Read Wancho Naga Job 15 Bible Online

Job 15 - Wancho Naga bible

Job 15

¹Kaxwa zangwünbu, Job! Kaxwa zangwünbu!

³Jetüi-hwonlangkya mix owachu, nang ningle zangwünkya mix müntüi; tutsyen chitüikya zangwünbu füi, khünak owaechu ma khosele müntüi.

⁴Nang ang lomtang tüikoxba, owachu Zang thua za-ngo angkya müntüi; owaechu chix to jop ngo angkya müntüi.

⁵Nang chichang-chizangkya mixle nang zangwün makhange angaidaoa; iningkya zangwün tsing-tsang nuk to, nang azwon ang azongle.

⁶Kue nang wun-ahai ngo angkya chem müntüi; nange zangwün kaxhuak pangnusae nang wün ahaile.

⁷Owangpa ma puxkya khünak nang changpule thütpia? Zang-e haxnubu zingpongma nang tüikya lehia?

⁸Nange Zang katzuabu onüi atatle laxpia? Khünak je-hwon a nang tata kux hia?

⁹Kwome chitsingkya nange awankya olili müntüi.

¹⁰Kwome kwom je-hi-hwon azu-khothobu angkya awan laxpu, Hwom a hünpa hwom thoto wüi puxkya changpu.

¹¹Zang-e nang ang mongsom koxpu; nange ija büthüi ang chilaxpu? Kwome chix hanpakma somdangle zangwünpu.

¹²Ikoxle nange mongtsik ashukle kwom to khunle hupu.

¹³Zang füi mongtsik üntoxle nange chix pongle chikoppu.

¹⁴Otsingtomtata ma khünak tuita tsaothale changtsuak ang chami? Khünak tuita Zang füi tawüi sukya mix tüichami?

¹⁵Büthüikoxle, Zang-e kaxtaimixbu to ngaxchu mongong chitüipu; chix miksho ma hwom ngaxchu tsaothale chitüipu.

¹⁶Ilaxle khünake ochax a ti ang laxle jao lingpu; changle, khünak a laxli chitüikya oma-oshix changpu.

¹⁷Athaxpi, Job, kue awankya to nathale apahüi.

¹⁸Jepabue ku hama otsingtsing anwot-anole fapu; hwomechu ibu pupabu angkya awanle kopkya changpu. Hwome je-hwon chemchu khom-pyenle chithompu.

¹⁹Hwom haxtok ma püntüi owachu chitüile tüikya; Zang füi atsaile hwom abe pao angkya mix owachu chitüikya.

²⁰Mix to athakle ngokya chichangchizang khünakbu, hwom mazi tanto sikngünlanle ngoüi.

²¹Za-adünkya thama ozingbu hwom na ma ngaoma ngaoüi; hwom to chemthüiüile tokdomda pongkhae ahuxmixbue hwom to singüi.

²²Zangnak thoto paole azang angkya hwom ang chem monghom chitüi; büthüikoxle hwom mik-amüt ang ojongjong to changlo tutae hwom tanle ngotüi.

²³Üntoxle okunbue hwom mang sax ang nyele ngopu. Mahüikya hwom hanpak a zangnak ma wüile hwome awanpu;

²⁴Tüle tsak-zongkya wanghom tuita lailaile, thamae hwom zanto ka ang hule ngopu.

²⁵Pangnu to lütkya Zang zongto chak ahale ngamkya khünakbu hanpakma ija a hwom osho changpu.

²⁶Hwom a ongam hia alünle ajongkya mix changle; hwome kheba-chithüile hwom di nwonle; hwom a Zang füi azan ang atinle zikle.

²⁸Onok hia hompunubu paole chang füima, Tingsho hia hom-hax tsuikya a hwom changpu; Bachutix ibu tingsho hia hom-hax a zan to maxse jao.

²⁹Hwom a okuilole tüinangkya mix ang mün-ngotoxüi; hwome kop-lokya chemchu otsün münloüi. Hwom chaxba ngaxchu wüi amuale paoüi.

³⁰Hwom a zangnak chak tokya azang ang münthoüi. Hwom a ochak wün to zokdaokya pünbu lailaile changle, puale ngokyabu zangwine jeple paodaokya pün ningle changüi.

³¹Ochax to mongong thomkya ongat ang ngokya kople, Ochax a hwom hingho ang ngoüi.

³²Pünchak lailaile, otuechu chatle tamchihingle, hwom a hanpak mangui tanto wüi zanle paoünüi.

³³Hwom a, majumkya oziak dütle paoünkya grep-zu ningle changüi; Üntoxle opua dütdaokya olip pün ningle changüi.

³⁴Zang chitüikya khünak ang otuechu osix-oli müntüiüi; Mix dyen-nganlaxle zaile alaikya hom wün to shunüi.

³⁵Ochax mwotthobu zinglaxle ochax mwot mokkyabu tüile; Hwom ma tüikya huxkün-lopmong jento mixdyen-mixngankyae awangle tüile.