Read Wancho Naga Laipao 37 Bible Online

Laipao 37 - Wancho Naga bible

Laipao 37

¹Akasia pün makhange Bezalel-e Tsaotsüt Suak tuita zinglax; olwot ma sok ali, okhao hia ochuak ma sok anyi chakbap pong.

²Chixe ija to otok howok pangnyi chima tamchu okax-okho to komle hun füi chwople kox.

³Nwonle aham ang chixe hun makhange wüi oka ali zinglaxle, ibu a kaopong ma anyinyi atale ocha ali füi asop-apongle zing.

⁴Azial-e aham angkya hanpakma Akasia pün makhange chixe dangbu zinglaxle ibu to hun füi chwople kox.

⁵Chixe ibu a Suak ma atale oka ma awünle zwotle kox.

⁶Chixe hun tsao-tsao makhange chingcha ngwotnui zing; olwot ma sok azom ilaxle okhao ma chakjang le zing.

⁷Chixe hun thuplaxle ozang füikya zünmok anyi zing,

⁸ija zünmok anyi a chingcha ngwotnui ozong atale dan ang zing. Chixe zünmok ibu a chingcha ngwotnui füi alyenle tuita ang achangle zing.

⁹Ija ozang füikya zünmok anyie chingcha ngwotnui okhochi ma tata füi asaole thüne hule dan ilaxle ija to ozang pünkyae o-le chang.

¹⁰Chixe akasia pün makhange tsap tuita zing, olwot ma sok azom, okhao ma sok tuita ilaxle ochuak ma sok anyi.

¹¹Chixe ija to hun tsao-tsao füi chwop tamchu okax-okho komle kox.

¹²Chixe chakbap tukux khaokya jankan tuita zing ilaxle ija to hun füi okax komle kox.

¹³Ija azya angkya hanpakma chixe hun makhange oka ali zing ilaxle ibu ozong ali akhople apüt. Ibu a ochabu füi tangtho-tangthole apüt.

¹⁴Tsap azya angkya hanpakma dang zwot angkya okabu jankan hama apütle kox.

¹⁵Akasia pün füi chixe thongbu zing ilaxle ibu to hun füi chwop.

¹⁶Tsap ma lax ang chixe hun tsaotsao makhange chixe khopkhua-wansabu zing: khua, wansa, pe, tikkhe, ibu pangwüi grepti-ju tö koxpong ma lax ang zing.

¹⁷Lotsap chixe hun tsaotsao füi zing. Ija ochifa hia othün chixe hun füi thuple müile zing. Ija aza-apua angkya maipua, osok hia opua füikyabu, ija tomplo ma wüi zaile-kox.

¹⁸Ija a azok ma afakle zing, kaopong ma azom pong.

¹⁹Ofak azok pangwüi ma aza-apuale maipua azom tüikya. Ibu maipua a osok hia maipua chakbu füi almon puale ngokya ningle tüikya.

²⁰Lotsap tomplo ma osok hia maipua chakbu füi almon puale ngokya ningle aza-apuale maipua ali tüikya.

²¹Ofak oshem azom ofang ma tyale osok tuipong tüikya.

²²Osokbu, okangbu ilaxle lotsap, ibu pangwüi hun tsaotsao odwon tuita makhange thuple zing.

²³Chixe lotsap anüt ma dan ang wüntikbu anüt zing. Ija angkya khap hia dankhuabu a hun tsaotsao makhange zing.

²⁴Chixe lotsap hia ikhama tüikya tuina pangwüi zing ang hun tsaotsao tuak 35 lax.

²⁵Chixe tö-tsap akasia pün makhange zing, ija a ongan müikya so zok angkya hanpakma. Ija a olwot hia okhao ma sok pong ilaxle ochuak ma sok anyi le komkomle zing. Ozong ali ma tüikya müizong chuwüi ija füi tuita ang alyenle zing.

²⁶Chixe ibu otok to, osam ali pangwüi to, ilaxlechu ija ma tüikya müizongbu, ibu pangwüi to hun füi chwop ilaxle hun füi wüi okaxbu komle kox.

²⁷Ija nwon angkya hanpakma chixe hun füi oka anyi zing ilaxle ibu fangchi angkya kaxkom ma atale akale kox ilaxle ijama azya angkya dang zwot.

²⁸Chixe ibu dang akasia pün füi zing ilaxle ibu to hun füi chwople kox.

²⁹Chixe atsao ang li angkya otsao münga chuwüi zing ilaxle ongan müikya münga ningle awutlaxle ongan müikya so chuwüi chixe zing.