Read Wancho Naga Laipao 7 Bible Online

Laipao 7 - Wancho Naga bible

Laipao 7

¹JOWANPAe thüi: “Wanghompa zongto nang a kue Zang ningle achangüi. Hüntüi Arun-e ajepa tuita ningle nang zangwün chix hama komkaile taile koxüi.

²Ku kaxtom pangwüi Arun hama wünle laxkox. Israel khünakbue chix haxtok danle toxlaxle laile pao angkya chixe wanghompa hama akaxüi.

³Ikoxlechu kue wanghompa a ija kax ma ojao chilax angkya hanpakma tüle mongtsak ang tomüi. Kue Ijip nok to tüta ningkya za-adünkya mwot mokkoxle chu chixe nang kax to chiapale tüiüi. Ifüima kue Ijip nok hato tüle za-adünkya thama apüi ang tomüi, ilaxle tix ija haxtok angkya ku khünaknu laile pao ang tomüi.

⁵Ile hwom zan to kale ku chak nwonlaxle ija haxtok angkya Israel khünaknu laile pao ang tomkya zuma Ijip noke ku a JOWANPA changle le awanle lax ang kopüi.”

⁶Mosa hia Arun nyie JOWANPA kaxtom ningle mok.

⁷Okhie wanghompa füi ija zangwün apüi pongma Mosa zanglao 80 ilaxle Arun zanglao a 83 le changkya.

⁸Mosa hia Arun nyi füi JOWANPAe akaxle thüi:

⁹“Hünkhi kax otsingtsing chichang hia changpuix, ija awan ang ohünotün mwot mokle ahohu, le wanghompa-e namthüiba, Arun ang chix kiathox laxlaxle ija wanghompa tuntho to awüt ang tomkox. Ijama ija kiathox a pu ang achangüi.”

¹⁰Ikhoma Mosa hia Arun nyie wanghompa hato nguilaxle JOWANPAe akaxkya lailaile mok. Arun-e chix kiathox wanghompa hia chix wangshembu tuntho to tswonle awüt. Ijama ija kiathox pu tuita ang achang.

¹¹Ifüima wanghompa-e chix khünak hing twonmixbu nyak; ibue chuwüi hwom chajik-muashem tsak-zong makhange ija lailaile mokle aho.

¹²Ibue hwom kiathoxbu hax to tswonle awüt, ikoxle ibu a pu ang achang. Ikoxlechu Arun kiathoxe ibu bakle ling.

¹³Ile changkya ngünkoxle chu wanghompa mong tsakle wüi ngo. JOWANPAe akax daokya lailaile wanghompa-e Mosa hia Arun nyi kax to najao chitha.

¹⁴Ifüima JOWANPAe Mosa ang thüi: “Wanghompa ang mong tüle tsakle ilaxle chixe khünaknu a laile pao ang mündan.

¹⁵Idaile swomsae chix Nail shuanu to jupongma chix füi apongle changhu. Oja kiathox pu ang achangkya hex ija koplax, üntoxle shuanu kax ma chix tanle nuikox.

¹⁶Ijama wanghompa füi akaxlax, ‘JOWANPA Ibri nok Zang-e, chix khünakbu pao ang dan koxle akax ang tomle ahüikya changa. Nange danle pao ang tomkox tix hwome faokhato chix to shwom ang thoüi. Ija kax to nange athaxkople chiapa.

¹⁷Athax a, O chongwangpa, JOWANPAe nang ang thüile, chixe mokkya mwot makhange, nange chix owa changkya hex ija awan ang kopüi. Hulax, ija kiathox füi kue ti to fitüi ilaxle ti a aji ang achangle paoüi.

¹⁸Ti kha angkya nyaxbu ziüi ilaxle Ijip noke ikha angkya ti ling ang chimüile shua-a tüle nomüi.’”

¹⁹JOWANPAe Mosa ang thüi: “Ija kiathox lax üntoxle Ijip nok ma tüikya shuajen, tilom tamchu tüküi ibu pangnu thakma nwonkox. Ti pangwüi aji ang achangüi. Chaxwan pangnu khatokya tize hia tikkuxbu ngaxchu pangwüi ajie awangle changüi.”

²⁰Mosa hia Arun nyie JOWANPA kaxtom ningle mok. Wanghompa hia chix wangshembu pangnu tunthoma Arun-e chix kiathox nwon ilaxle shuanu angkya ti thün to fit ikoxle ikha angkya ti bakle aji ang achang.

²¹Shuakha angkya nyax zile pao. Shuakha tüle nomle changkya khoma Ijip nok owaechu ikha angkya ti chiling. Ijip nok pangnu khato wüi aji tata ajie awang.

²²Ifüima wanghompa hingtwon mixbuechu hwom chajik-muashem tsak-zong makhange ile wüi mokle aho. Ija ngünlaxle wanghompa ang mongtsakle pao. Ija a JOWANPAe, wanghompa Mosa hia Arun nyi kax ma chilaxle tüi angkya akaxkya ningle chang.

²³Itülüi ija hokhi zangwün to na ojao chithale homchi to chat.

²⁴Ijip nok pangnusae shuakax fole ti lax ang tüküi thole dan; chemthüikoxle hwome shua angkya ti lax ang chimüi.

²⁵Nyix anüt füima JOWANPAe shua to fit.