Read Wancho Naga Job 21 Bible Online

Job 21 - Wancho Naga bible

Job 21

¹Ku kax to shong-apa hüi; kue hünzom ma lomkya mongsom a ibibi changpu.

³Ku ang akax ang shong-shanhüi; Kue wüntsuak füimatix hünzom mongjangtsuba kam thalax.

⁴Ku a zile samdao angkya khünak füi ahe ngokya münchang; Zangwün olom tüingo koxle kue naxchang laxle chishanpu.

⁵Ku to hulax, hünzom dangtang ibibi wüi münngui lea?

⁶Kue ku to chemle changpuix ija ajang-ano pongma, ku tüle za-maxle üntoxle khomtsile abünle.

⁷Zang-e chemthüikoxle tsompuix ochax khünakbu, azu-khotho ahak-aluale ozün ma ngo ang?

⁸Hwom su-sabu haxmuak zangmüi tüihule, ibu to humele atsün ang hwom a tsünlo-khotho ngole.

⁹Zang-e hwom homkha hato sikngün tuitachu mün-ahüi; hwom chemtuechu chabüt-lasünle ngo angkya chitüi.

¹⁰Changle, hwom tsom-pombu atu-amaile, ilaxle chem sikchingünle pux-paile.

¹¹Hwom naosombu chun hosabu lailaile zikle azap-abinle;

¹²ilaxle thuaput waxmaibu mütkya to azüizüithale.

¹³Hwom tsün tüle mongsom ma ngole hüile; Hwom a sikngün chemchu chitüile dangjajale zile.

¹⁴Chichangchizangkyabue Zang ang hwom danhüi thüile; hwom hanpak chix mongtex hwome awanle laxse müntsu.

¹⁵Zang thotha ngo angkya chem mwot müntüi; hwome ajangle--chix to jop-to ngokya ma chem olüi müntüi.

¹⁶Hwome matsak mazong füi tho-lünpu le akaxle; ikoxlechu hwom mongtex kue münpong tsuak changkoxale.

¹⁷Chichangchizang khünakbu wünnyan amütle chang koxcha? Hwom tuitae ngaxchu thama apongle changkoxcha? Zang-e chix mongtsik füi chichang-chizangkyabu to sikangünkoxcha?

¹⁸Zangwin to tsaxsa jeple paokya ningle; chichangba haxbu ningle zangchei-e hwom pikle pao ang tomzaicha?

¹⁹Hopa ochax khoma naosa to Zang-e sikangünpu-le hünzome wüntüi. Münchang! Zang-e achaxkya khünak towüi sikangünpu; hwom ochax khoma chixe ile mokpule naxahokox.

²⁰Ochax hünlit ochax khünake wüi naxhün kox; Khüthak Zang mongmae hwom to pokya naxawankox.

²¹Chemtue khünak tsün ashukle changpuix; masu-masa hwom mongmüi-pwonla paktikle changcha?

²²Zangkho tokyabu to ngaxchu kaxfün fakya Zang to, khünak chixe anwot-anole changtsuak angcha?

²³Züizüi khünak zikya nyix kople, Chemkak-chemlak chitüile ngole; hwom a pwonlatungle sikngün chemchu chitüile; hwom tsangtsa wokfwot tilan müile zitüi.

²⁵Mamabu ang a mongmüi jao chitüi; hwom a khaxza wünlokle ngolaxle zi.

²⁶Ikoxlechu pangwüi talailaile zi üntoxle akhün; hwom pangwüi ma chong awang.

²⁷Hünzom ma ku mong atsik angkya mongjang, chemningkya pang laxlax tüipuix kue awanle.

²⁸Hünzome atüile: “Khünak owae ochax mwot mokle ngo? Ija alixachong hom-pungbu athax omaün?”

²⁹Hünzome wünham mixbu füi kax-kaxle mün-ahamzai hia? Hwom kaxwün wangkyabu hünzome müntsing hia?

³⁰Zang mongtsik hia sikngün fakya nyix, shanle dantoxkya mix a chichang-chizangkya mix changle.

³¹Chichangchizangkya owamachu ija tsaitox-kaxfe angkya müntüi; chix ochax tsang chixe wüi thompu lechu chichang.

³²Amüile nyele thomkya zukting to chix paile apüi pongma;

³³hajat-hajat khünak chix panjo ma wom; haxdix ngaxchu chix ding ma ajingle dan ang tom.

³⁴Ikoxle hünzome tsaingat-kaxngui füi ku mong asom ang azong! Hünzome fakya kaxlan a pangwüi othaithai wüi!