Read Wancho Naga Münchuak-Tsai 104 Bible Online

Münchuak-Tsai 104 - Wancho Naga bible

Münchuak-Tsai 104

¹JOWANPA achuak kox, ku chasa! O Zang, ku JOWANPA, nang chemtukux chongpuix! Nang a zangwang zapua füi fuazangle tüile.

²Nange nang to zangngai füi chwoplaxle tüile. Nange zangdingbu a nyihom lailaile pün,

³Nang hom a nange thak to titok ding to zai. Nange zangfwom a nang man-kanlin ang twon, ilaxle zangwin ozangbu ma ngale nang aham.

⁴Nange zangwin a nang kaxhomixbu ang twon ilaxle zangchangjep a nang dabu ang twon.

⁵Nange chaxwannu a otingsütle mongkya khama danle thom, ilaxle ija a otuechu münamoküi.

⁶Nange ija otok ma molo tinu füi tuita nyiwun lailaile chwople thom ang tom.

⁷Chemtue nange tibu to sale changüihex, ipongma ija pao ma süt; nang kaxtom akhongkya zing atatkya zuma hwom azutle pao ang süt.

⁸Ibu a haxnu tok to jenle paokya haxchithongbu to jenle ju, ilaxle nange hwom hanpak ang achwonle zingle thomkya onui to ngui.

⁹Hwome ija tamtaxkai-o lükya longzi nang tanle tox, ilaxle ibue chatle chaxwan tok to ule chang ang chilom.

¹⁰Nange shuasabu haxchabu to jenle ju ang, ilaxle shuajenbu haxbang-bang ma jen ang tom.

¹¹Ibue faomüibu ang ling angkya ti kox; ikhato fao mantsakbue tilan müile ti ling ang kop.

¹²Shua zui angkya pünbu ma, osabue ozop zai üntoxle tsai ngao.

¹³Zangding tokhange nange haxnu tok to zangwat ajo, ilaxle chaxwantok ang nang mohimane awang.

¹⁴Nange müibu hanpak ang fum chui ang tom ilaxle khünake lax-twon angkya hanpakma pünzuabu nyem ang tom. Ikhoma hwome saxziak saile alai ang tsuak

¹⁵ilaxle hwom mong amüi ang grep ziakbu alai, olip müngabu füi pwonla naxtüi ang alaile kox, ilaxle hwom janzüi naxtüi ang süt alaile kox.

¹⁶Lebanon angkya sedar pünbu makhange zangwat okhonguile kop: ibu a chix jaoe küikya JOWANPA pünbu changle.

¹⁷Ikhato osabue hwom ozopbu zing; olobue pünsabu ding to hwom ozopbu zing.

¹⁸Müijaxbu a tsuakya haxnukhobu to ngo, ilaxle müijax ojüibu zak-kho to azwonle ngo.

¹⁹Lyet-tex hantya angkya hanpakma nang lyetnu alai; zanghane han ahom angkya tuthüt awanle ngo.

²⁰Nange zangnak zing, ilaxle zangnak fangto faomüi pangwüi koto lai.

²¹Zang-e fakya osüt to hule müitanle changpongma, mailang hosabue tse.

²²Chemtue zanghan dongpuix, hwom chatle chat ilaxle hwom longkunbu khato jiple ngo.

²³Ifüima khünaknu a hwom mwot mok ang laile pao üntoxle hanhom kople mwot mokle ngo.

²⁴JOWANPA, nange tüli-jali huanuma zing! Ibu pangwüi nange chemtukux jezaikya füi zingpuix! Chaxwannu a nang chakzing zünmok füi awangle tüile.

²⁵Molo tinu, chongkya hixkyabu tüihupu, ikhato e-ang chithole zünmoknüsa tüihupu, chongkya, hixkya pangwüi tomwüia.

²⁶Ija tok to khuabu aham, üntoxle Lewiathan ija khato azaple ngo, nange zingkya ija ti müinu-nyaxpa a.

²⁷Hwom pangwüie nang totix onglax ngopu hwome lom pongma osüt kop angkya hanpakma a.

²⁸Nange ibu hwom ang kox, ilaxle hwome ibu sax; nange hwom ang osüt kox, ilaxle hwom mongzom müile ngo.

²⁹Nange tok ahopongma hwom abütle za; chemtue nange nang zak syetle paopuix, hwom zile pao, hom zingle alaikya haxbu hato hwom chatle chat.

³⁰Ikoxlechu chemtue nange hwom ang zakdün koxle changpuix, hwom zingkya ang achang; nange chaxwannu ang khüzün hozün kox.

³¹JOWANPA fuazangkya otuechu chiashuk toxle naxngokox! Chixe chempang zingle changdao laxpuix, ibu füi JOWANPA ang mongmüikya naxtüi!

³²Chixe chaxwannu to hu, ilaxle ija sile alox; chixe haxnubu to lyet, ilaxle ibue wünkhut alaile awüt.

³³Kue ku tsünjang masule JOWANPA achuakle tsai ngaoüi; ku ozün ma ngokya kople kue ku Zang achuakle tsai ngaoüi.

³⁴Ku tsaizu ding füi chix mongmüikya naxtüikox, chemthüikoxle ku mongmüi a chix tokhange tix hüipu.

³⁵Chaxwannu angkya ochaxbu olithule naxchang; chichang-chizangkya mix tuita chitüile naxchang. JOWANPA achuak kox, ku chasa! JOWANPA achuak kox!