Read Wancho Naga Münchuak-Tsai 25 Bible Online

Münchuak-Tsai 25 - Wancho Naga bible

Münchuak-Tsai 25

¹Nang ang, O JOWANPA, kue ku zangjop koxpu;

²ku Zang, kue nang to mongongpu. Zakkop hia mixe lüt angkya chak tokya nange ku khosünhüi; ku osho ngünlaxle zanpabue wanjai ang taxtom!

³Nang to mongong tüikyabu to mixe münlüt toxüi, nang füi alün-aloxkyabu füi ochwonpai ma apongüi.

⁴JOWANPA, ku hama nang lomtang apuafahüi; ibu kue awan ang tomhüi.

⁵Nang otsingtsing lom ma ku ngo angkya anwot-ano fahüi, chemthüikoxle nang a ku khosünle fakya ku Zang changpu. Jento kue nang to mongongpu.

⁶Kaitokhange wüi nange ahole hüikya nang chingcha hia chizakkya nang mongkün texle atak hüi, O JOWANPA.

⁷Naosün pongkya ku ochax hia ku thaidaokyabu thailak tüihüi. Chizakkya nang mongkün hia nang müikya füi, ku texle atak hüi, JOWANPA!

⁸Chemthüikoxle JOWANPA a otsao tamchu müikya changle, chixe ochax khünakbu hama hwom le angkya lom anwot-ano fale.

⁹Puinaikyabu chixe sukya lomtang to zun, hwom hama chix mongtex anwot-anole kox.

¹⁰Chix Tsaotsüt hia chix kaxtombu thomkya khünak pangnu, mongong tüikya hia mongkün füi chixe azui.

¹¹Nang tsaosüt thom hüi JOWANPA, üntoxle ku ochaxbu thailak tüihüi, chemthüikoxle ibu a huanu changle.

¹²JOWANPA chathua zakya tüikyabue hwome to angkya lomtang chix makhange awanle laxüi.

¹³Hwom a othuithuima ahak-aluale tüiüi, üntoxle hwom su-sabue haxtok kopüi.

¹⁴JOWANPA a kax ma laxle tüikyabu zuikhui changpu üntoxle chixe chix Tsaotsüt bama hwom füi kaxshing kopkya ang changpu.

¹⁵Othuithuima kue JOWANPA to fongkya lomle hupu, ilaxle chixe ku thama chak tokya azünpu.

¹⁶Kuchi to huhüi, JOWANPA, üntoxle ku to chingchahüi, chemthüikoxle ku a ku tata wüi tamchu shonaile tüile.

¹⁷Mongthang ngokya ku nazak ang tomhüi, sikngün pangnu tokya ku khosünhüi.

¹⁸Ku sikngün-mongthangbu ngünle laxhüi, ku ochaxbu thailakkya tüihüi.

¹⁹Ku zanpabu chemtukux tüipuix hukophüi; hwome ku to chemtukux tsakpuix ngünle kophüi.

²⁰Kho-awale ku khosün kophüi, ku to anao ang taxtom. Azang angkya hanpakma ku nang hato nguipu.

²¹Nang a müikya tamchu sukya, nange ku khosünle thom hüi, chemthüikoxle kue nang to mongongpu.

²²Hwom sikngün pangnu chak tokya, O Zang, Israel nok nang khünakbu khosünle thomhüi!