Read Wancho Naga Job 31 Bible Online

Job 31 - Wancho Naga bible

Job 31

¹Sheko tuita to mikzalole chihu angkya, kue mong makhange tsaotsütpu.

²Khüthak Zang-e kem to chemle mokpuix? Khünaknu mwot to chixe chemle khompuix?

³Thaile mokkya pangnusa hato, chixe sikngün hia thama apüile kox.

⁴Ku mwot pangwüi Zang-e awan ngole; ku chitswon pangwüi chixe ngünle ngole.

⁵Chichangchizang mwot mamokle kue tsaopu; kue mix dyen ang otuechu mün-azongle tsaopu.

⁶Zang-e ku ajitkya tuak ma naxthüt kox; ku chemtukux küntsao-mongthakya mix hex, chixe naxngünkox.

⁷Kue sukya lomtang dantoxlaxle paole jangchangdaoba; ku chak ma ochax aji khile jangtüidaoba; kue ochax mok ang tsu-luakya naxtüikox.

⁸Ku tsaxsa-hikha naxmakox; ku manzai puamün mixe naxsaxkox.

⁹Kue tomzipa kakonu to mikzalole jangchangdao, she kahak nukto ku khünle ngokya jangtüi dao;

¹⁰Ku kakonue mix homkha to mix fongmokle naxchangkox, tamchu mix kako lyading to jiple naxchangkox.

¹¹Iningkya ochax a mik max ang tom angkya wüi.

¹²Ile changkyae ku ma atüitüi komle zokle ashunle, ija a ku zongto amalum okham wün thama ang changüi.

¹³Chemtue ku dapa owawae khualople changpuix, kue chix zangwün to apaüi üntoxle müile hu-meüi.

¹⁴Kue ile chimok thüikoxle kue Zang füi chemle apongüi? Ku kaxfün ang Zang nguipongma kue chemle lanüi?

¹⁵Zang owae ku zingle alaipuix; ku dapa chuwüi chixe zingle alaipu.

¹⁶Kue zasabu to münfongpule otuechu mün-angam; kue zomnubu thajao wünhai ma ngo ang matom.

¹⁷Kue sax-lingle tüipongma zasabu woknuak ma ngo ang matom.

¹⁸Ku tsün-tsün ma kue hwom nuazingle hüipu.

¹⁹Manyi maza shak ngaxchu chithole, owawa maxsamkya mix bang pongma,

²⁰ku chun mun makhange zingle alaikya, züchao füi zingkya nyiwun kue chix ang koxpu. Ilaxle chixe mongbakle ku achuak-achenpu.

²¹Khwalo ma zangwünkya kue wüi lütüile thütlaxle, kue owawa khaxsa nao dyenlale jangchangdao,

²²ku chak pakle naxmakox; ibu ku suakpong makhange pun-khaile naxchangkox.

²³Iningkya kue chemtuechu münmok, chemthüikoxle ku a Zang kaxfün thuazapu.

²⁴Kue tüinangkya to chemtuechu mong mün-ong,

²⁵chichangba kutüi-kunao hwom zongto ngamle münchang.

²⁶Senu zatzong pongmachu kue zanghan to mashwom; osün müile tüipongmachu kue lyetnu to mashwom.

²⁷Ibu achuak-achenle chang angkya ku jikle mapao; ibu achuak-achenle ku chak füi tun apongle machang.

²⁸Iningkya ochax to mikamütle sikangün angkya wüi; ijae Khüthak Zang thajao-wünhaile.

²⁹Ku zanpabu sikngün apong pongma chemtuechu ku ang mong mamüi; hwome thama apong pongma pwonla dongle machang.

³⁰Hwom ozik-omüt hanpak zangjople kue ochax malyen.

³¹Kue mixnok wünpabu wünpwonle pongkopkya, ku mwot mokkyabue awan ngopu.

³²Wünham mixbu kue homto sele laxpu; otuechu hwom lomnutangto wünpom ang chitom.

³³Khünakbue ma ochax pyen ang azongle; ikoxlechu kue ku ochax chemtuechu münpyen.

³⁴Tütuechu khünaknu zangwün thua ku münza; ku tütuechu dangle chichangba homkhama mango, chemthüikoxle hwom mwop angkya thua ku zale.

³⁵Kutsai-kukax to owae ngaxchu mün-apa pia? Kaxhuak tuita ngaxchu thaikya müntüile kue tsaopu. Khüthak Zang-e ku to naxlan hüi. Ku zanpabue ku to tsaitox-kaxfekyabu, kue naxngünle laiza ma jangkopba;

³⁶kue ibu ngamjakle suakto ma awunse, ilaxle khohom lailaile ibu a khang ma asünse.

³⁷Kue mokdaokya pangnu kue, Zang hama wünse; Ilaxle chix tunthoma ojao chiazakle, kue ngom nwonse.

³⁸Kue manzai ngokya haxtok, opunu chak tokya ahuxle laxkya jangchang;

³⁹ikha angkya puamün kue saxle jangchang, ikoxle ija haxtok mole fakyabu a woknuak ma thomle jangchang;

⁴⁰wonglai hia Tsaxsa-tula lüix to ikhama, mama fum hia hingzang wüi naxnyemkox. Job zangwün a ashukdaoa.