Read Wancho Naga Job 39 Bible Online

Job 39 - Wancho Naga bible

Job 39

¹Müijaxbu chemtue puxpuix nang tikchami? Müikhibue hosa puxkya nang mike ngündüichahex?

²Ibue ma howok khato hosa obi nyix thompuix nange tikchami? Ibu pux angkya otu nange tikchami?

³Chemtue ibue chikux thongle akhuxlaxle hosabu chaxwan tok to chemtue alaiüi hex tikchami?

⁴Hosa hwom a faokha to hwom lualua to tsong; ibu paokya chatle tam chichat.

⁵Faomanbu ang mongtex ma ngo ang owae dan? Hwom a owae zu da ilaxle tüjong-tüjong to paole aham ang tom?

⁶Kue sak-hax a hwom hom ang koxpu, üntoxle hum tüikya haxsha to hwom ngo ang tompu.

⁷Hwom a khünaknu okhong-okha füi ochu to atsaile ngo, üntoxle hwom tsomlaxle mwot amok ang owaechu chitho.

⁸Haxnubu a hwome fumtsütle sax angkya nui ang chang, ikhato hwome sax ang fumhing lom.

⁹Fao maihupongpae nang ang mwot mokle kox ang chami? Zangangai le ijae nang kun ma wünpom ang tsu ang chami?

¹⁰Nange ija zukao tuita ma koplaxle mui-dang alin ang tho angchami? Chichangba ija ang nange nang haxtok ma müilin ang koxtsuak ang chami?

¹¹Nange zazazikya chixtsak chix ong to mongong üntoxle tüpong-tüpongkya nang mwot mokle faüile texpia?

¹²Chix manzai makhange nang ang pua-amünle faüi üntoxle nang tsaxnaknui tokya nang tsax asox-atomle faüile texpia?

¹³Ostris oe chemtukuxle momle ozang jeppuix! Ikoxlechu olo tuita ningle ostris tuita ngaxchu zik ang chitho.

¹⁴Hax angkya zangkham to naxkham ang ostris oe oti haxkha to danle toxle.

¹⁵Khünake cha füi nakle hia faomüibue ocha füi nakle oti ashixüi she-e ojao texle chiatak.

¹⁶She-e ibu oti she oti chichangkya ningle üntoxle she ipongpong azongle lütle alaikya tüi ojao chitex.

¹⁷Ongat ningle she a kue zingpu üntoxle kue she ang je kue chifapu.

¹⁸Ikoxlechu ija chemtue zik ma sütpuix, she-e man hia mankho ma ngakya pangwüi thajao ang tomle.

¹⁹Man tüle tsak-zong tüile zing ilaxle dingtom ma aza-apuale koxkya, Job, ija nang changchami?

²⁰Hwom a kuknubu lailaile füt tamchu onakua angaole khünak azale chang angkya, ibu ile nange zingpuixmi?

²¹Hwome haxsha to mongtsutsule ochabu füi ting; hwom a, ma ma zong ibibi tüipule zan to ka ang lai.

²²Hwome zapule chem ang nyakpuix ojao chitik, ilaxle chemningkya changloe chu hwom adople achat ang chitho.

²³Hwom tokma ngakya khünake twonkya chang-pax zanghan-cha to khlik-khlok le azing üntoxle fix-faxle ajik-ajep.

²⁴Tüle mongzom müikya füi anyonle, manbu a thochito apanle zik; chemtue nyazong mütpuix, hwom dangle ngo ang chitho.

²⁵Nyazong mütkya ozing füi tom-tomle hwome nakua angao; soxle hüiüi thoto wüi hwome zan ngan atumle lax, üntoxle kaxtom koxle alixachong hwome atat.

²⁶Olabue shuathong chito hule ozang pünpongma, pi angkya nang angkya tikle laxpia?

²⁷Olabue haxnu kho to ozopbu zingüima, nang kaxtom thatanle changchami?

²⁸Azwon ang onui müile tüikya Tüle tsuakya tsyenzi longbu kho to ijae ozop zai.

²⁹Ija makhange ijae nuisox hia tsailo pangnu khato langlaxle sax angkya hanpakma tütali to tanle hungo.

³⁰Müimangbu akhople olabu asox ilaxle ola hosa hwome müi aji ling.