Read Wancho Naga Job 12 Bible Online

Job 12 - Wancho Naga bible

Job 12

¹Nang a khünaknu kaxzing changle. Chemtue nang zile paoüihex, je-hwon nang füi tomle zile paoüi.

³Ikoxlechu nang ma tüikya tukuxle ku ma tutex tüipu; tuita lom machu kue nang ha alople tüipu; nang zangwün pangwüi noke awanle ngopu.

⁴Athax ku zuikhuibue ngaxchu kucha nyile; ku otsao, tsaitox-kaxfekya oli chemchu chitüikoxchu, hwome kucha nyile; ikoxlechu Zang-e ku zangjop to lankya onoxchu tüidaokya.

⁵Hünzom ma chem tingtui chitüikoxchu hünzome ku wanjaipu; hünzome nguak tu nguiünkya khünak to hongpu.

⁶Hwome baozang a matsak mazong ang thomkoxlechu, ahuxmix hia Zang chitüikya khünakbu mongsom ma ngotüi.

⁷Hünzom hama ano-fa angkya olom o-jux ma ngaxchu tüihule;

⁸Chaxwan tok angkya hia tinu mong tokya zünmok hama, hwom je-hwon bama atüilax.

⁹Hwom a Zang chak makhange zingkya changpule, hwom pange wüi awanpu.

¹⁰Chixe zingkya zünmok pangwüi azuikya a Zang changpu; Khünak khüzün pangwüi chix tsak-zong ma ngopu.

¹¹Chemle le füi nange süt müikya awanle laxkya mongzom müipuix, iningle zangwünbu to nange na füi apa pongma mongzom müipu.

¹²Azupa hwom ma je-hwon tüile, Zang ma je-hwon hia tsak-zong pangnyi tüile. Azupa hwom ma mikza ma alekya tüile; Zang ma a mikza ma alekya hia mok angkya zong shemle tüile.

¹⁴Chemtue Zang-e pünle amaüihex, owaechu chatle zing ang müntho; Zang-e kun ma shokya khünak owaechu dan ang tho!

¹⁵Chemtue Zang-e zangwat tsyenle tuipuix, zangzuale chaxwan zanle; Chemtue chixe ti danle ajenpuix, tichong ilaxle mua-mualyemle.

¹⁶Zang a othuithuima tsak-zongle ngokya chitho-jalün; dyenkya khünak üntoxle owato dyen puix, hokhi pangnyi chixtsak chixzong ma tüipu.

¹⁷Chixe apün-awangkyabu angkya je-hwon paole; lompabu ang ongat ningle mok ang tomle.

¹⁸Chixe wanghombu athaile ilaxle kun ma thomkyabu ang achangle;

¹⁹Chixe zompu-zangpabu hia tsak-zong tüikyabu puinai ang tomle.

²⁰Mongao chitüikya khünakbu chixe adangle; chixe azupabu angkya je-hwon paole.

²¹Tsakzongle ngokyabu to chixe ching müncha; apün-awangle ngokyabu angkya zong abak ang tomle.

²²Omang ningle zangnak fangto ngokya nui, chixe zangngai ang tomle.

²³Chixe khünaknu jat-libu tsak-zongkya tamchu chongkya ang achangle; ikoxlechu hwom to chixe wüi anaolaxle olithule amale.

²⁴Chixe hwom lompabu ongat ang achangle; khopi-napale maxkya chifün ma hwom ahamle.

²⁵Hwom a zangnak fangto akhwomle, jutok mix ningle shu-shüile ahamle.