Read Wancho Naga Job 20 Bible Online

Job 20 - Wancho Naga bible

Job 20

¹Job, nange ku ang mong amale. Athax kue nang kax to lan ang münadutho.

³Nange chem akaxpuix ija a ajaokya kax changpu; Nang kax to chemle lanüihex ija kue awan ngopu.

⁴Nange awan ngopu, ija chaxwannu ma, khünak odan wangpong tokhange wüi,

⁵chichangchizangkya khünak owachu okuilole mongmüi ma chingo.

⁶Zangding to thule homthün-homthün zaile; hwom khange zangfwom to thule zaxzanglechu tüingokoxlax;

⁷ikoxlechu hwom a haxbu ningle pikle paodaoüi. Hwom süntsing-münwanbu ang hwom ojongto paoünpuixle khosamüi.

⁸Hwom a mikza ma hüikya wünmang tuita ningle samle paoünüi; hwom tamchatle ngün ang chikopüi.

⁹Chichangchizangkyabu hwom ngwotnui angkya samle paoünüi,

¹⁰ibue zasabu kux ahuxle apüikya susa hwome zingle achatüi.

¹¹Hwom tsangtsa a khosün ma hia tsak-zong füi tüingokya, ikoxlechu ija chwonle wüi haxbu ang achangdaoüi.

¹²Ochax a hwom tun ma tüle-tüle müi, ikhoma ija otik-ojong züizüie wi ma amumle thom.

¹⁴Ikoxlechu ija süt hwom wok khato khaxkya ang achang, khun-hing tütali ningle tüle kax wüi khaxle.

¹⁵Chichangchizangkyabue ahuxle kopkya tuina fatle alaile; Zang-e hwom wok-kha tokya ngaxchu chatle alai laxle.

¹⁶Ochax khünake chem jokpuix ija a khunhing thatha; ija füi hwom mik amüt angkya, oje füikya pue tukya thatha.

¹⁷Olip münga shuajen ngün ang chichangba tsomti hia nax-ti shuajenbu ngün ang hwom a ozün ma chingoüi.

¹⁸Hwome mokdaokyabu pangwüi hwome dantoxüi; hwom ang ma tuina füi mongzom-müi angkya chakba müntüiüi;

¹⁹chemthüikoxle hwome mixshix-zasabu to sikangün ilaxle hwom to chie-chise; owawae zaile alaikya hom-hax hwome pale lax.

²⁰Hwom nüfux ma mongzom tammünmüitox.

²¹Hwome sax-ling pongma ota-otua toxkya wanlom chitüi, athax hwom-tui hwom-na a ashukkya ang changtüi.

²²Owüiwüile hwome tsuak-sangle changpongma, hwom tsingtsang lixkyae hwom to sheple akhünüi.

²³Hwome saxse atsutsu pangwüi sax ang laxkox! Küntsik mongma füi Zang-e hwom sikangünüi.

²⁴Jan changlo thoto paole azang ang azong pongma, khop zingkya hapnu füi hwom haple anguaküi.

²⁵Sanhape hwom tsangtsa apatle leüi; Ija santun junkya makhange hwom aji jenle dütüi; Mong sikngüne hwom to khax ma hukle changüi.

²⁶Hwome sünle athomthom olithule amaüi; khünake chitakkya wün füi, hwom hia homkha pangwüi zokle ashunüi.

²⁷Ibu ochax zangdingkho to angaile aho; ilaxle chaxwannue hwom thaikya kaxkhi kox.

²⁸Zang mongtsik tichen-mualyem ma, Hwom tuinabu komkai olithule shuaküi.

²⁹Ija a Zang-e hwom ang koxkya, chichangchizangkya khünakbu shoma changle.