Read Wancho Naga Job 19 Bible Online

Job 19 - Wancho Naga bible

Job 19

¹Hünzome zangwünbu füi büthüikoxle ku mong amütthompu?

³Hünzome janbaba ma chithaile, thünzak ojao chitüile ku adix-adale changtüi.

⁴Kue thaikya mwot mokle changdaobachu, ijae hünzom to chemle pox angkya tüipu?

⁵Hünzome ku füi hünzom wüi sümüipule thütpu, ku sikngün a ku thaikya khoma apongkya sikngünle hünzome thütpu.

⁶Ija a Zang-e mokkya changpule hünzome münngün tsuak hexnyi? Ku kop angkya kam a chixe thakya changpu.

⁷Chix changnong-pünthomle tüikya khoma kue alünpu, ikoxle ija to owaechu chiapapu; sukya kaxfün kop ang ku sopngokya to owaechu chiapapu.

⁸Ku le ang müntho, Zang-e ku lom tsyendaoa; chixe ku lomtang zangnak fangto khomdaoa.

⁹Kutüi kunao hwom chixe komkaile paodaoa; Ku ma münma laikho bakle khadaoa.

¹⁰Chixe ku to pangnu chitokhange thupdaoa. Chixe ku monghom otsing fidaoa; Ku a zanle naxzi ang dantoxdaoa.

¹¹Zang a ku zongto müimamale künshix-mongmale; chix zanpa amakya tukuxle chixe ku to hwonle.

¹²Chixe chix süpahibu ku-zan to akatle; hwome ku nyihom akhople thap tholaxle ziakople thomle.

¹³Ku homkhae ku awüt angkya Zang kaxtom jao changle; ku tsing-wanle ngokyabu zongto ku mixnok wünpa tuita jao changle;

¹⁴Ku haxnu-homsa, zuikhuibu pangwüi paodaoa.

¹⁵Ku hom ma mixwün ang nguile ngokyabue ku alakdaoa; Ku dachasabue ngaxchu ku to, mixnok wünpa tukuxle hudaoa.

¹⁶Kue da tuita sepongma, chixe chilanüi; ku to sühuhüihu thüikoxle ojao münapaüi.

¹⁷Ku zaknom koxle kakonu ku hama ajong ang chitho; kutüi kunao hwom ngaxchu soxle chihüitho.

¹⁸Ku ngün pongma naosombu ku wanjaile nyi.

¹⁹Ku shemkhaxbue ku to nushixdongle hu; kue tüle akhüixkyabue ku hato tok aho.

²⁰Ku khwon a ku zabu ma bing-bwonle shale; ku khüzün chemle ngomanpuix lüwüi tüile.

²¹Hünzom a ku zuikhuibu changle! Ku to chingchale huhüi! Ku a Zang chak füi hongle anguakdaoa.

²²Zang-e thupkya ningle hünzome büthüikoxle ku-zo thup angkya? Hünzome ku zo okhonguile mathup lehia?

²³Ku kax ibu owae mong ma thomlaxhax! Lai ma zale owae koplaxhax!

²⁴Ibu othuithuima ngole naxnui ang, long ma saosa füi takle, ku-kax ku-ngaobu owae zale thomkoxhax.

²⁵Oshukshukma ku khose ang owawa, Zangkangting tokya ngui angkya kue awan ngopu.

²⁶Ku khwon mak-chak füi saxle komdaokoxchu, Tsangtsa max-samüi thoto wüi kue Zang ngünüi. Kue Zang ngün ang kopüi.

²⁷Kue chix ija ku mik füijao ngün ang kopüi; chix a ku zongto mixnok wünpa ang chichangüi. “Keme chix to chemle fuxatsüile?”,

²⁸le hünzome wünkya khoma ku ang monghixle. Ku-zan to ka ang hünzome tütali huxfyet lom.

²⁹Ikoxle athax a, changlo thua zalax: Ochax hato Zang-e ahüi angkya mongtsik thua a, kaxfünpa tuita tüile le hünzom ang awan ang tom angkya bama a.