Read Wancho Naga Münchuak-Tsai 116 Bible Online

Münchuak-Tsai 116 - Wancho Naga bible

Münchuak-Tsai 116

¹Kue JOWANPA to mongkünpu, chemthüikoxle chixe ku kax atatle; chixe ku zangjopbu zing apale.

²Kue chix nyak pupu ma chixe ku kax to apa.

³Zikmüt-mangkho thama ku akhoplaxle tüikya; aman laxle zuk-khato amüt angkya ziama ku hato soxle tüikya; Ku a zakya hia monghike awang laxle tüikya.

⁴Ifüima kue JOWANPA to nyakle thüi: “Kue nang ma chingcha jupu JOWANPA, ku khosün hüi!”

⁵JOWANPA a chingcha hia müikya changle; kem Zang a chingchajaja füikya changle.

⁶JOWANPA kho-awa angkya mix chitüikyabu kho awale; chemtue ku thomzün ma tüipuix, chixe ku khosün.

⁷Ku mongkha ma ongkya tüihüi, chemthüikoxle JOWANPA a ku zongto müikya changle.

⁸JOWANPA ozik-omüt tokya ku khosün; chixe ku mikfi thwon ang tom ilaxle ku to anao ang chitom.

⁹Ikhoma ozün ma tüikya chaxwannu ma ku JOWANPA füi ahampu.

¹⁰“Ku a bakle zutle akhixdaoa”, le thüipongma ngaxchu chizakle kue mongong ngopu;

¹¹ku zalaxle “Owa to mongong angkya müntüi”, le thüipong ma ngaxchu.

¹²Chix ku zongto müikya pangwüi bama kue JOWANPA ang chem fatsuaküi?

¹³Ku khosün hanpakma münchong fa ang, kue JOWANPA hato grepti-ju tö apüile koxüi.

¹⁴Chix khünaknu pangnu tusox ma kue chem tsaosax daopuix ija kue chix ang koxüi.

¹⁵Chemtue chix khünak tuita zile paopuix, ijae JOWANPA mongto chemtukux kakpuix!

¹⁶JOWANPA, ku a nang dapa changle; anu lailaile kue chuwüi nang thothapu. Ozik-omüt tokya ku nange sünpu.

¹⁷Kue nang ang münchong fakya tö tuita koxüi ilaxle ku zangjop tö nang ang koxüi.

¹⁸Nang khünaknu tusox ma, Jerusalem angkya nang Zangshwom-Hom otsao nui ma, kue chem tsaosaxle changdaopuix ija kue nang ang koxüi. Kue JOWANPA achuak-achenüi!