Read Wancho Naga Münchuak-Tsai 143 Bible Online

Münchuak-Tsai 143 - Wancho Naga bible

Münchuak-Tsai 143

¹JOWANPA, ku zangjop zing atatlax! Nang otsao ma kue ju-lomkya to apahüi; chialekya nang mongong füi ku to lanhüi!

²Nang dapa ku to thwontsingle taxchang; nang miksho ma sukya mix owachu müntüi.

³Ku dapabue ku to-zile changle ilaxle ku to owüiole lütle. Hwome ku kun zangnak khato shodaoa, ilaxle ku a kaiwüi zingoünkya ningle changüna.

⁴Ikhoma ku a leüikhakha; ku a huanuma mongmaxle tüile.

⁵Leünkyabu hanpak kue texle atakle; nange mokdaokya pangnu bama kue ajangle laxle, nang mwot pangwüi kue mongto thütle atakle.

⁶Zangjople kue ku chak nang hato nwonpu; hax zuakya lailaile nang sungkya tilane ku mongkha zanle zile. Selah

⁷JOWANPA, athax ku to lanhüi! Kue ku monghom pangwüi asamdaoa. Nang ku thoto khünle taxngo, chichangba ku a amalum to ledaokyabu khato ngo angkya changüi.

⁸Chizakkya nang mongkün bama nop-fole ku hama wünhüi, chemthüikoxle kue ku mongong nang ma thompu. Ku zangjop nang hato dongle; ku lese lom ku hama ahohüi.

⁹JOWANPA, kho-awa angkya lomle ku nang hato ngui; zanpabu chak tokya ku khosünfa.

¹⁰Nang a ku Zang changle; nang mongtex mok angkya ku hama anole fahüi. Ku zongto müihüi, ilaxle thomzün chitüikya lom to ku lomzunhüi.

¹¹JOWANPA, nang kaxtsao tüikya ningle ku khosünle kop-hüi; nang müikyae thamabu chak tokya ku azünhüi!

¹²Ku tokya nang mongkün tokhange, ku zanpabu mik-amüt-hüi ilaxle ku to zothuple changkyabu pangwüi max ang tomkox, chemthüikoxle ku a nang dapa changle.