Read Wancho Naga Laipao 8 Bible Online

Laipao 8 - Wancho Naga bible

Laipao 8

¹Ifüima JOWANPAe Mosa ang thüi: “Wanghompa hato paokox ilaxle JOWANPAe ile akax tüiale thüikox, ‘Ku khünakbu ku shwom ang pao ang dankox.

²Nange ile münchangüile jangthüiba, kua nang haxtok ma hünzom to sikangün ang luk awangle alaiüi.

³Nail shuanue luk awangle alaiüi, ibu hünzom homkhato, jiplya-fyensa to, hünzom dabu hom to ilaxle khünakbu ding to, ilaxle hünzom fongkha to üntoxle tik pangwüi khato lukluk wüi awangle changüi.

⁴Luknubu a nang ding to, nang khünakbu ding to tamchu nang dabu ding to, nang homkha awangle nguiüi.’”

⁵JOWANPAe Mosa ang thüi: “Shuanubu ding to, shuasabu ding to, tüküibu ding to chix chak angkya kiathox ahale chak tin angkya Arun füi akaxkox; ifüima Ijip haxtok luke awangle changüi.”

⁶Ikhoma Arun-e Ijip haxtok ma tüikya ti pangnu ding to kiathox füi ma chak thüi; ilaxle ibu khatokya luknubu laile Ijip haxtok awang.

⁷Hing twonkya khünakbuechu hwom chajik-muashem tsak-zong makhange Ijip haxtok awangle luk alai.

⁸Ifüima Farao-e Mosa hia Arun nyi sele apüi, ilaxle thüi: “Ibu luk apao ang JOWANPA to jopkox; kue chix ang tö kox angkya hanpakma hünzom khünakbu pao ang danüi.”

⁹Mosa-e lan: “Hünzom hanpakma zangjop angkya to ku ang mongmüile. Nang hanpakma, nang wangshembu hanpakma tamchu nang khünakbu hanpakma kue chemtue jople kox angkya, hanpak tyale fahüi. Ile chang füima tix hünzom luk füi atsai ang kopüi. Ifüima luk a Nail shuanu ma ngokya boma ojongtochu münngoüi.”

¹⁰Ifüima wanghompa-e lan: “Ku hanpakma ngainyix jop-hüi.” Mosa-e lan: “Nange akaxkya ningle kue jopüi, ifüima JOWANPA kwom Zang ningkya owachu müntüile nange awan ang kopüi.

¹¹Nang, nang wangshembu tamchu nang khünakbu pangwüi luk füi atsai ang kopüi, ilaxle Luk a Nail shuanu boma mama ojongkha tochu münngoüi.”

¹²Ifüima Mosa hia Arun nyi wanghompa ha angkya achexle pao. Ifüima chixe alaikya, wanghompa angkya lukbu pao angkya hanpakma Mosa-e JOWANPA to jop.

¹³Mosa-e jopkya ningle JOWANPAe mok, ilaxle wanghom khwa ma tamchu homtho to tüikya lukbu zile pao.

¹⁴Ijip noke ibu tswonle jongta khama afox, ilaxle chaxwan jaojao idu nomkyae awang.

¹⁵Chemtue luk zile komkya füima fün müile changpuix, JOWANPA kax ningle wanghompa ang mongtsak. Chixe Mosa hia Arun nyi zangwün to ojao na chithale achat.

¹⁶JOWANPAe Mosa ang thüi: “Arun ang, chix chak angkya kiathox füi hax to fit ang tomkox, ijama Ijip haxtok angkya haxbu pangwüi hitsik ang achangüi.”

¹⁷Arun-e chix kiathox füi hax to fit. Ijip haxtok angkya haxbu pangwüi hitsik ang achang. Khünak hia müi pangwüi to u.

¹⁸Hing twonmixbue hwom chajik-muashem tsak-zong füi hitsik alai ang azong ikoxlechu chitho. Athaxpi pangnu khato hitsike awang.

¹⁹Hing twonmixbue wanghompa ang thüi: “Ija a Zang mwot wüi changle!” Ikoxlechu JOWANPAe akax daokya ningle wanghom ang mongtsak ilaxle Mosa hia Arun nyi kax to ojao na chitha.

²⁰JOWANPAe Mosa ang thüi: “Ngainop swomsae wanghompa shua to jupongma chix füi apongkox ilaxle chix ang thüikox, ‘Chix to shwom angkya hanpakma JOWANPAe chix khünakbu dankox lüta.

²¹Nange ija kax chiapa jangthüiba, chixe hwotbu alaiüi, ilaxle nang to, nang wangshembu to tamchu nang khünakbu pangwüi to sikngün ang tomüi lüta. Ijip nok homhax hia chaxwan khao bakle hwot-e awangle changüita.

²²Ikoxlechu chixe Goshen haxsha tsiakle toxüita, chemthüikoxle ikhama chix khünakbu ngokya daile, ikhato hwot chiahüi angkya hanpakma. JOWANPA, chixe ija haxtok ma mwot mokle tüile le awan ang tom angkya hanpakma chixe ile moküita.

²³Chixe nang khünakbu hia chix khünakbu mali-mali ang achangüi lüta. Ija ohünotün mwot a ngainyix wüi changüi lüta.’”

²⁴JOWANPAe wanghom homkha hia chix wangshembu homkhato tüpong-tüpongkya hwotbu hüi ang tom. Ijaningle Ijip haxtok pangnu khato idu hwot makhange thama adün ang tom.

²⁵Ifüima wanghompa-e Mosa hia Arun nyi sele apüilaxle thüi: “Paolax ilaxle ikhato hünzom Zang ang tö koxlax.”

²⁶Mosa-e lan: “Ija ile mokkoxle münasuüi, chemthüikoxle JOWANPA kwom Zang ang kwome müi langle tö koxkya makhange Ijip nok wanlom zongto thaile bangüi. Hwom zongma amakya oja kwome hwom mikngün ma müilang laxle tö koxüihex, ile jangchangba hwome kwom to longfüi thuple langüi.

²⁷Idaile, chix kaxtom tüikya ningle, JOWANPA kwom Zang ang tö kox angkya hanpakma kwom faokhato nyix azom lom to ka angkya changle.”

²⁸Wanghompa-e thüi: “Hünzom tsailo to chipao jangthüiba, kue JOWANPA hünzom Zang ang tö kox ang hünzom danüi. Ku hanpakma jop-hüi.”

²⁹Mosa-e lan: “Ku ikha angkya achexkya füi tomle kue JOWANPA to jopüi ilaxle ngainyix wüi nang, nang wangshembu tamchu nang khünaknu angkya hwot atsai ang tomkoxle thüiüi. Ikoxle kwom tamchatle chidyenüi ilaxle JOWANPA kwom Zang ang tö kox ang pao angkya kwom to chiabaxüi.”

³⁰Wanghom hwom dantoxlaxle Mosa laile pao ilaxle JOWANPA to zangjop.

³¹JOWANPAe Mosa-e jopkya ningle mok. Wanghompa, chix wangshembu tamchu chix khünaknu angkya hwot komkaile pao.

³²Ifüima chuwüi wanghompa ang mong chinai. Chixe Israel khünaknu pao ang chidan.