Read Wancho Naga Münchuak-Tsai 132 Bible Online

Münchuak-Tsai 132 - Wancho Naga bible

Münchuak-Tsai 132

¹JOWANPA, chemtuechu Dawid ilaxle chixe adule hüidaokya fuxtsüi ibu alakle taxchang.

²JOWANPA, chix kaxtsaobu texle ataklax, chixe nang füi tsaotsütle changkya ibu a, O Jakop Khüthak Zang:

³“Ku hom to münchat chichangba lya to mündong;

⁴kue nazak münlax chichangba münjip,

⁵kue JOWANPA ang onui koxtsuakkya kople, Jakop Khüthak Zang ang hom tuita koxtsuakkya kople.”

⁶Bethlehem ma kwome Tsaotsüt Suak bama atat ang koppu, ilaxle ija kwome Jearim haxtok ma atakle.

⁷Kwome thüi: “Hai, kempi JOWANPA hom to paohax; chix chongwang ngwotnui tunthoma chix to shwomhax.”

⁸Tsaotsüt Suak, oja nang-tsak nang-zong hex, ija koplaxle Zangshwom-Hom to nguihüi, O JOWANPA, ilaxle jento ikhama ngohüi.

⁹Nang zompu-zangpabu a otsaoe awunlaxle naxngo, nang otsao khünaknu mongmüi to nax-akhong.

¹⁰Nange nang dapa Dawid füi tsaosaxle changpu; nange zünle kopkya wanghompa taxalakünkox, JOWANPA.

¹¹JOWANPAe Dawid füi otsingtsing kaxtsao sax, ija tsaosüt hato chixe tok aho angkya chichang: “Nang sasün hwomkha angkya tuitae nang manma wanghompa ang achangle apünüi.

¹²Nangsu-nangsabue ku füikya Tsaotsüt otya ma thomle jangchang ilaxle kue hwom ang koxkya kaxtombu kax ma laxle jangchang, hwom su-sa hwom chuwüi othuithuima wanghom ang nang tüntong ma thungle ngo ang kopüi.”

¹³JOWANPAe Zaion a zünle kopdaoa; chixe ijakha chix hom-hax ang laxse tsule:

¹⁴“Ijongkha a othuithuima ku ngwotnui changle; imakhange apün-awangle chang angkya ku ang mongtsule.

¹⁵Kue Zaion to she-e lomkya komkaile koxle mohimanüi; she tüi-nuak kue sütling kop-lokya füi mongzom müi ang tomüi.

¹⁶She zompu-zangpabu to kue khosün füi mohimanüi, ilaxle she ma tüikya nang otsao khünakbu mongmüi to akhongüi.

¹⁷Ikhama kue Dawid su-sa hwom khama tuita pongwün wang ang achangüi; Münga füi lile kamle kop angkya kue achwondaoa.

¹⁸Chix zanpabu to kue zak-kop-thajao füi awunle koxüi, ikoxlechu chix wangting a ahak-aluale tamchu zaxzangle changüi.”