancho Naga bible

Laipao 36

¹“JOWANPAe mwot awankya hia tsing-wankya koxlaxle thomkya Bezalel, Oholiab tamchu mama zingpabu pangwüi, opange Nyihom chemle zingüihex awanle ngolaxpuix, hwome ibu pangwüi JOWANPA kaxtom lailaile zing angkya chang.”

²Bezalel, Oholiab, ilaxle mama mwot tsingpabu opang ang JOWANPAe janzüi koxle tüilaxpuix ibu tamchu opange fongsele mongtsukya tüilaxpuix, hwom pangwüi Mosa-e se ilaxle mwot owang wang angkya akax.

³Otsao Nyihom zing angkya hanpakma Israel khünaknue apüile koxkya tö pangwüi hwome Mosa chak angkya pongle kop. Anaole chuwüi Israel khünaknue nopfole töbu apüile koxkya chizak.

⁴Ifüima mwot mokle ngokya zingpabu pangwüi paolaxle

⁵Mosa hato kaxwün wangle thüi: “JOWANPAe ibibi lüwüi moklax-o lükya mwot tsuak ang okhonguikya füima ngaxchu khünaknue apüile ngokya münzak changa.”

⁶Idaile otsao Nyihom zing ma lax ang tamchatle owawaechu tö shongtax apüingo lükya kax Mosa-e pangnusa pom towüi kox; ifüima khünaknue apüikya zak.

⁷Chemtukux apüidaopuix inu ngaxchu mwot tsuakle chang füima onüi atale chang.

⁸JOWANPA Ngwotnui Nyihom a hwom khama zingpabu ang ngokyabue zing. Nakle-nakle hingkya, lumle khikya hia muzi akhikya, ibu füi takkya jaknyi hia ozang füikya zünmok takle zingkya füi hwome Nyihom zingle alai.

⁹Nyikhao tomwüi-tomwüi tak, ojang ma fak azok ilaxle okhao ma fakpong.

¹⁰Hwome khao aga ta ma akungle sing ilaxle mama aga chuwüi ile sing.

¹¹Hwome nyikung pangnyi towüi otok angkya nyitua ma nakle-nakle hingkya nyi füi oka single kox.

¹²Pongwang angkya nyikung otok angkya nyikhao ma hwome oka 50 zingle kox ilaxle mama nyikung angkya ofang angkya nyikhao ma ibu füi oshemshem oka 50 zingle kox.

¹³Ija nyikung anyi tuita ang achangle bün angkya hanpakma hwome hun makhange jankuix 50 zing.

¹⁴Ifüima zwonmun füi takkya nyi khaobün-ata füi hwome Nyihom to chwop angkya zing.

¹⁵Hwome ibu tomwüi-tomwüi, ojang ma fak azok ilaxle okhao ma fak apongle zing.

¹⁶Hwome ibu aga tuita ma akungle sing ilaxle mama 6 chuwüi tata akungle sing.

¹⁷Hwome kungta angkya akiakya nyitua ma oka 50 sing üntoxle ata nyikung machu otua ma oka 50 single kox.

¹⁸Ile chwopnyi tuita ang achangle asing ang hwome wi füi oka 50 zing.

¹⁹Hwome otok chwop ang anaolechu anyi zing, tuita a chun ola khwon akhikle azandaokya ilaxle mama a müikya müikhwon füi zing; ija a otok chwop ang lax.

²⁰Hwome Nyihom homtsa ang akasia pün ajongle zing.

²¹Homtsa pangwüi fak anyi pong tsua ilaxle fak 33 pong khao,

²²müizong ningle ozong anyi atale zing. Ija a homtsa anyi ta ang achangle apong tsuak angkya hanpakma hwome ile mok. Homtsa pangwüi ma ija müizong alaile zing.

²³Hwome shuathong chikao hanpakma homtsa 20 zing.

²⁴Ibu chifün ang ofang ma khop makhange chifün 40 zing; thong tuita hanpak ang chifün anyipong le düt. Ijae müizong onüi alaile tüikya kople ajong thom.

²⁵Hwome Nyihom shuakux chikao hanpak ang otsa 20 zing;

²⁶ilaxle chifün ang khop jankhao 40 zing, frame tuipong fang ma chifün anyipong düt.

²⁷Nyihom nuakfüichi hanpakma, hannopchi ma hwome frame 6 zing.

²⁸Homzong anyi hanpak ang hwome frame anyi zing.

²⁹Homzong frame ibu a chitong chima apong laxle okho kople atsamle tuita ang achang. Homzong anyi hanpak ma frame anyi a ile zing.

³⁰Idaile pangnu athüt koxle frame 8 tamchu chifün ang zingkya khop jankhao 16, frame tuipong to jankhao anyipong dütle.

³¹Hwome akasia pün makhange tajen-panglangbu 15 zing. Aga a Nyihom angkya homkao tuita angkya homtsabu hanpakma;

³²aga a mamachi homkao angkya otsa hanpakma ilaxle aga a hannopchi oshuk angkya tokfüichi homtsabu hanpakma.

³³Otan angkya tajenbu; homtsabu; tanti kople nwonle, Nyihom kaochi makhange ata-chikao alople zing.

³⁴Hun füi lile tüikya ibu tajen-panglangbu nwon angkya hanpakma hwome otsa to hun füi li ilaxle ibu ma hun okabu apütle kox.

³⁵Hwome müikya jaknyi, zikhik hia muzi akhikya füi takle tuknyi tuita zing. Ija ma ozang füikya zünmokbu zi füi swotle zingle kox.

³⁶Ija tuknyi bünle thom angkya hanpakma hwome akasia pün makhange thong ali zing. Ija to hwome hun füi li ilaxle hun füi wüi okabu zingle kox.

³⁷Zikhik hia muzi akhikya füi takle tamchu zi füi swotle aza-apuale, Nyihom fülom ma lax angkya hanpakma hwome tuknyi tuita zing.

³⁸Ija tuknyi hanpak ang hwome long ali zing. Ibu ma okabu apütle kox. Thongkho hia fakwabu to hun füi chwop. Thong ibu hanpak ang wi-jan makhange chifün aga zingle kox.