Read Wancho Naga Job 1 Bible Online

Job 1 - Wancho Naga bible

Job 1

¹Jople amünkya mixsün tuita tüikya; chix a Uz nok ma ngokya mixsün tuita. Chixe Zang to shwom ilaxle chix to mongong thom. Chix a müikya khünak tuita changkya. Tütali to thaithaxle chibang angkya hanpakma chix tüle khünzai.

²Chix ang sasün hwom anüt ilaxle sacha hwom azom tüikya.

³Chix ma tuina: chun hajat anüt, ut hajat azom, maihu hajat tuita üntoxle mantsak ho-aga, ibibile tüikya. Chix ang dabu chuwüi huanuma tüikya. Chix a handünchi kao ma saxpu-luawang tuita changkya.

⁴Job sasün hwome tsüilüile tata hom to azutle fongkha laxle saxle ngo. Ija to mamabu pangwüi ngui üntoxle hona-honao hwom azom tüikya chithaile ahyen.

⁵Ile fongkhat füinop chithaile, swomsae kaile zolaxle Job-e sasün hwom pangwüi atsao angkya hanpakma, hwom mixhuak-mixhuak hanpakma tö kox. Hwom khama opupue thüichu chitex-chile le Jowanpa tha-ajaole ochax lyenle changdaotüi angpuix le mongao laxle chixe iningle mok.

⁶Chemtue ozün ma tüikya ding tokyabu JOWANPA tunthoma asox angkya nyix nguile hüipuix, hwom khama Bao womle tüikya.

⁷JOWANPAe chix ma atüi: “Nange chemmok ngokya hex?” Bao-e lan: “Ku a tüjong-tüjong to chaxwannu akhople khuafao ngokya changle.”

⁸JOWANPAe atüile thüi: “Nange ku dapa Job ngünhexcha? Chix ningle mongong füikya üntoxle müikya khünak chaxwannu ma owachu müntüi. Chixe ku to shwomle ilaxle tütali thaithaxle chimok angkya hanpakma chix khünzaile tüile.”

⁹Bao-e lan: “Chixe ile mokkya ma olap chemchu chikop thüikoxle chixe nang to shwomse le a?

¹⁰Othuithuima nange chix khüzün, hwom kako homkha üntoxle chix ma atüitüi pangwüi khosünle thomkoxpu. Chixe amokmok pangwüi to nange mohimanle chang koxpu tamchu chaxwan thün awangle nange chix ang tsom-pom okhonguile fakoxpu.

¹¹Ikoxle athax nange chix ma atüitüi komkaile paole jangchang koxba, ngünthünthünle chixe nang to thuakzomle changüi!”

¹²Jowanpa-e Bao ang thüi: “Ikoxle müiüi. Athax chix ma atüitüi komkaile nang tsak-zong fang ma tüile, ikoxlechu nange Job tompopo to münpo angkya changle.” Ikhoma ikha angkya Bao achexle pao.

¹³Nyixta a Job sasün hwom tüichongpa hom ma fongkhale saxngokya.

¹⁴Kaxhomix tuita zikle nguilaxle Job ang thüi: “Kwome maihupongbu füi hanbaile ngokya changkya; ilaxle mantsakbu chuwüi hozui ma fumtsütle saxngokya.

¹⁵Ipongkhae Sabi nokbu nguilaxle allele kwom to sing üntoxle ibu pangwüi tsui paodaoa. Hwome nang dabu pangwüi langle toxle; ija kaxho nang hato apüi ang ku tata azangle tsuakle.”

¹⁶Chixe ija kaxho ngaxchu ma-ashukba wüi dapa tuita nguilaxle thüi: “Chun-nyetmixbu hia chunbu to zangtsake sütle hwom pangwüi langdaoa. Nang hato ija kaxho apüi fa ang ku tata azangtsuakle.”

¹⁷Chixe ija zangwün ma-ashukba wüi mama dapa tuita nguilaxle thüi: “Kaldi nok zankat othom azome kwom to single hüilaxle utbu pangwüi pao üntoxle nang dabu komkaile langle toxle. Ija kaxho nang hato apüi ang ku tata azangle.”

¹⁸Chix zangwün ngaxchu ma-ashuk tanto wüi mama dapa tuita nguilaxle thüi: “Nang naosombue tüichongpa hom ma fongkhale saxngokya;

¹⁹Ipongkhae sak-hax tokya zangchei thule hüi. Ijae hom to thule atsun ilaxle hwom pangwüi langdaoa. Nang hato ija kaxho fa ang ku tata azangtsuakle.”

²⁰Ifüitomle Job ajong üntoxle mongma laxle chix nyi-za akyet. Chixe khang ongle awut ilaxle thün haxchi to ajole akhux.

²¹Chixe thüi: “Ku chemchu chilax homtoxle puxpu üntoxle chemchu chilax homtoxle ziüi. Zang-e fapu ilaxle chixe wüi paopu. Chix mün wüi achuak-achen kox.!”

²²Ibibile changdao koxle ngaxchu Job-e Zang ang omale thüile ochax chilyen.