Read Wancho Naga Job 9 Bible Online

Job 9 - Wancho Naga bible

Job 9

¹Changle, ibu kue thoto wüi atatle laxdaoa. Ikoxle khünak tuitae chix zangwün bama, Zang to chemle lüt ang thoüi?

³Chix füi kax ma owae alat tang thoüi? Owaechu chilan tho angkya kax; hajat-hajat chixe atüiüi.

⁴Zang je hia tsak-zong füikya changpu; chix füi alünle ajong ang owaechu münthopu.

⁵Kax chikoxngo homle chixe haxnubu apaole, mongtsik füi chixe ibu atsunle.

⁶Zang-e bütixsile chaxwan alox ang tomle; chaxwan nwonle thuathomkya thong longbu ang chix ngole.

⁷Zanghan dün chixe abax ang thole, Zangnake nyan ang chitomle lyettsibu tuk ang thole.

⁸Zangding pünle akhao ang Zang to owaechu münasun; Tinu angkya müima-nyaxshix chithom-e tingle münachat.

⁹Zang-e zangkho to lyettsibu ashale dan — afoxle tüikya lyettsi chepnu ningkyabu, üntoxle shuathongchi lyettsibu.

¹⁰Chixe mokkya ohünotün mwot keme tsingle lax ang müntho, Chix ohünotün mwot ma oshuk-okim müntüi.

¹¹Zang a kaile le, ikoxlechu kue chix ngün ang chitho.

¹²Chix mong atsutsu chixe lax, owaechu chix abax ang chitho; “Nange ija chem mokpu?”, le owaechu atüi ang chitho.

¹³Zang mongtsik ma ojao jan münaba. Chixe chix zanpa müima-nyaxshix Rahap, to asunkya mix chixe zutle akhix.

¹⁴Jangchangba Zang kax to lan angkya kaxbu kue chemle ataküi?

¹⁵Ku oma chem chitükya mix chang koxlechu kue moktho angkya a, Zang, ku kaxfünpa ma chingcha ju angkya ta wüi.

¹⁶Ile changkoxchu, chixe ku akax ang jangdanba, chixe ku kax to apaüile kue mün-ongtsuak.

¹⁷Chemtsai-chemkax chitüi khato, chixe ku thom-jo angkya zangchei ahüile ku to fuxtsüipu.

¹⁸Chixe ku ang süt atak ang chitom; chixe ku tsün sikngün-tuitaie awang ang tom.

¹⁹Zong ma laxle azongle anoüi hia? Zang füi zongzong ma hia? Kue chix khwa to paoüi hia? Owawae chix paotsuak angkya hia?

²⁰Ku oma chemchu chitüikya mix, ikoxlechu kax ma thaikya atatle. Ku zangwün pangnu ku thajao-wünhai ang achangle tüile.

²¹Ku oma chemchu chitükya mix, ikoxlechu chemchu münchang. Ku a ozün ma ngokya kakmix ikoxlechu naxchangdao. Oma hia thaikya chitüikya kem, Zang-e amüt angkya changle.

²³Oma chemchu chitüikya khünak sünto zile pao pongma, ija cha Zang nyile.

²⁴Chixe chaxwannu a chichang-chizangkyabu chak to danle. Chixe kaxfün mixbu pangwüi mik aduak ang tomle. Zang-e chimok thüikoxle ija owae mok?

²⁵Ku nyix-hi-hanpakbu a zikle-zikle paongole, Hanpak nyix tuita ngaxchu omüi chitüile.

²⁶Ku tsün a momle zikkya khua ham ningle, Zangshop laxle jux to shing ang jupu lawang ningle.

²⁷Ku nyinyole tamchu ku kak-lak alak angle azongle changpongma, ku-zan to ka ang ku sikngün pangwüi ku hato chat; Zang-e ku a thaipa ang laxle tüikya kue tsingle.

²⁹Ku thaipa ang laxle thom füima, ku ang chem mongma angkya?

³⁰Chemningkya sabon-ti füi sokoxchu ku ochax atsao ang müntho.

³¹Zang-e ku haxthom tüikya tswom khato tswonle awütle, Ilaxle kunyi-kuza ngaxchu ku ngünlaxle azakle.

³²Zang chuwüi khünak hex thüikoxba, kue chix kax to lanse; kukhi hyet bama kaxfün ang khwa to paose.

³³Ikoxlechu kukhi bama cha-tswon mix owachu chitüi — Zang kukhi bama owaechu kaxfün fa angkya mix chitüi.

³⁴Zang, ku to sikangün ngokya shong-zakfa! Nang küntsik mongma atsaile thomfa!

³⁵Ku a ojao münza, kue zangwün angkya wüi, Kue ku mongthwon loplaxle ngopu.