Read Wancho Naga Job 27 Bible Online

Job 27 - Wancho Naga bible

Job 27

¹Khüthak Zang owae ku ang sukya kaxfün münfale angampuix, üntoxle ku tsün khaxkya ang achangpuix, kue chix mün ma tsaopu,

³Zang-e ku ang zakdün fakya kople,

⁴ku tunpün makhange chemtuechu ochax zang münwün, ku le füi otuechu mün-atseüi.

⁵Khünak hünzom ang kue changle le chemtuechu mün-akax; zikya nyix kople ku chithaikya mix lüwüi ngoüi.

⁶Ku chithaikoxle sukya kaxngai kue mündantox; ku khangka a tsaotha lüwüi tüile.

⁷Opange ku abaxpuix üntoxle ku füi apüile ajongpuix, pangnusa to chichangchizang khünakbu ningle sikangünle naxchang.

⁸Zang-e hwom khüzün jukya nyix bama, Zang chitüikya khünakbu monghom angkya chemtüi?

⁹Sikngün hüikya zuma, Zang-e, hwom sopkya zing to apaüi lea?

¹⁰Chixe fakya mongmüi to hwome sungkox müise; hwome chix to chizakle jople ngokox müise.

¹¹Zang tsak-zong chemtukux chongpuix, kue hünzom hama apua fang; Khüthak Zang-e chem katzua zingtüipuix, kue akhixle wünfang.

¹²Ikoxlechu münchang; hünzome alüile ngünle kopdao füima, iningkya tsaingat-kaxngui büthüi ang akaxngopu?

¹³Khüthak Zang-e chichang-chizangle hia changnong-pünthomle tüikyabu to, chemle sikngün koxpuix, ija otsing changpu.

¹⁴Hwom ang sasün hwom tülechu tüikoxlax, ikoxlechu hwom pangwüi zan to max ang tomüi; hwomsu-hwomsabu ang sütkhonguile otuechu müntüi toxüi.

¹⁵Zan to chimaxle toxkya thom a okak-olak ma aziküi; hwome dantoxkya zomnubue ngaxchu mang münsopüi.

¹⁶Chichangchizangkya mix ang khop-jan okiak chitholechu tüikoxsax; Khünake laxsese to kaile nyi-zachu tüiünkoxsax;

¹⁷Ikoxlechu müikya khünak owawae ibu nyi-za awunüi; chithaikya khünak owawae idu khop-jan kopsaxüi.

¹⁸Maknu zi jaikya ningle khünak chichangkyabue homzaile changkoxlax, chichangba haxtok nyetmix dabu ngwotnui pomsa ningle wüi zaikoxlax.

¹⁹Oshukshukma hwom hakpa-luapa ang achangle jipüi; zokya thoma hwom tuina komkaile samün bangüi.

²⁰Allele tichene thukya ningle chabüt-lasünkyae hwom to hongüi; awün-ningkya zangwine hwom jeple paoüi;

²¹Handünchi zangwine hwom hom-hax tsuile paoüi;

²²azan ang paole thangshix ngopong khae, chingchingchichale ijae hwom to thule anguaküi.

²³Hwom zikle paopongma zongkya zangchei hüile; popak cheinu lekya thoto hwom ngaoma ngaole akhongüi.