Read Wancho Naga Münchuak-Tsai 107 Bible Online

Münchuak-Tsai 107 - Wancho Naga bible

Münchuak-Tsai 107

¹“JOWANPA ang münchong fakox, chemthüikoxle chix a müihule; chix mongkün ma oshuk müntüi!”

²Ija kaxfa JOWANPA achuakle chatchatnaole zexkox, chixe khosünkyabu hünzom pangnue. Chixe zanpabu chak tokya hünzom azünle kople

³ilaxle chixe mixnok chaxwan tokya hünzom chatle apüile, handün hia hannop tokya, shuakux hia shuathong tokya.

⁴Züizüi a lom chitüikya sak-hax to samle aham ilaxle hwom azangle ngo angkya tingnu to ngui angkya lom chiataktsuak.

⁵Hwom ang tüle wokno-tilanle chang ilaxle azang angkya mongchen ojao chitüile asam.

⁶Ifüima hwom sikngün tokhange hwome JOWANPA nyak, ilaxle chixe ibu thangnak chak tokya hwom azün.

⁷Chixe hwom tangthokya lomnu to zunle pao, hwom ngotho angkya tingnu to a.

⁸Tamchizakkya chix mongkün hanpakma hwome JOWANPA ang münchong fa angkya wüi changpu, chemthüikoxle chixe hwom hanpak ang ohünotün mwotbu huanuma mokdaoa.

⁹Tilan ma zingokyabu ang chixe tilan amüikox ilaxle müikya sütling füi woknuak ma ngokyabu ang wok afwot ang tom.

¹⁰Züizüi a thün huishole zangnak fangto ngole tüikya, janbüi füi khalaxle kun-khato a.

¹¹Ija a hwome Khüthak Zang tsak-zong füi alünle changkya khoma ilaxle chixe adangle fakya chilaxle changkya khoma.

¹²Mwt-tsak mokle ngokya tokhange hwom a zoshun; hwom nguakle pao, ilaxle hwom to owaechu chifong.

¹³Ifüima hwom sikngünle ngokya tukma hwome JOWANPA to nyak, ilaxle chixe hwom ija thangnak chak tokya azün.

¹⁴Hwome thün naktakle zangnak fangto ngokya chifün tokya chixe alai ilaxle hwom to khale thomkya janbüibu akhixle pao ang tom.

¹⁵Chizakkya chix mongkün khoma hwome JOWANPA ang münchong fa angkya wüi changle, chixe hwom hanpakma mokdaokya ohünotün mwotbu bama a.

¹⁶Chixe wi makhange zingkya kahakbu amale awüt ilaxle jantombu thuple ama.

¹⁷Züizüi a ongatbu, ma ochaxbu khoma sikngünle ngo tamchu hwom chichangchizangle tüikya khoma;

¹⁸hwom a süt ngünkya khama ajong ang chitho ikhoma hwom a ziüikhakha.

¹⁹Ifüima hwom sikngün tokhange hwome JOWANPA nyak, ilaxle ibu thangnak chak tokya hwom azün.

²⁰Chix kaxtom makhange chixe hwom kak amüi ilaxle zuk-kha tokya hwom azün.

²¹Chizakkya chix mongkün khoma hwome JOWANPA ang münchong fa angkya wüi changle, chixe hwom hanpakma mokdaokya ohünotün mwotbu bama a.

²²Töbu koxkya füi hwome chix ang münchong fa angkya wüi, ilaxle mongmüi tsaibu füi chixe hwom hanpakma mokdaokyabu mo wün angkya wüi changle.

²³Züizüi a tinu mongto khua ma ahamle ngokya, Molo Tinu mongto hwom woktux ang achakle a.

²⁴JOWANPA chem moktsuak angkya hex, ibu ohünotün mwot hwome tinu tok to ngünle lax.

²⁵Chixe kaxtom koxkoxle, tüle zongkya zangwin awin ang süt ilaxle tinu tichap to lüixle achap.

²⁶Khuabu a dingkho to zangwin to nwon ilaxle single jithong to adüt. Iningkya thama ma khua zopmixbu ang hwom mong chichong tsuak;

²⁷hwom a jutok mixbu ningle shushüi-nguakzuile abünle max: hwome awanle ngokya olom chem angchu chichang.

²⁸Ifüima hwom sikngün tokhange hwome JOWANPA nyak, ilaxle ibu thangnak chak tokya hwom azün.

²⁹Tüle shixkya zangchei zangwat chixe azak, ilaxle tinu tichap dangle pao.

³⁰Ile dangkya khoma hwom ang mongmüi, ilaxle hwom tase tsukya shuakax to chixe hwom haxmüi zangmale apüi.

³¹Ojem chifünkya chix mongkün hanpakma hwome JOWANPA ang münchong fa angkya wüi changle, hwom hanpakma chixe mokdaokya ohünotün mwotbu bama a.

³²Khünaknu tusox ma hwome chix chongkya bama apuk angkya wüi changle ilaxle nguawangbu tusox pomtho ma chix mün achuak angkya wüi.

³³JOWANPA shuajenbu komkaile zop ang tom ilaxle shuasa jenle jukyabu zak ang tom.

³⁴Chixe haxzao füikya haxtok chilaxli hun haxtok ang achang; ija a ija haxtok ma ngokyabu chichangchizangle tüikya khoma changle.

³⁵Chixe sak-hax a tüküi ang achangle alüix ilaxle haxkozan a shuajenbu ang achang.

³⁶Chixe ikhato woknuak ma ngokya khünakbu ngo ang tom, ilaxle hwome ngo angkya hanpakma ikhato tingnubu zing.

³⁷Hwome haxtok ma sax küi ilaxle grep zubu küi-thwomle chang ilaxle okhonguile puamün ang kop.

³⁸Chixe chix khünaknu to mohiman, ilaxle hwom ang su-sabu huanuma tüi; ilaxle hwom müizyembu chixe sütsa-sütsale tsa ang tom.

³⁹Mongtsik ashukle chifa fang ma thomkya hia sikngün ang tomkya makhange chemtue Zang khünaknu to lütle tamchu adix-adale changpuix,

⁴⁰Ikoxlechu hwom to afangle thomkyabu mongngam ang tom ilaxle hwom a lom chitüikya sak-hax to samle aham ang tom.

⁴¹Ikoxlechu chitüi-chinangkyabu chixe hwom omüt-osam chifün tokya khosünle kop ilaxle hwom homkhabu a müizyenbu lailaile putsale chang ang tom.

⁴²Otsao khünakbue ija ngünlelax ilaxle mongmüi, ikoxlechu ochax khünakbu a pangwüi adang.

⁴³Jetüi-hwonlangle tüikyabu pangnusae ibu bama ajangle naxchang kox; hwome chithwonkya JOWANPA mongkün changle le naxlaxkox.