Read Wancho Naga Münchuak-Tsai 135 Bible Online

Münchuak-Tsai 135 - Wancho Naga bible

Münchuak-Tsai 135

¹JOWANPA achuak kox! JOWANPA mün achuak kox, hünzom JOWANPA dabue chix mün achuak kox,

²hünzom JOWANPA hom ma ajongkyabue, tamchu Zang Zangshwom-Hom ma ajongkyabu pangnusae!

³JOWANPA achuak kox, chemthüikoxle JOWANPA a müikya changle; chix mün achuakle tsai ngaokox, chemthüikoxle chix a chingchajajae awangle tüile!

⁴Chemthüikoxle JOWANPAe Jakop a chix hanpak ang kamdaoa, Israel khünaknu a chix kux ang kamdaoa.

⁵Chemthüikoxle kue tsingle, JOWANPA a chongkya changle, ilaxle kem Jowanpa a baozangbu pangnu thak angkya changle.

⁶Ding hia hax ma, tamchu tinu hia ija othong to, chix zongto amüimüi ma mokle.

⁷Haxtua-zangnam to zangfwombu lai ang tomkyachu chix changpu, chixe atsak-adung laxle zangwat ang tom ilaxle chix pungkha tokya zangwinbu ahüi.

⁸Ijip haxtok to tüichongsasa amüt ang tomkyachu chix changkya, khünak kha angkyachu üntoxle müikha angkya chuwüi;

⁹Chixe hünzom tu ma, Ijip chaxwan to, Farao hia chix lompa-kaxpabu pangnu zongto ohünotün mwotbu tüle lai ang tom.

¹⁰Chixe mixnok-mixnokbu to anaole hüi ilaxle tüle tsak-zong füi tüikya wanghom-wanghombu mik amüt.

¹¹Amor nok wanghompa Sihon, Bashan nok wanghompa Og, ilaxle Kanan haxtok angkya wangtingbu komkaile amüt.

¹²Chixe ibu haxtok a chix khünaknu ang hwom haxtok ang kox; chixe ibu ma khünaknu Israel nok ang kox.

¹³JOWANPA, nang a jento Zang changle le apuküi; tsünthom pangnue nang texle ataküi.

¹⁴JOWANPAe chix khünaknu kho-awaüi; chixe chix dabu to chingchakya tüiüi.

¹⁵Chaxwannu jat-libu baozangbu a hun hia khop füi zingkyabu changle; ibu a khünak chak füi zingkyabu changle.

¹⁶Ibu ma wikha tüile, ikoxlechu akax ang müntho, ilaxle mik tüile, ikoxlechu chingüntsuak.

¹⁷Ibu ma na tüile, ikoxlechu atat ang chitho; ibue zakdün ang ngaxchu chitho.

¹⁸Opange ibu zingpuix tamchu ibu to mongong tüipuix ibu a hwome zingkya chapabu ningle naxchang!

¹⁹Israel khünaknu, JOWANPA achuak kox; chix achuak kox, hünzom Zang zompu-zangpabu!

²⁰Hünzom Liwi hwom, JOWANPA achuak kox; chix to shwomkyabu hünzom pangnusae chix achuak kox!

²¹Zaion ma tamchu Jerusalem, chix hom ma JOWANPA achuak kox. JOWANPA achuak kox!