Read Wancho Naga Job 40 Bible Online

Job 40 - Wancho Naga bible

Job 40

¹Job, nange Khüthak Zang füi apanle; nange ija dantoxüi hia, hia kaxlan faüi?

³Kue ongat zangwün ma wündao khato, JOWANPA. Kue kaxlan chem fa thoüi? Kue iboma akax ang münazongzi.

⁵Kue wünse to oziakaile kue akaxdaoa.

⁶Ifüima zangtsak-zangdung tokhange JOWANPA Job füi tamchatle zangwün.

⁷Athax nang tangthole ajongkox üntoxle kue atüikyabu to lankox.

⁸Ku a chichangkya ikoxle ang a changkya ang achang angkya hanpakma nange ku münsule aho ang azong pia?

⁹Nang ku füi tomwüi tsak-zongle tüipia? Nange ku tukux zang adung ang tsuak ang chami?

¹⁰Ile tsuak angkya jangchang thüiningle nang achuak achenkya hia ongam ma ajonghu; Chongwang hwom hia fuazangkya nyi-za laxhu.

¹¹Opang ngampuix ibu to hule anohu; nang mongtsik adanglax üntoxle ibu ahixkya ang achanglax.

¹²Changle, ibu to hulax üntoxle ibu fangto ajokox; hwom ajongle tüikya khama chichang-chizangkyabu nakle akhixkox.

¹³Hwom pangwüi haxkha to akhünkox; hwom amalum to khakle thomdao.

¹⁴Ifüima nang achuak-achen angkya pongwang lükya ang ku changüi ilaxle nange alüile lüt ang kopkya changkox-a le laxüi.

¹⁵Müima-nyaxshix Behemoth to hule anolax; Chixchu kue zingpu nangchu kue zingpu. Chixe maihu lailaile fum saxle,

¹⁶Ikoxlechu chix tsangtsa ma chemtukux janzüi tüipuix üntoxle chix tsangtsa hak ma chemtukuxle tsak-zong tüipuix!

¹⁷Chix müikua a sedar pün lailaile ajong, üntoxle chix ochabu angkya hakbu chemtukux tsakpuix.

¹⁸Chix zabu a wi-jan jan lailaile tsak, üntoxle chix chabu a jantombu lailaile tüi.

¹⁹Müi nüjen khama ohünotün tuita! Chix zingpupa tatae tix chix to lüt ang tho,

²⁰Chix woktux angkya hingzangbu a faomüibu azaple ngokya haxhuabu to nyem.

²¹Chix a hux füikya fum fangto shuile ngo, üntoxle thomnyen to nyemkya acha tham to chix khünle ngo.

²²Hux füikya fum hia shuasa kax ma nyemkya wilo pünbue chix ang hwom zangkhung to ngwotnui kox.

²³Shuanu tichen thua chix ojao chiza; Jordan shuanue chix thün to achaple changpongma chix dangle ngo.

²⁴Omik zim üntoxle chix kop ang owae thoüi? Chichangthüiba chix tundua owae tsünle aman ang thoüi?