Read Wancho Naga Job 16 Bible Online

Job 16 - Wancho Naga bible

Job 16

¹Iningkya kaxbu kue kaiwüi atatdaoa; hünzome fakya mongsom a mongsik-ngün ang wüi achangle.

³Hünzom zangwün ojao chibakle wün-ngo angkya hia? Tütatuechu hünzom-zom ma wüi akiaüile hia?

⁴Hünzom a ku hex jangthüi, ku a hünzom hex jangthüi; kuechu hünzome akaxkyabu komkaile akaxse. Tüle hwontüi-jezaikya füi kue ngom awingse, ku zangwün tichen-muale füi hünzom linle laxse.

⁵Ku zünkax-saikax füi hünzom chatsak-muazong ang tomse; hünzom mong asom ang chizakle zangwünse.

⁶Ikoxlechu ku zangwün ma chem olüi chitüi; ku dangle ngokyae ku to tsütle kakkya chiadang.

⁷Zang, nange ku shanle pao ang tompu; nange kwom homkha mik max ang tompu.

⁸Nange ku lole koppu, nang a ku zanpa changpu. Ku a khwon hia za tata wüi; khünaknue ija a ku thaikya. Münwan ang laxpu.

⁹Mongtsik füi Zang-e ku zapong-kapong tiale apun-akhaipu; chixe ku to miktsak füi khunle hupu.

¹⁰Khünaknue ku to adix-adapu; hwome ku akhople afox üntoxle ku thün to wyenpu.

¹¹Zang-e ku ochax khünakbu chak to koxdaoa.

¹²Ku mongsom ma ngohukya, ikoxle Zang-e ku dingkux ma koplaxle chietle thupkhixpu. Zang-e ku jantsing hanpakma thang ang twonpu;

¹³ilaxle pangnu chito khange san füi happu. Ibu sanbue ku to tsunle maklax ang tompu. Itukuxle changkya füima ngaxchu chixe ku to chingchichapu.

¹⁴Chixe ku to chatchatnaole mak-kha ngopu; miktsak füikya süpahi ongat tuita ningle ku to singpu.

¹⁵Kue mangsop laxle nyikhwon nyipong apongpu; chixe wüi lütlaxle ku a ija haxbu khato thungle ngopu.

¹⁶Ku thün makhi-makhile ku soppu; ku mik akhopkhakle mik-khwopbu nakle nakpu;

¹⁷ikoxchu ku changnong-pünthomle thaikya chem müntüi; Zang tokya ku zangjop shingmong lüwüi tüipu.

¹⁸O chaxwannu; thaile ku to mokkya ibu pyenle taxthom! Sukya kaxfün hanpakma ku akhongkya dang ang taxtom!

¹⁹Kuchi ma sele ajong angkya, zangkangting to ku ang owawa tüile.

²⁰Ku zuikhuibue ku to ongat ang laxle sale; ku mik makhange Zang hato mikfi thokle ajenpu.

²¹Khünak tuitae ma zuikhui hanpakma tsaiju-kaxjukya ta ningle; owawae ku bama Zang füi tsaiju-kaxjule chang koxbae texpu.

²²Ku tsün hanpak athax kaile ngopu; ku a tamchichat angkya lom to aham ngopu.