Read Wancho Naga Laipao 9 Bible Online

Laipao 9 - Wancho Naga bible

Laipao 9

¹JOWANPAe Mosa ang thüi: “Wanghompa hato paokox ilaxle JOWANPA Ibri nok Zang-e ile akaxtüiale thüikox, ‘Ku khünaknu ku ang tö kox ang pao ang dankox.

²Nange chatle chuwüi hwom pao ang chidan thüiningle,

³kue hünzom müi: man, mantsak, ut, maihu, chun hia zwon, ibu pangwüi hato okak-olak ahüile hünzom ang sikangünüi.

⁴Kue Israel nok hia Ijip nok müibu ajatle ahanüi, ilaxle Israel nok müi tuita chu zi ang müntomüi.

⁵Ija mwot mok ang, JOWANPA, kue ngainyixkya zanghannu tyale kopdaoa.’”

⁶Ofüinyix JOWANPAe chix kax manman le mok. Ijip nok müi komkaile lang ikoxle Israel nok müi tuita ngaxchu zi ang chitom.

⁷Wanghompa-e chempangle changpuixle atüikoxle, Israel nok müi tuita ngaxchu chizikya kaxho kop. Ikoxlechu chix ang mong tsakle wüi ngo ilaxle Israel khünaknu pao ang chidan.

⁸Ifüima JOWANPAe Mosa hia Arun nyi ang thüi: “Fongbak angkya labu chakpuix tuita koplaxle Farao tunthoma dingchito ija fule awütkox.

⁹Ijabu a lajuak ang achang laxle Ijip haxtok pangnu khato chiakle paoüi ilaxle ibue pangnu khato wüi tsom hia pam tamchu müi hia mix pangnusa to mak-chakbu alaile changüi.”

¹⁰Ikhoma chakpuix tuita labu koplaxle hokhi a Farao chitong ma ajong. Mosa-e ija ding to atwomle zangwin to tswonle awüt. Ibu füi tsomdong ang tomle müi-hi-mix pangwüi amak ang tom.

¹¹Hing twonmixbu Mosa pomtho to ngui ang chithole chang chemthüikoxle mama Ijip nokbu ningle hwom tochu mak-chake awangle chang.

¹²Ikoxlechu chixe akax daokya ningle JOWANPAe wanghom ang mongtsak ang tom. Ikhoma wanghompa-e Mosa hia Arun nyi zangwün to ojao na chitha.

¹³Ifüima JOWANPAe Mosa ang thüi: “Ngainop swomsae wanghompa füi apongkox ilaxle chix ang thüikox, ‘JOWANPA Ibri nok Zang-e chix khünaknu chix to shwom ang pao ang tomkox ta.

¹⁴Izuma chixe nang wangshembu hia nang khünaknu tata ang sikangünüi münchang ikoxle nang ang chuwüi sikngün ang tomüi, ikoxle tix nange chaxwannu ma chix ninglükya owachu müntüile awan ang kopüi ta.

¹⁵Nang to tamchu nang khünakbu to okak-olak füi fit ang chix chak jangajong thüikoxle hünzom pangwüi olithule changdaose ta.

¹⁶Ikoxlechu chix tsak-zong aho ang tamchu chix mün zangfang pangnu khato fuale naxpao ang nang ozün ma thompu ta.

¹⁷Ikoxle nang athax kople angam laxle chix khünaknu danle chiapao.

¹⁸Ngainyix ipongkhae chixe tüle chongkya junbu düt ang tomüita. Ija a Ijip noke iningkyakya otuechu mangüntoxle chang angkya ta.

¹⁹Athax hünzom tsom-pom hia tuina chempang homtho to tüilaxpuix pangwüi lox-o to adün angkya kax laxkox. Hwom homtho to okhung-okhom chemchu chitüile ngokya khünakbu hia müibu pangwüi ding to ija jun dütle changüi ilaxle hwom a zile paoüi lüta.’”

²⁰JOWANPAe chempangle akax daolaxpuix ibu hanpakma wangshembu züizüi za ilaxle hwome hwom dabu hia müibu lox-o fangto adün.

²¹JOWANPA kax ija to mamabue na ojao chitha ilaxle hwom dabu hia müibu homtho to tox.

²²Ifüima JOWANPAe Mosa ang thüi: “Nang chak ding chito nwonkox, ima Ijip nok haxtok pangnu khato wüi jundütle changüi: khünaknu, müibu hia kotho tokya fum-sui pangwüi to thuple changüi.”

²³Ikhoma Mosa-e chix kiathox dingchito nwon. Ipongma JOWANPAe zang adung ang tomle jun adüt ilaxle hax to zangchang füi hap.

²⁴JOWANPAe jun huanuma wüi düt ang tom. Zangchang tüchi-tüchi kople ajep. Ijip nok pukax ma iningkya chüi-hi-jun otuechu maletoxkya le wün.

²⁵Ijip haxtok pangnu khato wüi ija june kothofa to atüitüi komkaile thomjo. Khünakmixsa hia tsom-pom pangwüi ima wom. Ija zangchei füi kotho tokya pünzua to huanuma thule anguak.

²⁶Jun chidütle Israel khünaknu ngole tüikya kha Goshen haxsha tata panle tox.

²⁷Wanghompa-e Mosa hia Arun nyi sele apüi ilaxle akax: “Izuma kue ochax lyendaoa; JOWANPA wüi sule. Ku tamchu ku khünakbu thaidaoa.

²⁸JOWANPA to jopkox! Chüi-hi-jun ibibi ma wüi nguidaoa! Kue tsaopu, hünzom pao ang danüi; hünzom ikhato ngohom angkya münchang.”

²⁹Mosa-e chix ang thüi: “Ija tingnu angkya laile paokya thüile kue ku chak ajong laxle JOWANPA to zangjopüi. Ifüi tomle zangchei zangwat zaküi ilaxle jundüt chuwüi thwonüi, ikoxle tix chaxwannu a JOWANPA kux changle le hünzome awan ang kopüi.

³⁰Ikoxlechu nang üntoxle nang wangshembue JOWANPA thua münzale kue awanle.”

³¹Mora-zi-pün hia tsaxsa-tula tsax komkaile ama, chemthüikoxle tsaxsa-tula a müntukha asukya ilaxle mora-zi-pün a puatukha asukya.

³²Ikoxlechu tsaxsa-tula sax a sümamünle asule chiama.

³³Wanghompa ha angkya achex laxle Mosa a tingnu angkya laile pao. Chixe chix chak ajong laxle JOWANPA to zangjop. Ifüitomle zangtsak-zangdung hia jundüt thwonthütle zak.

³⁴Chemtue wanghompa-e ile changkya ngünpuix, chix ang chatle chu mong chat. Chix üntoxle chix wangshembu ang amipongkya ningle mongtsak ang süt.

³⁵JOWANPAe Mosa hama wündaokya ningle, wanghompa-e Israel khünakbu a pao ang chitom.