Read Wancho Naga Job 33 Bible Online

Job 33 - Wancho Naga bible

Job 33

¹Job, athaxpi kue chem akaxüihex Ija to nathale apahüi.

²Ku mong ma atüitüi komkaile wünfang.

³Ku zangwün a khünzukyabu changpu, Ilaxle kue otsingtsing akax ngopu.

⁴Ku a Zang chasa füi zing ilaxle khüzün fale thompu.

⁵Jangtsuakba nange ku kax to lanlax; ku füi alat ang achwonlax.

⁶Zang miksho ma künyi tuitata wüi; künyi pangnyi wüi komhax füi zingpupu wüi.

⁷Nang ku thua za-ngo angkya chem müntüi; kue nangto lüt ang azongüi münchang.

⁸Nang kax kue ile atatle:

⁹“Ku a münthai; kue thaikya chemchu mamok; ku a ochax münjao chiawankya khünak changpu.

¹⁰Ikoxlechu ku-zan to ka ang Zang-e ku ma thaikya atakle; ilaxle ku to zanpa tukuxle hwonle.

¹¹Chixe ku cha ma janbüi füi aka; ku chikap to tiale khile chixe hule ngo.”

¹²Ikoxlechu kue thüipu, Job! Nang a thaipu. Zang a khünak noknusa füi achongkya changle.

¹³Khünak kaxthup-ngaotün to ojao chilan khatole, chemthüikya ma nange Zang ma kaxhux felaxpu?

¹⁴Zang-e chatchatnaole zangwün koxchu, chix zangwün to owaechu chiapa.

¹⁵Awünningle khünak jipzing füima, Zang-e wünmang hia mik ma alekya füi zangwünle.

¹⁶Chixe hwom ang chix kax apa ang tomle, ilaxle hwom a chix kaxkhün thoto zale.

¹⁷Hwome ochax lyenkya hia ngamkya abax angle, Zang-e hwom füi zangwünle.

¹⁸Chixe hwom max ang müntom; chixe hwom zikmüt-mangkho tokya khosünle.

¹⁹Chix hato okak-olak ahüile tsütle kak ang tomkya füi khünak thaikya achangle zingle.

²⁰Kakmix-e süt-saxsele chitsuüi, amüikya sütling to ngaxchu oma-oshix ang huüi.

²¹Chix tsangtsa chem angchu chichangle chule pao; nange chix zatua pangwüi ngün ang tsuak;

²²chix a amalum to leüi khakha.

²³Zang kaxtaimixbu tüihukya kha angkya, hwom hato hwom mwot aho fa ang, kaxtaimix tuita wüi hüi ang tsuak.

²⁴Chingcha füi kaxtaimixe thüiüi: “Chix dankox! Chix a amalum fangto ju angkya münchang. Chix dan angkya bama tsang ikhama tüile.”

²⁵Chix tsangtsa chatle tsongle anaole tsak-zongüi;

²⁶chixe zangjopkya zuma, Zang-e chix zangjop to lanüi; chixe mongmüi füi Zang to shwomüi; chix thaikya pangnuli Zang-e achangle zingfaüi.

²⁷Chixe noknu tunthoma akaxüi: “Kue ochax lyendaoa. Kue changle chimok, ikoxlechu kua Zang-e panle thompu.

²⁸Amalum to ledaose ku chixe kople thomwüi, ilaxle athax kople ku ozün ma ngopu.”

²⁹Zang-e ibu pangwüi chatchatnaole mok;

³⁰Chixe khünak ang khüzün kox, üntoxle ozün ma ngokya mongmüi kox.

³¹Athax-a, Job! Ku zangwün to apahüi! Dangja ngolax ilaxle ku akax ang tomhüi.

³²Ikoxlechu nange tütali wünse jangtsu, kue apa fang; nang sule tüile le kue thüitsuaküi.

³³Ile chichang thüiningle dangjajale ku kax apahüi, jetüi-hwonlang angkya kue nang hama apuafang.