Read Wancho Naga Job 30 Bible Online

Job 30 - Wancho Naga bible

Job 30

¹Ikoxle athax a ku füi naolibue ku chanyile! Hwom pupa hwom a jento chilaxli ang ngole hüipu, ikhoma ku hibu ang hwom chun-nyet to fong ang chitom.

²Hwom a shanünkya khünakbu ofox changkya; ku mwot tütali mok angchu hwom ma zong chitüikya.

³Hwom a tüle woknuak tilan maxkya zasabu; ikhoma zangnake, khünak chisoxkya nuito; faomüibu ningle hwome püntsing ozanbu shao.

⁴Hwome sak-hax tokya pünbu file lax, haisokkya hasakuabu ngaxchu file lax üntoxle ibu sax.

⁵Ahuxmix jwonle apao pupule, pangnusae akhongle hwom jwonle apao.

⁶Zak-kax-kho to thole alaikya okhabu ma, hwom a ibu longlua khato ngo angkya lai.

⁷Faokha to hwom a müi lailaile akhong; fum-fang to hwom abule jongta khama asox.

⁸Chem mwot ma chihüikya mün chitüikya othom! Hwom a chaxwantok angkya jwonle apaokya thom.

⁹Hwom nguilaxle athax kucha nyile changtüia; ku a hwom zongto chanyit-mowün otong ang changtüia.

¹⁰Hwome ku to atsingle hwonpu; hwome hwom a ku tutu to ataxle müikyale thütpu, tamchu ngui üntoxle ku thün to thuak füi thuakpu.

¹¹Zang-e ku zong chitüile üntoxle fongmix chitüile zingkoxle, hwom a mongtsik abakle ku chito mix hüile.

¹²Ibue ku to sing; hwome ku zikle pao ang tompu; hwome ku to oshuk chakmok janlang ang achwonpu.

¹³Hwome ku paole azang angkya lom tsyenlaxle ku amüt ang tungpu; ikoxle hwom to abax angkya owachu chitüipu.

¹⁴Hwom a ku chwonmik kha makhange tsungle hüipu; hwom a ku khang thuple akhixle hüipu.

¹⁵Ku to chabüt-lasünkyae lütdaoa; ku mün a zangwin ningle paole samdaoa, kutui-kunao a zangfwom ningle samdaoa.

¹⁶Athax a ku zitu nguipu; ku-kak ku-lak dangle müikya nox chitüipu.

¹⁷Awünningle ku za pangwüi bupu; ku shaole akhix ngokya kak ojao chidangpu.

¹⁸Zang-e ku nyipong na ma bele kop, üntoxle ku nyi to zople achikle ama.

¹⁹Chixe ku haxbex khato tswonle awütpu; ku a haxthom füi tuita ang achangpu.

²⁰Kue nang nyakpu, O Zang; ikoxle nange chiapapu. Kue zangjop pongma nange chiapapu.

²¹Nange ku to zongbakle mongtsik füi hwon ngopu; nang tsak-zong pangnu füi nange ku zothuppu.

²²Nange ku zangwin füi jeple awüt; nange ku tata tinu tichap khato sikngün ang tom.

²³Nange ku zik hato paole ngopule kue awanpu; ija a noknusa hanpakma athünle thomkya osho changpu.

²⁴Maxngoünkya khünak zan to hünzom omalax ang kangopu? Chixe jusax ang awankya boboma tho angkya oli chemtüipu?

²⁵Sikngün pongma khünaknu füi ku münsop lea? Chitüi-chinangkyabu hanpakma chingchajajakya müntüi lehia?

²⁶Kue mongmüi hia zangngai sungpu; ikoxle ija lüix to sikngün hia zangnak mix hüipu!

²⁷Sikngün hia tsangle kakkyae ku ashik-afündaoa; hanpak füima hanpakle kue sikngün apongle hüidaoa.

²⁸Ku naktukle, zanghan nyankya chem chitüile ahampu; noknu tunthoma ajonglaxle kue chingcha jupu.

²⁹Kukax kungao a hijan juakya hia ostris o ngaokya ningle, mongma ashukle wandangjale.

³⁰Ku tsangtsa khwon nakle pao; ku a tüle khamle kakle max.

³¹Onox ma kue mongmüi tsaizu ding atatkya khato, athaxpi sopkya hia juakya zing tata atatle.