Read Wancho Naga Job 36 Bible Online

Job 36 - Wancho Naga bible

Job 36

¹Kue Zang chima sele chem akaxüihex, ija to hidaole adule apahüi.

³Kue tsing-wankya a tüle khaole; zingpupa Zang sule le aho ang, kue chem awanpuix ija olom twonüi.

⁴Kue nang füi akaxkya tuitachu münthai; hünzom miksho ma hünzome otsingtsing jepa ngün-ngopu.

⁵Zang chemtukux tsak-zongle tüipuix! Chixe owachu münahai; Chixe chitsingkya chemchu müntüi.

⁶Chixe ochax khünakbu tsünlole ngo ang müntom, ilaxle zasabu to chixe sukya mokle.

⁷Opang otsao changpuix hwom chixe sünle; chixe hwom ang wanghombu lailaile apün ang tomle, ilaxle hwom a jento achuakle chathua za ang tomle.

⁸Hwome mokdaokya bama sikngün koxle, khünakbu a janbüi füi khakle jangchang;

⁹Zang-e hwom hato hwom ochax hia hwom mongngam ahole.

¹⁰Chichangchizangkya hato tok aho angkya bama chixe hwom ang chixe fakya kaxkhün to apa ang tomle.

¹¹Hwome Zang kax ma lax üntoxle chix thothale jangchang, Hwom a mongsom ma üntoxle tüinangle ngo ang tomüi.

¹²Ikoxle ile chichang thüiningle hwom a ongat ma ziüi üntoxle shuasa tale lumpan thai ang tomüi.

¹³Zang chilax homtoxle ngokya mix mongtsiklanle ngoüi, sikngün koxponge ngaxchu hwome fonghüile münjop.

¹⁴Hwom tsaktan tüipongma wüi zile, zakkop thajao khüzün ma shanle pao ang tomle.

¹⁵Ikoxlechu Zang-e khünak ang sikngün makhange anwot-anole koxpu, thajao-wünhai a hwom mikzam ang twonpu.

¹⁶Sikngün khatokya Zang-e nang alaipu, ilaxle nang khosün ma mongmüi ngo ang tompu, nang tsap a tsuathale sütli athünkyae awang tüikya.

¹⁷Ikoxle athax a nange kopse sikngün füi nang to sikangünpu.

¹⁸Tütali zuizun füi nang chidyen angkya bama khünzaile ngolax, chichangba ahak-aluakyae nang ochei lomto pao ang müntom ole thüilax.

¹⁹Fonghüile nang akhongle sopkyae nang fün chemchu münamüi; athax nang-tsak nang-zonge nang to fong ang münthoüi.

²⁰Zangnak namhüisele taxthüi: Ija a tingnu-noksa nguak angkya hanpak changpu.

²¹Ochax lom to chipao angkya bama khünzailax; nang iningkya lom to nakpaole nang hato sikngün ahüipu.

²²Zang tsak-zong chemtukux chongpuix ija texle ataklax; chix a nwotmixbu khama akhokya jao changle.

²³Owaechu Zang hama chem moküihex apua ang müntho chichangba ochax mwot mokle le chix ma kaxhux-fe ang müntho.

²⁴Chixe chem mokdaopuix ija hanpakma chix a jento achuakle hüipu; nangechu chix achuak angkya wüi changle.

²⁵Chixe chem mokpuix ija pangnusae wüi ngünle hüidaoa; ikoxle keme tsailo tokhange hu ang thowüi.

²⁶Keme chix chongkya komkaile tsinglax ang müntho chichangba chix zangpua e ang müntho.

²⁷Chaxwantok angkya ti lax üntoxle ija zangwat ti ang chatle achangkya a Zang changpu.

²⁸Chixe khünaknu pangnu hanpak ang zangfwom angkya zangwat ti fule adüt.

²⁹Zang ngwotnui zangdingkho akaile zangfwom chemle ahampuix chichangba zang chemle atsak-adung puix owaechu awan ang müntho.

³⁰Chixe zangding pangnu chito zangchangjep ahüi, ikoxlechu tinu jithong a zangnaktukle ngo.

³¹Chixe ile khünaknu tux üntoxle okhonguikya sütling koxle.

³²Chixe zangchangjep chix chak füi kop ilaxle janman toxle hap ang tom.

³³Zangtsak-zangdung makhange zangchei-zangwat hüile ngokya kax, üntoxle ija hüile ngokya osu-maihubue tsing.