Read Wancho Naga Job 42 Bible Online

Job 42 - Wancho Naga bible

Job 42

¹Ifüima Job-e JOWANPA kax to lan.

²JOWANPA, kue awanpu nang ma tsak-zong tüle tüile; nange chem mokse thütpuix ija nange pangwüi mok ang tsuakle.

³Ku a chemchu chitik-chiwankya angapa changüntoxle Kue nang-je nang-hwon bama chemle atüi ang thopule nange atüile. Kue tsing-ngax chitsingkya bama kue zangwüntüi kue tikle lax angkya hanpakma tüle chongkya ohünotünbu bama a.

⁴Nange zangwün pongma dangle apa angkya üntoxle nange atüikya kaxbu to kaxlan fa ang azong angkya nange ku füi akaxpu.

⁵Ledaokyakya ma kue mixe ku hama wünle koxdaokya tix awanle hüipu, ikoxlechu athax kue nang ma mik füijao ngünle laxdaoa.

⁶Ikhoma kue akax daokyabu bama ku tüle azak maxle ilaxle haxbu khato wotle mong alüixpu.

⁷JOWANPA Job füi zangwünkya ashuk füima, chixe Elifaz ang thüi: “Ku a nang üntoxle nang zuikhuibu füi mongtsikle, chemthüikoxle hünzome ku dapa Job-e akaxkya lailaile ku bama kaxtsing chiakax.

⁸Athax hünzome maihupong anüt üntoxle chunla anüt Job hato apüilax ilaxle hünzom hanpak ang tö tuita ningle laxkox. Job-e hünzom hanpak ang zangjopüi. Kue chix zangjop to lanüi ilaxle hünzome kop ang asule tüikya ningle kue hünzom thajao wünhaile chang ang müntom. Wünhax thüikoxle hünzome chix lailaile ku bama kaxtsing chiakax.”

⁹Elifaz, Bildad, hia Zofar hwome JOWANPA hwom füi chem mok angkya akaxpuix ija ningle mok, üntoxle JOWANPA Job zangjop to lan.

¹⁰Ifüima, Job-e hozui hwom mixsün azom hanpakma zangjople chang füima, JOWANPA chix tamchatle saxpu-luawang ang achang ilaxle amipongma tüikya to othom anyie nüile chix to mohiman.

¹¹Job hotüi-honao hia hona-honao hwom pangwüi üntoxle chu chix zuikhuibu chix wai ang ngui ilaxle chix hom ma chix füi tomle fongkhale sax. JOWANPA chix hato sikngün apüile fakya tokhange chix zolitle changdaokya bama hwom mongto kakle texkya kaxbu ngaile hwome chix ang mongsom kox. Pangnusae wüi chix ang ngun hia hun khoptüt tuipong kox.

¹²Chix tsün owangpongkya to nüile JOWANPA Job to mohiman. Athaxpi Job ang chun jatbün ali, hajat azok ut, hajat anyi maihu, ilaxle hajat tuita mantsak tüikya.

¹³Chix a sasün hwom anüt üntoxle sacha hwom azom hopa changkya.

¹⁴Chixe sacha nüchongnu ang Jemimah le amün, anyi-lükya sacha ang Keziah le amün, azom lükya sacha naoshuknu ang Keren Happuk le amün.

¹⁵Job sacha hwom lailaile osün müikya sheko zangfang ma chitüi. Hotüi-honao hwom füi tomwüile hopa hwom ang chuwüi chix mantswon ahanle kox.

¹⁶Ifüi Job zanglao hota boma punyi ozün ma ngo. Ile chixe hosu hia sutai hwom ngaxchu wüi ngün ang kop.

¹⁷Ifüima chix müimamale azule tsünlo ngolaxle zi.