Read Wancho Naga Laipao 38 Bible Online

Laipao 38 - Wancho Naga bible

Laipao 38

¹Tö zokle ashun angkya hanpakma chixe akasia pün makhange tö-tsap tuita zing. Ija a olwot hia okhao ma tomwüi, fakta sokta pong, ochuak ma sok azom.

²Tötsap füi lyenta ang achang ang chixe ozongkhing ali afikle okho ma müizong ningle onüi lwotle zingle tox.

³Chixe tö-tsap ma lax angkya mwot-kat ibibi komle zing: khuakhaobu, hok-khuabu, khuatsumbu, jankuixbu, ilaxle wüntak khuakhao ibu pangwüi. Ibu tuina pangwüi wi füi zing.

⁴Chixe wi makhange achukle jaokya tuita zing ilaxle ija a tö-tsap angkya jankan fang ma dan, ile changkox tix ijae tö-tsap tantiwa hato alople chang angkya chang koxle.

⁵Nwonle aham angkya hanpakma chixe oka ali zing ilaxle ibu zongkhing ali afikle dan.

⁶Chixe azya angkya dang akasia pün füi zing ilaxle ija to wi füi chwop.

⁷Tötsap pangnu chikao angkya oka ma ibu sho. Tötsap a atsumtsumle kaxkombu füi zing.

⁸JOWANPA womle tüikya Nyihom fülom ma thothanu ang ngokyabu kux süntsing makhange chixe wi füi khuatsum tuita tamchu ija chifün ang wi makhange wüi dan angkya nui zing.

⁹JOWANPA Ngwotnui Nyihom hanpakma chixe jaknyi füi tuklaxle nuimong zing. Shuathong chikao ma tuknyi a faktsa anyi lole tüikya.

¹⁰Ija to wi thong tsa hia ibu chifün ang wi jankhao tsa tüikya. Jankuix hia jantombu a khop-jan füi zingle tüikya.

¹¹Shuathongchi ma chuwüi ityatyale zazüibu tüikya.

¹²Hannopchi ma fakbün ata lokya tuknyi tüikya; ibu a thong bün ilaxle ibu athong angkya jankhao bün üntoxle khop-jan füi zingkya jankuix hia jantombu tüikya.

¹³Fülom zongma handün chikao ma zazüibu a fak bün-anyi khaole tüikya.

¹⁴Fülom pangnyi chima wüi tuknyi fak azok okao pong lole, thong azom hia ija chifün ang jankhao azom füi tüikya.

¹⁶Katuk akhople tüikya tuknyi pangwüi a jaknyi füi zingkyakya wüi.

¹⁷Thongbu dan angkya chifün a wi füi zingkyabu. Jankuix, jantom hia thongkho ma chwop angkyabu pangwüi khop-jan füi zing. Katuk akhople tüikya thongbu pangwüi khop jantom füi apongle tüikya.

¹⁸Katuk angkya fülom ma lax angkya tuknyi a nakle-nakle hingkya, zikhik hia muzi akhikya füi takle zingkya, zi füi swotle singlaxle aza-apuale tüikya jaknyi changkya. Ija a zazüibu angkya tuknyi ningle fak ali okao olwot ilaxle ochuak fakta le tüikya.

¹⁹Ija a thong ali hia ija chifünbu füi nwonle tüikya. Ija ma tüikya jankuixbu, thongkho ma chwopkya üntoxle jantom, ibu a wi-jan füi zingle tüikya.

²⁰Nyihom angkya lakbu pangwüi tamchu akhople tüikya zazüibu a wi-jan füi zingle tüikya.

²¹Kaxtom Bün zale tüikya longkhao anyi shole thomkya JOWANPA Ngwotnui Nyihom zing ma laxkya tuinabu ibibile changle. Tuinabu a Mosa-e adangle fakya laxkya ningle ikoxlechu zingkya a Nguapa Arun sasün Ithamar-e adangle fakya ma Liwi hwome zingkya changle.

²²Judah homjen angkya Hur hosu, Uri sasün Bezali JOWANPA Kaxtom ma tüikya lailaile pangnusa zing.

²³Chix to fongmix Oholiab, owa Dan homjen angkya Ahisamak sasün changkya hex, chix a tuita pün müile zingkya tamchu nakle-nakle hingkya zi, zikhik hia muzi akhikya füi takle zingkya jaknyi changkya.

²⁴Ija otsao Nyihom ma lax ang JOWANPA ang atsaole koxkya hun pangwüi onok ziathop ma thütkya ma otuak hajat jao tüikya.

²⁵Khünak huak akiak laxle saikya khopjan khix a onok ziathop ma thüt koxle otuak ma 3430 bang.

²⁶Ibibi a khünak huak akiak pongma womkya, zangtsa makhange thakchichi, 603, 550 lüka sühuake onok ziathop ma thütle bekah tuipong koxkya changle.

²⁷Othom kha angkya khop-jan tuak 3400 füi Otsao Nyihom angkya thong chifün jankhao 100 ilaxle tuknyibu bün angkya okabu zing ang lax. Chifün tuipong to tuak 34 pong süt.

²⁸Atale tüikya khop-jan tuak 30 füi Bezalel-e jantombu, thongbu hanpakma jankuixbu ilaxlechu ibu to okho ma chwopkyabu ang lax.

²⁹JOWANPA ang atsaole koxkya wi-jan pangwüi otuak ma 2425 tuak süt.

³⁰Ija füi chixe JOWANPA Ngwotnui Nyihom fülom hanpakma chifünbu ang zing, wi achukle jaokya füi wi-jan tö-tsap zing tamchu tö-tsap ma laxli mwot-kat pangwüi zing.

³¹Ikhama kahak hia kapoxbu pangwüi ilaxle Nyihom ma laxkya lakbu pangwüi tamchu akhople zazüibu zing.