Read Wancho Naga Laipao 40 Bible Online

Laipao 40 - Wancho Naga bible

Laipao 40

¹JOWANPAe Mosa ang thüi:

²“Owang angkya lyetnu pongwang nyi JOWANPA Ngwotnui Nyihom zinglax.

³Ija ma Kaxtom Bün shole thomkya Tsaotsüt Suak danlax ilaxle ija thünthochi ma tuknyi danlax.

⁴Tsap anoplax ilaxle ima laxse tuina oding ma danlax. Ilaxle lotsapchu apüilax ilaxle ima wüntikbu danlax.

⁵Tsaotsüt tunthoma ongan müikya so zokle tö kox angkya tö-tsap dankox ilaxle Nyihom fülom angkya tuknyi ashakox.

⁶Nyihom homtho ma zokle ashunle kox angkya tö-tsap dankox.

⁷Tilax angkya khuatsum a Nyihom hia tö-tsap nyi tanti ma dankox ilaxle ija ti füi awang kox.

⁸Nyihom akhople tüikya zazüibu zingle alaikox ilaxle tuknyi a ija fülom ma dankox.

⁹“Ifüima Nyihom hia ima tüikya tuinabu pangwüi otsao münga füi lile atsao koxle Zang ang fünle laxkox, ija ma ija a otsao ang changüi.

¹⁰Ifüima, tö-tsap hia ima tüikya tuina bakle münga füi lile otsao ang achang kox. Ifüima ibu komkaile otsao ang changüi.

¹¹Anaole chu tilax khuatsum hia ija dan angkya chifünbu ilailaile wüi atsaokox.

¹²“Arun hia chix sasün hwom Nyihom fülom to apüikox, ilaxle hwom ang zomti ajo ang laxkox.

¹³Arun ang nguapa nyilo apongle laxkox, chix to münga füi lile atsao koxle Zang thotha ang süile dankox, ikoxle tix chixe nguapa tuita ningle ku mwot mok ang thoüi.

¹⁴Sasün hwom chuwüi apüikox ilaxle hwom angchu nyilo apongle laxkox.

¹⁵Münga füi lile hopa atsaokya lailaile hwom to chuwüi lile atsaokox; ile changkox tix hwome nguapabu ningle ku thothale chang ang thoüi. Ija münga füi lile atsaokyae hwom ojento athax füichi hanpak angchu nguapabu ang achangle ngo ang tomüi.”

¹⁶JOWANPA kaxtom lailaile Mosa-e pangwüi mokle alai.

¹⁷Ile hwome Ijip chaxwan danle toxkya füima zanglao anyi lükya to owang lükya lyetnukua pongwang nyixkha, JOWANPA Ngwotnui Nyihom ajongkya mwot tsuak.

¹⁸Mosa-e ija ang chifünbu dan, ija ma kaxkombu zing, ija angkya panglangbu asop-apong ilaxle ija angkya thongbu ajong.

¹⁹Chwopnyi füi chixe Nyihom to chwop ilaxle otok angkya chwopnyie ija tok to chwop. Ibu a JOWANPAe kaxtom fakya lailaile mok.

²⁰Ifüima chixe longkhao anyi kop ilaxle Tsaotsüt Suak mong ma sho. Chixe ija Suak angkya okabu ma dangbu hia ija ohux apütle kox.

²¹Ifüima chixe ija Suak Nyihom ma dan ilaxle abax angkya tuknyi asha. Ija ningle chixe Tsaotsüt Suak ziakople thom. Ijachu JOWANPA kaxtom lailaile wüi changkya.

²²Chixe tsap Nyihom ma dan, ija a shuakux chima tuknyi zongma homthochi ma dan.

²³Ija ma JOWANPA ang tö koxkya an dan; ija chuwüi JOWANPA kaxtom lailaile chang.

²⁴JOWANPA Kaxtom lailaile chixe lotsap Nyihom ma chithongchi ma tsap füi asaole dan.

²⁵JOWANPA Ngwotnui Nyihom ma, Mosa ang JOWANPAe kaxtom koxkya lailaile chixe wüntikbu atsop.

²⁶Khünaknu asoxkya Nyihom angkya tuknyi tunthoma chixe hun füi zingkya tö-tsap dan.

²⁷JOWANPAe kaxtom koxkya lailaile ija ma ongan müikya so zokle tö kox.

²⁸Chixe Nyihom fülom hanpak ang tuknyi chuwüi apüt.

²⁹Zangshwom ang khünaknu asoxkya Nyihom tunthoma chixe zokle tö kox angkya tö-tsap zing, ilaxle JOWANPAe Mosa ang fakya kaxtom lailaile ija ma zokle ashunkya hia saxziak tö kox.

³⁰Zangshwom ang khünaknu asoxkya Nyihom hia tö-tsap nyi bama chixe tilax khuatsum dan, ilaxle tsuxkya ma lax angkya hanpakma chixe ija ma ti je.

³¹Ija füi Mosa hia Arun tamchu sasün hwome cha-chakbu tsux.

³²Chemtue hwom Zangshwom ang khünaknu asoxkya Nyihom to paopuix, ilaxle chemtue hwom tö-tsap hato hüipuix, JOWANPAe Mosa ang kaxtom koxkya lailaile hwome cha-chakbu tsux.

³³Zangshwom ang khünaknu asoxkya Nyihom hia tö-tsap akhople hwome khwa zing, ilaxle ija khwa zünkai ma hwome tuknyi tin. Ija ningle Mosa-e mwot pangnusa tsuakle hüi.

³⁴Ifüima Zangshwom ang khünaknu asoxkya Nyihom to zangfwom füi chwop, ilaxle JOWANPA fuazangkyae ija Nyihom awang.

³⁵Ikha awangle zangfwome ole tüikya khoma Mosa, Zangshwom ang khünaknu asoxkya Nyihom to ngui ang chithole chang, tamchu Nyihom a JOWANPA fuazangkyae awangle ngo.

³⁶Chemtue ija Nyihom angkya zangfwom ding to dünle changpuix, Israel khünaknu ikha angkya achexle pao ang süt.

³⁷Ikoxlechu zangfwom ding to dünkya chitüi thüiningle, ikha angkya zangfwom ding to nwonle madün-madünle hwom onui angkya chiachex.

³⁸Chemthüikoxle anyixningle zangshwomnui Nyihom ma JOWANPA zangfwom chipaole ngonui, ilaxle zangnaknak ma ija zangfwom a wün ningle achang. Israel khünaknue iningle changkya hwom achexle ahamkya dang to ngünle hüi.