Read Wancho Naga Laipao 6 Bible Online

Laipao 6 - Wancho Naga bible

Laipao 6

¹Ifüima JOWANPAe Mosa ang thüi: “Athaxpi kue wanghom to chemle moküihex nange ija ngüntu nguipu. Ku khünaknu danle apao angkya kue chix atsangüi. Otsingtomtata ma ija haxtok angkya hwom paoünle tom angkya kue chix atsangüi.”

²JOWANPAe Mosa füi akaxle thüi: “Ku a JOWANPA changle.

³Abraham, Isak hia Jakop hwom hato, ku tuita Khüthak Zang changpule ngaile ahopu, ikoxle kue JOWANPA ku otsao mün hwom ang awan ang chitom.

⁴Kue hwom füi tsaotsüt zingle, ami hwom mixnok wünpa ningle ngole hüikya Kanan haxtok hwom ang koxüihex-ole tsaosaxpu.

⁵Athaxpi kue Israel khünaknu, Ijip noke da mwot amokle sikangünkya zoshune wotkya zing kue atatdaoa ilaxle kue ku Tsaotsüt texle atakpu.

⁶Ija daile Israel khünaknu ang, kue hwom ang thüile le thüikox, ‘Ku a JOWANPA changpu. Hünzom Ijip nok da ang achangle ngokya chak tokya kue danüi. Kue tüle tsak-zong füikya ku chak makhange hwom hato khomtsikya sikngün apüiüi ilaxle kue hünzom khosünüi.

⁷Kue hünzom ku khünaknu ang achangüi ilaxle ku a hünzom Zang ang ngoüi. Chemtue kue hünzom Ijip nok da ang ngokya chak tokya danle changüihex, ipongma hünzome ku a JOWANPA hünzom Zang changpule awan ang kopüi.

⁸Abraham, Isak hia Jakop hwom ang koxüihex-ole tsaokya haxtok to kue hünzom apüiüi; ilaxle kue ijakha ma haxtok ang lax ang hünzom chak to koxüi. Ku a JOWANPA changle.’”

⁹Mosa-e ibibi zangwün Israel nok hama ngai, ikoxlechu chix kax to hwome ojao chiapa, chemthüikoxle atsangle da mwot mok angkya tomkya makhange hwom ang khangkho sam.

¹⁰Ifüima JOWANPAe Mosa ang thüi:

¹¹“Ijip nok wanghompa hato paolaxle, chixe chix chaxwan angkya Israel khünaknu danle apao angkya wüi changle, le akaxkox.”

¹²Ikoxle Mosa-e lan: “Israel khünaknue ngaxchu ku kax to na müntha, wanghompa-e ning chem apa angkya? Ku a zangwün chimankya mix tuita namchang.”

¹³JOWANPAe Mosa hia Arun nyi ang thüi: “Israel khünaknu tamchu wanghompa hama, hünzom a kue Ijip nok haxtok angkya Israel khünakbu alaile pao angkya lompa ang kamdaoale thüikox.”

¹⁴Reuben, Jakop sasün tüichongpa ang sasün hwom ali tüikya: Hanok, Pallu, Hezron, ilaxle Karmi hwom bibi. Ibu a hwom mün laxle tüikya homjen hwom putong changkya.

¹⁵Simeon ang sasün hwom azok tüikya: Jemuel, Jamin, Ohad, Jakin, Zohar, üntoxle Kanancha sasün Shaul hwom bibi. Ibu a hwom mün laxle tüikya homjen hwom putongbu changkya.

¹⁶Liwi ang sasün hwom azom tüikya: Gershon, Kohath, ilaxle Merari; ibu a hwom mün laxle tüikya homjen hwom putong changkya. Liwi a zanglao 137 tsünlo-khothole ngo.

¹⁷Gershon ang sasün anyi tüikya: Libni hia Shimei nyi, ilaxle hwom ang sixlibu huanuma tüikya.

¹⁸Kohath ang sasün hwom ali tüikya: Amram, Izhar, Hebron, üntoxle Uzziel. Kohath a 133 zanglao tsünlo-khothole ngo.

¹⁹Merari ang sasün anyi tüikya: Mahli hia Mushi nyi. Ibu a Liwi hia hwom sixlibu putong changle.

²⁰Amram-e hopa nanao füi tuiju-nasomle chang. She-e Amram ang Arun hia Mosa nyi puxle kox. Amram a 137 zanglao tsünlo-khothole ngo.

²¹Izhar ang sasün azom tüikya: Korah, Nefeg, üntoxle Zikri hwom bibi.

²²Uzziel ang chuwüi sasün azom tüikya: Mishael, Elzafan, üntoxle Sithri hwom bibi.

²³Arun-e Elishebah lax. She a Nahshon nanao Aminadab sasün changkya. She-e chix ang Nadap, Abihu, Eliazar hia Ethamar hwom bibi puxle kox.

²⁴Korah ang sasün azom tüikya: Assir, Elkanah, üntoxle Abiasaf hwom bibi. Hwom a Korah makhange hüikya ma saxthomthom putong hwom changkya.

²⁵Arun sasün Eliazar-e Putiel sacha lax. She-e chix ang Finehas puxle kox. Ibibi a Liwi saxthom hia homjenbu konu tüichong homkha changkya.

²⁶JOWANPAe Ijip nok tokya Israel khünaknu alaile pao ang akaxkya mixsün anyi a Arun hia Mosa nyi changkya.

²⁷Okhi a Ijip nok wanghompa hato nguilaxle Israel khünakbu dan angkya kax koxkya nyi changkya.

²⁸Chemtue Ijip nok to JOWANPAe Mosa füi zangwünle changpuix,

²⁹ijama chixe thüi: “Ku a JOWANPA changle. Nang füi kue akax daokyabu pangwüi nange chix hama wünle laxkox.”

³⁰Ikoxlechu Mosa-e lan: “Ku a tsaidong-kaxdongkya mix münchangle nange awan ngopu. Wanghompa-e ku kax to chemle apaüi?”