Read Wancho Naga Job 32 Bible Online

Job 32 - Wancho Naga bible

Job 32

¹Job-e chix alüile sukya mix changpule thüikya chix chifün angkya chiachexle ajongkya khoma, chix zuikhui mixsün hwom azome kaxlan fa ang azong ngokya zakle shu.

²Ikoxle ikha ma nguile asukya mixsün Elihu-e chix mongtsik adu ang chitho, chemthüikoxle Job-e chix alüikya sukya mix changpule thüilaxle Zang wüi thaikya ang laxle akax ngo. (Elihu a Barakel sasün changkya. Chix a Buz hosu üntoxle Ram saxthom angkya changkya.)

³Chix a Job zuikhui mixsün hwom azom füichu mongtsik. Hwome Job kax to lan angkya olomjao chiataktsuak; ijae sisile Zang-e a thaikya ang achang thom.

⁴Hwom khama naoshukpa a Elihu changkya khoma, pangnusae zangwün ashuk angkya tanle apa ngo.

⁵Chemtue chixe, ija mixsün hwom azome Job kax to lax ang münthole ngünpuix, chix ang mongtsik dong,

⁶Ilaxle akax ang süt. Ku a naosünsa, hünzom a azupabu, Ikhoma hünzom hama ku mongtex ngai ang azakpu.

⁷Ku füi alüile nange akax angkya wüile akax ngopu, ile tüichongbuechu nang je-hwon tomhanle lax angkya changpu.

⁸Ikoxle khünak hato nguilaxle hwom ang je-hwon koxkya a Khüthak Zang chasa tix changle.

⁹Khünak azukoxle jetüi-hwonlangpule münchang chichangba oja supuix ija awan ang thopule münchang.

¹⁰Idaile athaxpi hünzome ku kax apakoxle müiüile texpu; kue hünzom hama ku mongto texkya wünfang.

¹¹Hünzom zangwün to kue adule apa ngodaoa, hünzome wanwünkax lomle ngopongma tanle ngodaoa.

¹²Kue soxle apa ngokoxle hünzome chilüttsuakkya atatdaoa; Job to athakle lan angkya zangwün hünzom ma chitüi.

¹³Ingale hünzome je-hwon tua alopdaoale chemle thüitsuak? Hünzome chithokya khoma Job kaxto Zang-e tix lanüi.

¹⁴Job a hünzom füi akax ngopu, ku füi chichang; ikoxlechu kue otuechu hünzome lankya ningle münlan.

¹⁵Kax-kax ma hwom towüi lütdaoa, Job; hwom ma nang kaxto lan angkya kaxlan müntüi.

¹⁶Hwom dang pongma kue tanle ngoüi hia? Hwom ang kaxlan angkya ashukle tang ngole.

¹⁷Ile münchangüi, kue ku kaxlan fakya füi, ku mongto texkya akaxfang.

¹⁸Zangwün bama ku adu ang münthoüi, kue dingkux ma zangwün tsyenthom ang münthoüi.

¹⁹Kue zangwün angkya onox chiatak jangthüi: müikhwon nyitsong hozang angkya grepti juzün ningle chaoüi.

²⁰Kue ija adule ngo ang münthoüi; kue akax angkya wüi changle.

²¹Ija kax ma alakya olom ma kue opupu chimachu münseüi. Kue opupu ngadong angchu müntom.

²²Chemle ngadong ang tomüihex kue müntik, ilaxle kue ile jangmok thüiningle Zang-e ku-sik naxangün.