Read Wancho Naga Job 38 Bible Online

Job 38 - Wancho Naga bible

Job 38

¹Ifüima zangtsak-zangdung makhange Jowanpa-e Job füi zangwün.

²Nange chemchu chitsingkya hia zangwün ohuabu füi ku hwon-je to atüi angkya nang owa?

³Athax tangthole ajonglax ilaxle kue nang ma atüikya kax to lanlax.

⁴Kue chaxwannu zingpongma nang tüihom hexcha? Nange huanuma tsing-wanle jangtüi, nange ku hama ija bama apuahüi.

⁵Ija itukux changüile owa mongto texle tsuak? Ija ding ma thüt angkya kia owae tit? Nange ibu pangwüi tikle ngochami?

⁶Chaxwannu to thuakya thongnubu chemfüi kople thom? Chaxwannu thongnu owae küile wangpuix?

⁷Anopningle swomsa ma lyettsibu tomle tsaingao, üntoxle zangkangting tokyabu mongmüi laxle akhong.

⁸Tinu-shinthuk tsyenle tui angkya ka owae hak

⁹Tinu-shinthuk to zangfwom füi chwop üntoxle ija zangnak fangto akütle thomkya a ku changpu.

¹⁰Tinu-shinthuk longzi kue tanpu üntoxle ija okabu haklaxle tsyenle thompu.

¹¹Kue ija ang thüipu: “Ija zia taxkai! Tüle zongkya nang tichap ikhama wüi zak angkya changle.”

¹²Job, nange tsüntsün ma nyix tuita ngaxchu zangngaile chang angkya kaxtom koxle changcha?

¹³Nange, zangngai ang chaxwannu bakle kop angkya üntoxle chichang-chizangkya khünakbu hwom ngwotnui ma sile alox angkya kaxkoxle changdüicha?

¹⁴Anyixningkya zangngaie haxhua hia haxsha kotho to nyi sikle azox daokya ningle ajong ang tom, ilaxle komtik ma zakya lailaile tsaothale ngün ang tom.

¹⁵Ochax khünakbu hanpakma anyixningkya zangngai a huanuma fale üntoxle ibue chakmok-janlangle chang angkya hwom mwotbu to abaxle.

¹⁶Tinu-shinthuk jimong tokya tümik fuakle laikya khato nang nguidaicha? Molo-Tinu jimong wakhua to nang aham wandaicha?

¹⁷Tütuechu nang hama owawae omang chaxwan nyetnui fülom ahodaicha?

¹⁸Chaxwannu chemtukux chongpuix ija bama nange ajang tsuakcha? Nange tikle jangtüiba ku kax to lanhüi.

¹⁹Zangngai chemkha tokya hüipuix chichangba zangnaknu otong ojongkha hex nange awancha hex?

²⁰Nange hwom hama chemtukux atsaile pao angkya hex ija apua ang tho ang chami, chichangba hwom chatle anongle achat ang tho ang chami?

²¹Nang a müimamakya azupa tuita tamchu chaxwannu zingpongmachu nang tüile ngokya daile, nange ija thoüile kue mongongpu!

²²Kue jun hia jun longbu thomkya, pungkha to nange tamngax huno chami?

²³Sikngün-tuitai pongma lax ang üntoxle chu achax-azanle changpongma hanpakma kue ibu achwon thompu.

²⁴Zanghan dongle laikya nui to, chichangba handünchi zangwin laikya otong to nang nguitox chami?

²⁵Zangwat thokle adüt angkya tilom owae züi üntoxle jun düt angkya lom owae zangle kox?

²⁶Owachu chingokya khato zang owae awat?

²⁷Fum-sui chuile naxlai ang zanle ti alan ngokya haxtok to ti owae kox?

²⁸Zangwat hia nyenti ang hopa tüichami?

²⁹Ti oja long ang achangle tinu thün akongle changpuix,

³⁰ojae ti long ang achang ilaxle tinu thün junkhao ang achangpuix?

³¹Nange lyettsi atsaple tüikyabu ta ma akungle khak thom ang tho ang chami chichangba afoxle tüikya lyettsi chepnu ningkyabu kople thomkya zabu chaktom da ang tho ang chami?

³²Zangtso zangwa tütuehex chithüile nang lyettsibu lom azüi ang tho ang chami chichangba lyettsi chongkya hixkya pangwüi ang hwom ngai angkya tu thütle koxtho ang chami?

³³Zangding apünle ngokya wanlombu nange awanchami, üntoxle ibu wanlom nange chaxwannu ma twon ang tho ang chami?

³⁴Nange zangfwom ang kaxtom koxle akhong ang tho ang chami? Zangwat ti ibu füi ashan ang tho ang chami?

³⁵üntoxle zangchangjep ang nange ajep angkya kax koxkoxle, ija nang hato nguilaxle: “Nang kaxtom ma chilax lea”, le thüi angchami?

³⁶Nail shuanu chemtue mualyemle changüihex ija bama Ijip nok tokya ibis hama owae apua, chichangba opong hama zangwat angkya owae apua?

³⁷Zangfwom owae akia ang tho angkya üntoxle owae zangfwom akhelaxle ija angkya ti thokle zang awat ang thoüi,

³⁸haxkhix haxdwon ang achangle ngoünkya ding to zang owae awatüi, iningkya je füikya khünak owa tüi?

³⁹Mailangbu hwom longlua to azwonle ngopongma, chichangba hwom longlua to osüt tanle nuipongma,

⁴⁰ibu ang osüt nange lomle koxpia? Mailang hosabu ang woknuak amüile koxpia?

⁴¹Hwom woknuak dukdukle pile aham ngopongma, tamchu hosa hwome osüt jule changpongma, ibu okha a owae tuxpuix?