Read Wancho Naga Münchuak-Tsai 145 Bible Online

Münchuak-Tsai 145 - Wancho Naga bible

Münchuak-Tsai 145

¹Kue nang chongkya zang fuaüi, ku Zang üntoxle ku wanghom; oshuk chitüile kue nang ang münchong faüi.

²Nyixfo to kue nang ang münchong faüi; oshuk chitüile kue nang achuaküi.

³JOWANPA a chongkya changle ilaxle chix a ding to achuak angkya changpu; chix chongkya a khünake tsingang chithokya changpu.

⁴Nange chem mokdaolaxpuix ija a tsün tuita makhange ata tsün to achuakle le angkya changle; hwome ohünotün nang mwotbu khuapule changüi.

⁵Hwome nang fuazangkya hia chongwangpa bama zangwünüi, ilaxle kue ohünotün nang mwotbu bama zule ajangle changüi.

⁶Khünaknue chongkya nang mwotbu mo wünle changüi, ilaxle kue nang chongkya khuapule changüi.

⁷Hwome nang müikya pangnusa mo wünüi ilaxle nang chingchajaja bama tsai ngaoüi.

⁸JOWANPA a mongkün hia chingchajaja füikya changle, zaxhun ma tix mongtsiküi ikoxle mongkün ma ojem chifünüi.

⁹Chix a noknusa zongto müile ilaxle chix chakzing pangwüi zongto chingchakya tüile.

¹⁰JOWANPA, nang chakzing zünmok pangnusae nang achuaküi, ilaxle nang khünaknu pangnusae nang ang münchong faüi.

¹¹Hwome nang chongwang tsak-zong fuazangkya mo wünüi ilaxle nang janzüi mo wünüi,

¹²ikoxle tix pangnusae wüi nang ohünotün mwotbu tik tamchu nang wangting fuazang bama tsingle lax angkya hanpakma.

¹³Nange apün-awangkya ma oshuk müntüi, ilaxle nang a oshuk chitüile chongwangpa changle. JOWANPA a chix kaxtsaobu bama ojao münthai; chix mwot pangnusa wüi chixe chingcha füi mokle.

¹⁴Thangnak-tuitai ma ngokyabu to chixe asunle; fangto dütle ngokyabu chixe nwonle.

¹⁵Monghom abakle zünmok pangnusae nang to hule, ilaxle hwome lom pongma nange hwom ang süt koxle.

¹⁶Nange hwom ang okhonguile koxle ilaxle pangnusa angwüi mongzom amüile.

¹⁷Chix mwot pangnusa towüi JOWANPA a otsao changle, chix mwot pangwüi chixe chingchajaja füi mokle.

¹⁸Chix se-lomle changkyabu zongto chix a nuisox ma tüile, künkox-mongkoxle se-lomkyabu zongto a.

¹⁹Chix achuak-achenle changkyabu hanpakma laxlili bakle chixe koxle; chixe hwom sopkya zing atatle ilaxle chixe hwom sünle kople.

²⁰Chix to mongkünle tüikya pangnusa kho chixe awale, ikoxlechu chichangchizangle tüikyabu chixe olithu ang tomle.

²¹Kue chuwüi JOWANPA achuak-achenüi; chix chakzing zünmok pangnusae wüi oshuk chitüile chix otsao mün achuak ang tomkox.