Read Wancho Naga Laipao 39 Bible Online

Laipao 39 - Wancho Naga bible

Laipao 39

¹Nguapabue Otsao Nui ma Zang thothale changpongma lax angkya hanpakma zinak-naksa, anatle khikya zi hia muzi akhikya füi takle tüle müikya jaknyi nyiwun zing. Mosa hama akaxkya JOWANPA Kaxtom tüikya ningle hwome Arun hanpak ang nguapa nyiwun zing.

²Hwome Suakwex-nyi a, natle khikya zi, khikya muzi, hun zi, ibu müikya jaknyi tak.

³Hwome hun thuple akhao ilaxle ija a zinaknaksa, zikhik hia muzi akhikya, ibu füi awonle müikya jaknyi tak ang atsi.

⁴Hwome Suakwex-nyi ma lax ang suakbüi nyi anyi zing ilaxle ija kople thom angkya hanpakma otua ma akale asha.

⁵Ija zi tuitata makhange wüi müile takle zingkya züpak Suakwex-nyi ma akale koxkya tokhange ija a tuita ma alyenkya ang achang; ile mok angkya Mosa füi akaxkya a JOWANPA Kaxtom changkya.

⁶Hwome karnelian long achwon laxle hun ma apütle kox; ibu a Jako sasün hwom 12 mün ma zingmanle nyilo ma apütle kox.

⁷JOWANPAe Mosa ang fakya kaxtom ningle Israel homjen 12 mün thom angkya hanpakma hwome Suakwex-nyi ibu angkya suakbüi ma apütle kox.

⁸Hwome Suakwex-nyi füi alyenle zi tuitata füi wüi tamchu talailaile zi füi aza-apuale suakbüi sing.

⁹Ija a olwot-okhao ma tomwüi, supong-supong, ilaxle adople sing.

¹⁰Hwome ijama thalix long olom ali ma apüt; pongwang angkya olom ma hwome rubi, topaz hia khikya-longfixfax tuipong apüt.

¹¹Anyi-lükya olom ma emarel, safir hia thalix-long, ibu apüt.

¹²Olom azom lükya ma tarquis, agate hia amethis long, ibu apüt.

¹³Tsyen ali lükya ma baril, karnelian hia jaspar long. Ibu apüt. Ibu pangwüi apüt angkya ohom ang hun zing.

¹⁴Israel homjen pangwüi mün thom angkya Jakop sasün hwom 12 tüikya mixhuak tuipong mün ma longtom tuipong, pangwüi athütle longtom 12 ijama apüt.

¹⁵Thünkhuxchwop nyi hanpakma hwome hun makhange zu anyi alople oka anyi zing.

¹⁶Hwome hun makhange oka anyi zinglaxle thünkhuxchwop nyi angkya thakchikao oka füi asople aka angkya hun füi oka anyi zing.

¹⁷Hwome hun janbüi anyi oka anyi ma aka.

¹⁸Kaochi zitua a oka anyi tüikya füi akale kox, ile hwome ibu Suakwex-nyi angkya suaklwop nyi thünthochi ma apütle kox.

¹⁹Hwome hun makhange oka anyi zing ilaxle ibu a suaklwop-nyi fangchikao ozong ma, Suakwex-nyi omong chikao otua ma apütle kox.

²⁰Hwome tamchatlechu hun oka anyi zing ilaxle ibu a Suakwex-nyi angkya suaklwop nyi fangchikao thünthochi opong ma tamchu osün müile takle zingkya züpak zongma thakchikao ma apütle kox.

²¹JOWANPAe Mosa ang kaxtom koxkya ningle, zinaknaksa füi hwome thünkhuxchwop nyi angkya okabu Suakwex-nyi angkya jankabu ma akale kox. Ija a thünkhuxchwop nyi chidütle züpak thakma atale ngo angkya hanpakmale hwome ile mok.

²²Suakwex-nyi fang ma tüikya zu a komkaile zihing füi zingkya changle.

²³Khang shotnui a kyetle chipao angkya hanpakma takkya nyi füi otua komle sing.

²⁴JOWANPAe Mosa ang kaxtom koxkya lailaile, chithongchi otua akhople hwome jaknyi makhange pomegrenetbu tamchu nakle hingkya hia muzi akhikya, hun tsaotsao füi zingkya lingchip füi adaole apüt.

²⁷Hwome Arun hia chix sasün hwom hanpakma nyipongbu zing.

²⁸JOWANPAe Mosa ang kaxtom koxkya lailaile hwome khang-ngüi-nyi, khüsünbu, fang ma laxkya jaknyi,

²⁹üntoxle nakle hingkya, natle khikya hia akhikya muzi füi aza-apuale singkya jaknyi füi hwome nyikhak zing.

³⁰Hwome hun makhange atsaole koxkya otsao münwan ang tuiza-nakom tüzing ilaxle ija ma hwome “Ija a JOWANPA ang atsaole koxpu”, le zakya apütle zingkya.

³¹JOWANPAe Mosa füi akaxkya ningle, hwome ija khang-ngüi-nyi thünkhuxchi ma hingkya zu füi amongle kox.

³²Oshukma JOWANPA ngwotnui Nyihom angkya mwot tsuakle hüi. Israel khünakbue pangwüi JOWANPAe Mosa ang kaxtom koxkya lailaile zingle alai.

³³Hwome ija Nyihom Mosa hato apüi; ijama laxli tuina, jankuixbu, kapoxbu, panglangbu, thongbu, thong chifünbu, ibu pangwüi hwome apüi;

³⁴chunla khwon namkhile azandaokya, Nyihom chwopnyi; müikya müikhwon chwopnyi; jali tsyenle tukkya tuknyi;

³⁵longkhao anyi füikya Tsaotsüt Suak, ija dang hia okahux, ibu;

³⁶tsap ilaxle ija ma tüikya tuina pangwüi, ilaxle Zang ang tö koxkya ankhao;

³⁷hun füi zingkya lotsap hia wüntikbu, tamchu ija ma laxlili pangwüi, ilaxlechu wüntik ma lax angkya wünti;

³⁸hun tö-tsap; li angkya münga, ongan müikya so, Nyihom fülom ma lax angkya tuknyi;

³⁹wi-jan achukle jaokya füikya wi-jan tö-tsap, ija dang hia ija ma laxlili tuinabu pangwüi; cha-chak so ang tilax angkya khuatsum hia ija dan angkya chifün;

⁴⁰zazüibu ma lax angkya tuknyibu, ija thong hia chifünbu; zazüibu fülom ma lax angkya tuknyi hia ija to kha angkya zubu; Nyihom hanpak ang lakbu; Nyihom ma laxlili tuina komkaile;

⁴¹Otsao Nui ma lax angkya tüle müikya nguapabu nyilo: Arun hia chix sasün hwom hanpakma.

⁴²JOWANPAe Mosa ang kaxtom koxkya ningle Israel khünakbue mwot pangwüi tsuak.

⁴³Pangwüi to Mosa-e hule wan ilaxle JOWANPAe chix ang koxkya kaxtom lailaile zingkya ngünlaxle Mosa-e pangwüi to mohiman.