Read Wancho Naga Münchuak-Tsai 31 Bible Online

Münchuak-Tsai 31 - Wancho Naga bible

Münchuak-Tsai 31

¹Zyakople thom angkya lomle, JOWANPA, ku nang hato hüipu; chemtuechu ku to anao ang taxtom. Nang a otsao Zang changle; ku khosünhüile kue joppu!

²Ku kax apahüi! Athax ku khosünhüi! Ku ziakop angkya hanpakma ku khangkhomnui; tamchu ku kho-awa angkya ziakop ang nang achanghüi.

³Nang a ku khangkhomnui üntoxle ziakopnui changle; nang kaxtsao ningle ku thothut-hüi üntoxle lomzunhüi.

⁴Ku hanpakma thale tüikya kam pangnu chak tokya ku azünhüi; thama chak tokya azang ang ku ang zakzui angkya nui koxhüi.

⁵Kue ku nang chak to danpu. JOWANPA, nange ku khosün hüi; nang a mongong ma chialekya Zang changle.

⁶Othai baozangbu to shwomkya mix thua nang anule, ikoxlechu kue ku mongong nang ma thompu.

⁷Ku ang pwonlatungle mongmüiüi tamchu chithwonkya nang mongkün khoma a. Ku sikngün nange ngünpu; ku thangdangkya nange awanpu.

⁸Nange ku zanpabu ang ku kop ang chitom; ku mong atsutsu khato aham angkya nange ku ang mongtex panpu.

⁹JOWANPA, ku to chingchahüi, chemthüikoxle ku a thangnak ma tüile; tüle sople ngokyae ku mik nadaoa; ku a komkaile chamax-muasamle changdaoa.

¹⁰Mongtsikkyae ku ang zaktutle changdaoa, ilaxle künmax-mongshankyae ku tsün amoxdaoa. Thangnak pangnu tokhange ku a shonaile maxdaoa;

¹¹Ku zanpabu pangnu, tamtailechu ku tomzibu, hwome ku to asupule adale. Ku süntsing münwanbu ku-thua zabakle; lomnutang to hwome ku ngünpongma hwom zikle paole.

¹²Ku a zidaokya khünak tuita ningle, hwom pangnusae ku alakle; Ku a awüt daokya tütali ningle.

¹³Ku zanpabu obiobi huxsa zangwün kue atatle; ku akhople thamama wüi. Hwome ku zongto chichangkyabu mok ang tungle ngole, ku mik amüt ang tungle ngole.

¹⁴Ikoxlechu ku mongong nang ma thompu, O JOWANPA; nang a ku Zang changle.

¹⁵Othuithuima nange ku to humele ngopu; ku zanpabu chak tokya nange ku khosünhüi, ku zothuple ngokyabu chak tokya a.

¹⁶Nang dapa to chingcha füi huhüi; ojem chifünkya nang mongkün ma ku khosünle thom hüi.

¹⁷Kue nang nyakpu, JOWANPA; ku mong amaxle chang ang taxtom. Chichangchizangkyabu mong atho ang tomkox; hwom a dangjale amalum tole ang tomkox.

¹⁸Ibu tselopbu dang ang tomkox: ongam hia mongngam pangwüi opangsae otsao bama künngam-mongngam füi zangwünpuix, ibu pangwüi.

¹⁹Nang achuak-achenle tüikyabu hanpakma nange thomle tüikya oli, chemtukuxle ohünotün hex! Nang chemtukux müipuix ija noknusae awan ngopu, nang to mongong thomkyabu nange chemle ziakople kho-awa thompuix!

²⁰Nang womle tüikya ziamong ma nange hwom chemle khomle thompuix mixe tungkyabu chak tokya a; thama chemchu chitüikya ziamong ma nange hwom khomle thompu, hwom zanpabue adix-adale changkya chak tokya a.

²¹JOWANPA achuak kox! Chemtue ku to akhople koplaxle singpuix, ipongma chemtukux ohünotünle chixe chix mongkün ku hato ahopuix!

²²Ku a tüle abüt-aban chang üntoxle chixe ku a chix ngwotnui angkya jwonle apaodaoale thüt. Ikoxlechu chemtue ku to fong angkya chix sepuix, chixe ku sopkya atatle lax.

²³Chix to mongong tüikyabu pangnue JOWANPA to mongkünkya tüikox. Mongong tüikya khünakbu pangwüi JOWANPAe ziakople thomle, ikoxlechu hwome lomkya lailaile ongambu to chixe sikangünle.

²⁴Hünzom pangnu JOWANPA to monghom tüikyabu, chatsak-muazongle mongchong hüi.