Read Wancho Naga Münchuak-Tsai 109 Bible Online

Münchuak-Tsai 109 - Wancho Naga bible

Münchuak-Tsai 109

¹Kue nang achuakpu, O Zang; nang dangjale taxngo!

²Chichangchizangkya hia tselopbue ku to single. Hwome ku bama khualople

³ilaxle hwome ku mo amale wünle; chemtsai-chemkax chitüi khato ku zan to kale.

⁴Kue hwom to mongkünle changkox ngaxchu hwome ku ang münchang lüwüi thüile; kue hwom bama zangchu jopkya.

⁵Ku müikya lüixto hwome ku to oma khom ilaxle mongkün lüixto miktsak olüix khom.

⁶Laxli chitüikya kaxfünmix züizüi ku zanpa kaxfün ang kamlax, ilaxle chix zanpa tuitae chix ma kax-hux fele chang ang tomkox.

⁷Tse-atwonle changkya ma chix thaile bang ang tomkox; ilaxle chix zangjop ngaxchu mütkop ang laxkox!

⁸Chix tsün a lebama wüi ashukle naxchang kox; ilaxle chix mwot a owawae naxmok-kox!

⁹Chix sasün hwom a zasa-khaxsabu ang naxchang kox, ilaxle chix kako chuwüi thanu ang naxchang kox!

¹⁰Chixsu chixsa hwom a hom-hax chitüikya jusaxmixbu ang naxchang kox; pünle ama thomkya hwom ngwotnui angkya hwom jwonle naxapaokox!

¹¹Thashe tüikya khünakbue chix tuina komle naxpaokox, ilaxle chixe mokkya hingchak pangwüi mixwünbu naxkopkox.

¹²Owaechu hwom to chingcha chitüile naxchang chichangba chixe khaxsa ang danle toxkya su-sa hwom to owaechu chihu-chime le naxchang.

¹³Chix sixlibu komkaile zile naxsam, ilaxle mainao hwom tsün to chix mün alakasamle naxchang.

¹⁴JOWANPA hopu-hopa hwom ochax texle naxatak ilaxle chix onu ochaxbu thailak fakya chitüile naxchang.

¹⁵JOWANPA hwom ochaxbu texle atakle naxchang, ilaxle hwom a komkaile alakasamle naxchang!

¹⁶Chingchajajale tüi angkya ojao texle chiatakkya khünak tuita; chixe khünakbu to zothuple chitüi-chinangkyabu, tuimix-nuakmixbu, üntoxle fong-tsoxle fa angkya owachu chitüikyabu langle awüt.

¹⁷Chixe thuak-zomkya to mongkünle: chix wüi othuak-ozom ang naxchang! Chixe mohiman koxkya thua anule: chix ang owaechu mohiman chikoxle naxchang!

¹⁸Jaopo ma chix zapua chemle tüipuix ilailaile chixe thuakzomle changle; chix-thuak chix-zome alüile chix tsangtsa ti ma asomkya ningle naxasomkox ilaxle chix za tochu münga füi papupule naxpakox!

¹⁹Ibue chix to nyifüi chwop-pupule naxchwopkox ilaxle züpak lailaile othuithuima chix hitle naxthomkox!

²⁰JOWANPA, ku zanpabu to ile sikngün apong ang tomkox: ku zongto iningle chichangchizangle atsai-akaxkyabu to a!

²¹Ikoxlechu, O Zang ku JOWANPA, nang kaxtsao tüikya ningle ku to asunhüi, ilaxle müikya nang mongkün tüikya khoma ku sünle kop-hüi.

²²Ku a chitüi-chinangkya tuimix-nuakmix changle; ku mong othongdua alople ku mongto kakle.

²³Hansong chaxba tuita ningle ku a maxüi khakha; ku a zünmok ningle jeple paole.

²⁴Süt okhonguile chikop laxle ku chikuxbu a zong jaojao chitüile naile; khwon hia za boma kuma chemchu müntüi.

²⁵Chemtue khünakbue ku ngünpuix, hwom kucha nyi ang sütle; mongngam füi hwome ngom awing.

²⁶Ku to fonghüi, ku Zang O JOWANPA ojem chifünkya nang mongkün füi ku khosünhüi!

²⁷Nang a ku khosünpa changpule ku zanpabu ang tsing ang tomkox.

²⁸Hwome ku to thuakzomle chang koxlax, ikoxlechu ku to nange mohimanle changüi.

²⁹Ku zanpabu a chingcha chitüikya füi chwople naxchang kox; zakkop a hwome zapua ningle naxawun kox.

³⁰Kue JOWANPA ang akhongle münchong faüi; kue khünaknu tusox ma chix achuak-achenle changüi,

³¹chemthüikoxle chixe chitüi-chinang khünakbu kho-awale ilaxle hwom azik-amüt angkya bama tsaitsuak-kaxtsuak laxle ngokyabu chak tokya hwom khosünle kople.